Iosua 24 - Maiadomu

Me Isileli ivonadabadaba Iave inavekimataneni

¹ Mulineye Iosua me Isileli manuqa matatabudi ivonedi inamai inavaqakauqa Sikemi taoni waineye. We tutuyanina ilekwa, Iosua iqoledi tomoqovo bwaigidi, togumetavo, loina kanatokalaqei wete tokisavekavinavo Iave mataneye inatovoi.

² We Iosua ivesipupu tomo'otoqa matatabudi waidie ivo, “Iave me Isileli da Yaubada ivesipupu ivo, ‘Basenaqaida tubumiavo Tila menatunavo Ebelamo wete Naoli imiamia Bwasi Iupelesiti vikaineye, we yaubadavo sulidi waidie isobwasobwanu.

³ We Yau tubumi Ebelamo amaseagai Iupelesiti pwayapwayana waineye'eqa akedagumeteni amaieni Kenani pwayapwayana waineye. Natuna Aisake wete tubuna Iakobo waidie'eqa tubuleleleqinavo puedi aveleni.

¹³ “ ‘Pwayapwayanina avelemi ge waidie kwadabagubagula kaia kwakanikanimo, oine vuana wete olibe vuana waidie kwakanikani we ge kwadabagubagulidi kaivuavuaqanidiavo. We taoni bwaigidi avelemi ge waidie kwadayoqona kaia kwamiamiamo.”

¹⁴ Wete Iosua me Isileli ivonedi ivo, “Iave kwaivekimataneni, nuapoumi matatabunaeqa kwailitulituqa paipaina. We yaubadavo kwaibailedi base tubumiavo waidie isobwasobwanu tutuyanina imiamia Bwasi Iupelesiti vikaineye wete Itipita waineye. We Iave kaisena kwaivekimataneni.

¹⁵ Kago Iave kanasobwanu kwaibaila-otoqa deqoina miyaubada kwaivesinueni, vakai yaubada wayaqimi. Banikodiqa, wayaqimi yaubadanidiavo base tubumiavo waidie isobwasobwanu Bwasi Iupelesiti vikaineye, o wayaqimi me Amoli diyaubadavo dipwayapwayanina waineye kwamiamia? We yau wete gususuvo tutuya matatabuna Iave kaivekimataneni waineye kaisobwasobwanu.”

¹⁶ We tomo'otoqa ibaivila ivo, “Kima ge kanasala Iave kaibaileni tupwaidiavo yaubada waidie kaisobwanu.

¹⁷ Paina Iave ma Yaubada kima wete tubumavo iketoyavuma tutuyanina Itipita naqeneye kaetolituqa-maimaiqa. Wete kabanuavilele bwaigidi ivalabubunidi matameye. Tutuyanina kanaqonaqo pwayapwayamaiqe kamaqaviavo gamwadie ivekisabodebodema.

¹⁸ Iave kaisena me Amoli wete tupwaidiavo kabaloina dede pwayapwayanina waineye imiamia ikwavinedi isauyedi, beqa kima wete Iave kaiseotoqina kaivekimataneni ma Yaubada.”