Isauyedi 11 - Maiadomu

Mosese me Itipita ivonedi natudiavo tomwayai lamoqidiavo Iave inaluvewapadi

¹ Iave Mosese ivoneni ivo, “Pelo menatomo'otoqavo waidie gukaimatavuloqa kanavekakava aivalabubuni. Matautauda Pelo inatagwanemi kwainaqo, we mwaqitana wayaqiotoqina kwainaqo beqa iwewesemi.

² Deqoina kunaqo me Isileli waidie kuvesipupu kunavo, ‘Matatabumi kwanaqo me Itipita waidie, no gumanidiavo imiamia vivimie, kwaivelaukuiedi kadikodokodo goula wete seluba inavelemi.’ ”

³ Iave gunabeida me Itipita ivenuayatoyedi beqa disakuvo itagwanedi me Isileli waidie. Mosese mwaqitana kanawavaqa bwaigiotoqina Itipita naqeneye, Pelo natomo'otoqavo wete natolituqavo bwaigidi matadie.

⁴ Matautauda Mosese inaqo Pelo waineye ivesipupu ivo, “Iave ivona ivo, ‘Lovana gamwane Itipita kanamatatabu aikapavivili.

⁵ Beqa Itipita naqeneye tomwayai lamoqidiavo tamoqana tamoqana inawapa. Pelo natomwayai waineye inavelamu mulineye inaobu tolituqa yomuyomuotoqidi ditomwayai lamoqidiavo waidie. Wete kaia mesaida kaisaya matatabudi natudiavo tomwayai lamoqidiavo inawapa.

⁶ Itipita naqeneye tomo'otoqa matatabudi bonadi bwaigidi inataitaiqa, taiqanina ge base mesaida wete kawaie ge mesaida inasauyeni.

⁷ We me Isileli waidie ge tamo vakai inasauyeni ge kanasala tamo saku siaina kapoina inasauyeni waidie, koukou ge inalakwauyedi me Isileli wete dikaisayavo waidie. Beqa lamunanina komi me Itipita kwaiyagovi Yau Iave me Isileli aketovegeidi komi waimie.’ ”

⁸ We Mosese ivesipupu-vaituqana Pelo waineye ivo, “Mutolituqa bwaigidi inamai waigue matague inasobwanu inavo, ‘Kwanaqo! Komu mutomo'otoqavo matatabudi taiauda kwanaqo!’ Matautauda kainaqo.” Mosese kanakapoka ioqala-otoqa beqa Pelo ikiaweni.

^9-10 We kaia mesaida base tutuyanina Iave Mosese waineye ivesipupu isauyeni. Ivo, “Pelo ge kanasala bonamu inanoqai. We mulineye kabanuavilele tupwaidiavo wete aivalabubunidi Itipita pwayapwayana naqeneye.” Mosese wete Eloni Pelo mataneye kabanuavilele matatabudi ivalabubunidi, we Iave Pelo nuapouna igiavepakali beqa me Isileli ge idatagwanedi Itipitaeqa idasauyedi.