Isauyedi 15 - Maiadomu

Mosese wete me Isileli ikewadidiga

¹ Matautauda Mosese wete me Isileli ikewadidiga Iave waineye, dede mesaida ivesipupuyedi ivo, “Iave aididigeni kewaeqa Kanawavaqa aisilagai paina kanaqaviavo ivelulunapeledi. Osi wete wagabiubiu kaditovekuniqavo itawedi iobu ligwagweye.

² Iave gumanina guveluluna beqa akewadidiga waineye, gumanina iketoyavugu. Gumanina gu Yaubada beqa aididigeni. Gumanina tamagu na Yaubada beqa kanawavaqa asilagai.

³ We kanawavaqa Iave gumanina tomoqonina tovetalaqa.

⁴ We Pelo nawagabiubiu wete natolauqaviavo itawedi iobu ligwagweye. Pelo natogumetavo giamaidi iveyemuvewapadi Ligwagwa Yamoyamoina naqeneye.

⁵ We bwasi wawawanina ivuyoidi, itanunu iobu ligwagwa dibuotoqineye mesaida gileu.

⁶ “O Iave, komu kamukataqina veluvelulunaotoqina, Komu kamukataqina beqa kamuqaviavo kututumugumugudi.

⁷ We komu mwaqitana lagalagaotoqimu beqa kamuqaviavo kuvelulunapeledi. Kamukapoka ioqala-otoqa wete iluvelakovidi mesaida kai idakalakalata libi bwavudi waidie.

⁸ We komu yawaimu kuvugei beqa ligwagwa ivepopoi, we kaiayava itovoi mesaida pita, bwasi wawawanina ligwagwa gamwaneye ipakalidi.

⁹ “We talavuala ivo, ‘Aikwavinedi, wete aikavekavinidi, disakuvo giamaidi aikewadi we vakai matatabudi wayaqigu aikewadi, we kepata aisiokei beqa ailuvewapadi.’

¹⁰ We yawaimu beqa kuyuve ligwagwa beqa ikaiumadi. Kaiayava veluvelulunina waineye itanunu mesaida gileu mwauna.

¹¹ “Iave, oge noko tamo yaubada mesaida komu? Gebuka! Kaia komu kaisemu Maqemaqetamu, we muveluluna isaki-otoqa beqa kagololoyemu, kabanuavilele kuvalabubunidi.

¹² Komu kamukataqina kusiketoi, we ligwagwa iketovegeia we kamuqaviavo itanunu iobu ivuyo.

¹³ “Gumanidiavo kuketoyavudi kadiqaviavo waidie'eqa, kigumetedi muvenapwayewa ge menasivilavila beqa. Muvelulunaeqa kigumetedi muvikai vesivesinuana waineye, no waineye kumiamia.

¹⁴ We kabaloina sulina sulina vonanina inanoqai vakai kuvalabubuni mutomo'otoqavo paipaidi medigololo inavelaudididiqa. We me Pilisitia tomo'otoqa nuapoudi inasakala.

¹⁵ We Edomu togumetavo puedi inavekalagologololo bwaigina. We wete me Moabe ditomoqovo bwaigidi medigololo inavelaudididiqa, we me Kenani tomo'otoqa puedi medigololo inavematakwaikwaino inadewaya.

¹⁶ We matatabudi gololo bwaigina inaveadaqidi. O Iave, muveluluna inakiseni beqa inavekwada ge inapeto mesaida gileu kanaketoava kima mutomo'otoqavo, gumanimavo kuketoyavuma, kaigumetapeledi.

¹⁷ Iave komu kikewama kimaiema kiyatoma mukoya waineye, no vikainina kuvesinueni waineye kumiamia, no vanuqa maqemaqetananina dimamueqa kiyoqoni.

¹⁸ Iave kima mutomo'otoqa kiloinema ge menakabakakavaqa.”

Miliama ikewadidiga

^19-21 Matautauda Miliama gumanidi palopita, Eloni novuna, inava siaina ikewai we tupwaidiavo vevine taiauda isauyedi inava siaina beqa ikaiwesi wete isuya. Ikewadidiga ivo, “Iave taikewadidiga waineye paina kanaqaviavo ivelulunapeledi, diosivo wete diwagabiubiuvo kaditovekuniqavo taiauda itawedi iobu ligwagweye.” We dede mesaida Miliama ikewedi paina me Isileli pwayapwaya sayasayana tabwaneye itauya ibala. We tutuyanina Pelo naosivo wete nawagabiubiuvo wete kaditovekuniqavo ligwagweye ilugu, Iave ligwagwa ivileni iyamunidi.

Bwasi qolaqolana isivilai ivegiagiamai

²² Matautauda Mosese Ligwagwa Yamoyamoina ibaileni me Isileli ikewadi igumetedi inawedi vikai Sulu Pwayapwayamaiqe. Kaiata kaitonu pwayapwayamaiqe isasasala, we ge bwasi idababaneni.

²³ Tutuyanina imai tamo bwasi bopweula waineye, bwasi ibabaneni, we iyemutovoni qolaqolana ge kadisala inayemuya. Beqa no lamunanina vikai iqoleni Mala.

²⁴ Beqa tomo'otoqa Mosese waineye ibwadu ivesipupu ivo, “Kima kaniqoma isaya. Kaiebei bwasi kaiyemu?”

²⁵ Beqa Mosese ivelaukui Iave waineye kaivaisa paipaina, we Iave welavi iveveni. We tutuyanina Mosese welavi itaweni bwasi waineye, bwasi kanayemu ivegiagiamai. No waineye Iave naloina iveledi dimia paipaina, we ivekautovonidi wayaqina inayagovi oge ivekimataneni.

²⁶ Beqa ivonedi ivo, “Kago komi bonagu kwainoqaya-vekavekaia wete gunuanuana giamaina kwaivemulieni wete guloinavo kwaivekimatanedi, beqa viqanina me Itipita base aveledi ge aivelemi. Yau Iave, gumanigu kami tokavegiagiamai.”

²⁷ Matautauda Mala vikai ikiaweni itauya inaqo vikai Elima waineye ilekwa. No vikainina waineye bwasi bopweula kadiyoko 12 wete saisai kadiyoko 70. No waineye bwasi vilaneye ivebaekwa.