Isauyedi 14 - Maiadomu

Pelo me Isileli italakwavinidi

⁵ Tutuyanina Pelo ivoneni ivo, “Me Isileli gunabeida isauyedi,” beqa Pelo wete natolituqavo bwaigidi dinuanua isiviladi ivo, “Vakai tavalabubuni? Me Isileli tatagwanedi isauyedi inaqo, beqa deqoina ge inalituqa paipaida.”

⁶ Matautauda Pelo nawagabiubiu ivalabubunidi wete natolauqaviavo ikewadi,

⁷ wete nawagabiubiu giamaiotoqidi kadiwawa 600 wete Itipita wagabiubiu tupwaidiavo ikewadi, tamoqana tamoqana mekaditogumeta.

⁸ We Iave Pelo nuapouna igiavetabodai me Isileli italakwavinidi. No tutuyanina waineye me Isileli medinuavatu isasauyedi.

⁹ Me Itipita me Isileli italakwavinidi. Pelo nawagabiubiuvo, osi kaditolauqaviavo wete tolauqaviavo me Isileli ikautaqonidi ikisedi tutuyanina iebaekwa Ligwagwa Yamoyamoina doleneye.

¹⁰ Pelo wete natolauqaviavo iteyabiyabibinidi, me Isileli ikisalaga me Itipita imaimai waidie beqa igololo-otoqa itaiqavolovoloqa Iave waineye wayaqidi inakaivaisedi.

¹¹ We Mosese ibwaduyeni ivo, “Komu kwavakwavamu! Banikodiqa, Itipita waineye taumata ge idakenokeno beqa kumaiema dede pwayapwayamaiqe kaiwapa? Uvale Itipitaeqa kukewaluguaqetema kumaiema?

¹² Tutuyanina Itipita kamiamia kavonemu kavo, ‘Kubailema kaimiamia me Itipita paipaidi kailitulituqa.’ Mwaqitana, ielituqema Itipita waineye mwauna, we kago pwayapwayamaiqe kaiwapa kapoiotoqina. Ge wayaqima!”

¹³ Mosese waidie ivesipupu ivo, “Ge kwaigololo! Kwatovoi pakala matautauda kwaikiseni Iave vakai inavalabubuni komi inaketoyavumi deqoina. Me Itipita deqoina kwakisekisedi kawaie ge wete kwaikisa-vaituqanidi.

¹⁴ We Iave paipaimi inavetalaqa. Kwatovoi pakala!”

Ligwagwa Yamoyamoina waineye me Isileli idamana

¹⁵ Matautauda Iave Mosese waineye ivesipupu ivo, “Uvale kwatataiqavolovoloqa waigue? Me Isileli kuvonedi inatauya.

¹⁶ Muwelavi kusilagai dimamu kukaiyoyoweni ligwagwa waineye ligwagwa inakawa'alaqi, beqa komi me Isileli kwaibala pwayapwaya sayasayana waineye.

¹⁷ Kwaetonova, Yau me Itipita debadi aigiavepakalidi beqa inatalakwavinimi ligwagweye. Matautauda Pelo natolauqaviavo, nawagabiubiuvo wete osi kaditolauqaviavo aivelulunapeledi, we tomo'otoqa inadidigegu.

¹⁸ Tutuyanina Pelo menatolauqaviavo aivelulunapeledi, me Itipita matatabudi inayagovi Yau Iave.”

¹⁹ Matautauda Yaubada na'anelose, gumanina me Isileli matadie igumegumeta, we ivila inaqo mulidie. Wete dede mesaida waumana tatatalina kaniakwanina inaqonaqo matadie ivila inaqo mulidie itovoi.

²⁰ Waumananina isivetovoia me Itipita wete me Isileli dibaekwa gamwaneye. Tutuyanina vaitoma isauyeni, waumana kaniakwanina isivilai ivekai. Lovane me Isileli maqeta iveledi we me Itipita vaitoma iveledi, beqa lovananina kanamatatabu waineye ge kadisala inamai me Isileli vividie.

²¹ We Mosese dimana isiketoi inaqo ligwagweye. Matautauda Iave yaqina veluvelulunina bolimanaeqa (isiti) ivetuneni, we lovananina kanamatatabu inununuqa ligwagwa iketovegeia isaya mesaida pwayapwaya sayasayana.

²² Matautauda me Isileli ligwagwa waineye ibala pwayapwaya sayasayana waineye, we ligwagwa mesaida pita itovoi kadikataqie wete kadikelie.

²³ Matautauda me Itipita matatabudi mulidie italakwavinidi. Diosivo, diwagabiubiuvo wete osi kaditolauqaviavo ilugu ligwagweye.

²⁴ We noko kawakawaiotoqe valavala ge idalagaqeta, Iave waumana kaniakwanina wete kai waidie'eqa ikisaobu me Itipita waidie nuadi igiaveqaudi.

²⁵ We Iave diwagabiubiu kadiwilivo ikavekapoidi, beqa ge kadisala inavekuniqedi. We me Itipita ivo, “Iave me Isileli ikakaivaisedi kida me Itipita ieqaviqaviada, beqa kwamai taideqa taivila!”

²⁶ We tutuyanina me Isileli gunabeida ibala vikaineye matautauda Iave Mosese ivoneni ivo, “Dimamu kusiketoi ligwagweye inanaqo ligwagwa inavila inamai me Itipita diwagabiubiu wete osivo kanatolauqaviavo inayamunidi.”

²⁷ We tutuyanina valavala ivelamu ilalagaqeta Mosese dimana isiketoi inaqo ligwagweye wete ligwagwa ivila kanakivie. Me Itipita wayaqidi inadeqa, we Iave iveyavuledi iobu ligwagweye.

²⁸ Ligwagwa ivila-vaituqana kiaveneye we me Itipita matatabudi iyamunidi, gumanidiavo me Isileli ivemuliedi iobu ligwagweye. Ge tamo wagabiubiu, osi kaditolauqaviavo wete tolauqaviavo idatupwa.

³¹ Tutuyanina me Isileli Iave navalabubuna veluvelulunidi ikiseni, banikodiqa mesaida me Itipita ivelulunapeledi, beqa Iave igololoyeni. Iave wete natolituqa Mosese taiauda ivetumaqanedi.