Isauyedi 16 - Maiadomu

Iave kanikani me Isileli iveledi pwayapwayamaiqe

¹ Matautauda me Isileli matatabudi vikai Elima ikiaweni inaqo pwayapwayamaiqa kanawavaqa Sini waineye, Koya Sainai wete Elima gamwadie. Gunabeida wetaki tamoqana ikakava Itipita ikiaweni, we ilekwa vikainina waineye kaiata 15 wetaki kanaveluqa waineye.

² Wete no waineye pwayapwayamaiqe me Isileli matatabudi Mosese wete Eloni ibwaduyedi.

³ We ivesipupu waidie ivo, “Mesaida base Iave idaluvewapadamo giamaina, tutuyanina Itipita waineye tamiamia. No waineye tamiamia kanikani puedi takanikani we tutuya puena kanikani kadasala. We kukewaluguaqetema tamai pwayapwayamaiqe beqa lamunanina kida matatabuda taiwapa kanikani paipaina.”

⁴ Matautauda Iave Mosese waineye ivesipupu ivo, “Kwavevaneneqa! Yau beledi aivoneni inayavuta abame'eqa mesaida kwei komi paipaimi. Kaiata tamoqana tamoqana tomo'otoqa dibaekwa waidie inasasauyedi beledi inakakaigwagwa kaiatanina tamoqana kanaketoava paipaina. Dede mesaida aivekautovonidi aiyagovidi oge guloinavo ivemuliedi o gebuka.

⁵ Kaiata 6 waineye wiki tamoqana waineye dede kanikani inakakaigwagwa kaiata kailuqa kadiketoava paipaidi, we kanikani inavalabubunidi kaiata kailuqa paipaidi.”

¹¹ Matautauda Iave Mosese waineye ivesipupu ivo,

¹² “Yau me Isileli dibwadu anoqai. Kuvona waidie, ‘Lavilavie kaisaya kwaikani, we kawakawaie beledi boudi kwaikani kamisala. Tutuyanina kabanuavilele kailuqa kwaikisedi, kwaiyagova-vekavekaia Yau Iave mi Yaubada.”

¹³ No lavilavinina waineye manuqa mesaida bunetutu mepatalidi iyaveqa imai itoaobu tomo'otoqa dibaekwa ikaiumadi waidie imiamia. We tomo'otoqa ikewadi ikanidi. Wete ikawananaqai kawakawaie pwayapwaya matatabuna inumulidi.

¹⁴ Tutuyanina numula isaya, tamo saku mesaida kaupapa tatatalina pwayapwaya ikaiumai.

¹⁵ Tutuyanina me Isileli ikiseni ge idayagovi vakai beqa ediavo ivelautoliedi ivo, “Dede vakai?” We Mosese ivonedi ivo, “Dede beledi Iave ivelemi kwaikani.

¹⁶ Dede Iave navemataluana ivo, ‘Tomoqo tamoqana tamoqana inakakaigwagwa nakani kanaketoava waineye. Ketoa siaidi kailuqa kwaikewadi tomo'otoqa tamoqana tamoqana misusu naqeneye paipaimi.”

¹⁷ Beqa me Isileli mesaida ivalabubunedi Iave ivemataluanidi. Tupwaidiavo ikaigwagwa puedi, we tupwaidiavo ikaigwagwa saiqanaqa.

¹⁸ We tutuyanina beledinina iketoavai tomo'otoqa matatabudi kadisala. No gumanidiavo ikaigwagwa pueotoqidi ge tamo idakenokeno, we no gumanidiavo kaia saiqanaqa ikaigwagwa kadisala. Susu tamoqana tamoqana kaia kadisala.

¹⁹ Matautauda Mosese ivesipupu waidie ivo, “Ge tamo aitoi kanikani inayatoi inakeno kawakawai paipaina.”

²⁰ We me Isileli tupwaidiavo bonana ge idanoqai beqa kanikani kanaketoava iyatodi kawakawai paipaina. We mwatamwata iveadaqidi wete maqaidi ikapo, beqa Mosese kanakapoka ioqala tomo'otoqa waidie.

²¹ We tomo'otoqa kawakawai tamoqana tamoqana beledi ikakaigwagwa mesaida kadisala inakani; we tutuyanina valavala iyayata beledi idewaya.

²² Kaiata 6 waineye, tomo'otoqa beledinina ketoa siaidi pulina ikakaigwagwa, tomo'otoqa tamoqana tamoqana ketoa pulina paipaina. Togumetavo bwaigidi matatabudi imai Mosese ivelautolieni, “Kaiata tupwaidiavo ketoa kailuqa kakaigwagwa we deqoina uvale ketoa pulina kakaigwagwa?”

²³ Mosese ivesipupu waidie ivo, “Vona dede Iave navemataluana, ‘Kawaie veyawai kanakaiata kwaimiavelovani. Dede kaiatanina vesivesinuana taivekimatana Iave waineye. Beqa vakai wayaqimi kwaikanigabu deqoina kwaikanigabu, wete vakai wayaqimi kwailaukumula deqoina kwailaukumula. Tupwaidiavo kwaikani deqoina, we tupwaidiavo kwayatodi kawakawai paipaina.”

²⁴ Ikawananaqai kanikaninidiavo iyatobaledi mesaida Mosese iloina-pakaledi we ge maqaidi idayatodi wete mwatamwata idalugudi.

²⁵ Mosese ivonedi ivo, “Deqoina kanikaninidiavo kwayatobaledi kwaikanidi, paina kaiata dede Kaiata Kabaveyawai Iave waineye beqa ge tamo kanikani kwaibabanedi pwayapwaya waineye.

²⁶ Kaiata 6 naqedie kanikani kwaikaigwagwa, we kaiata 7 waineye, Kaiata Kabaveyawai, ge tamo kanikani kwaibabaneni.”

²⁷ Dede mesaida Mosese ivesipupuyedi, we kaiata 7 waineye, tupwaidiavo tomo'otoqa inaqomo kanikani wayaqidi inakaigwagwa we ge tamo idababaneni.

²⁸ We Iave mekanakapoka Mosese waineye ivesipupu ivo, “Komu tomo'otoqa kuvonedi, ‘Banikodiqa, vakai tutuya waineye guvekaivevena wete guloinavo kwaivalabubunidi ge kwaibailedi?

²⁹ Kwaiyagova-vekavekaia Kaiata Kabaveyawai gukalaqei komi paipaimi. Beqa lamunanina kaiata 6 waineye ketoa pulina kaiata kailuqa paipaidi aitagwanemi. We kaiata 7, Kaiata Kabaveyawai, waineye mivikai waidie kwaimiamia, ge kwainaqo kanikani kwaikaigwagwa.”

³⁰ Beqa kaiata 7 waineye tomo'otoqa iveyawai ge kanikani idakaigwagwa.

³¹ Me Isileli beledinina iqoleni mana.

³⁵ Beqa me Isileli mana waineye ikanikani diqaba 40 naqedie kanaketoava Kenani pwayapwayana waineye ilekwa, no waineye inamiana.