Iosua 1 - Maiadomu

Iave Iosua iloineni Kenani pwayapwaya inakewai

¹ Tutuyanina Iave natolituqa Mosese yawaina ikakava, Iave ivesipupu Mosese kanatokaivaisa Iosua, Nuni natuna, waineye ivo,

² “Mosese gutolituqa iwapa. Beqa deqoina komu wete me Isileli matatabudi kwaivalabubuna Bwasi Iolidani kwaidamani kwailugu pwayapwayanina avelevelemi waineye.

³ Vikai tamoqana tamoqana pwayapwayanina waineye kwainaqonaqo, gunabeida avelemi mesaida base avonadabadaba Mosese waineye.

⁴ We mipwayapwayanina inavelamu Negevi pwayapwayamaiqa kwaibogaeqa (sauti) inanaqo Lebanoni kanakoyavo waidie kotalaeqa (noti), wete inanaqo Bwasi Iupelesiti valavala nakabalagaqeta waineye. We inabala me Ititi dipwayapwaya kanamatatabu waineye, inanaqo Ligwagwa Mediteliani valavala nakabaketonive waineye.

⁵ Iosua ge tamo aitoi vetalaqa waineye inavelulunapelemu yawaimu kanamatatabu waineye. Paina Yau komu taiauda mesaida base Mosese we ge aivenuavulumu wete ge aibailemu.

⁶ “Kiveluluna wete kinuavatu, tomo'otoqa kigumetedi kwailugu pwayapwayanina waineye kwaikewai kwaimiana, base avonadabedabeni tubudiavo waidie.

⁷ Mwaqitana kiveluluna wete kinuavatu, we ge kigololo. Kietonova beqa loina matatabuna gutolituqa Mosese ivelemu kivekimatanedi. Ge kitunuvilamu kamukataqie wete kamukelie kavagi vakai puena kivalabubunidi kaia giamaikavadi.

⁸ Tutuya matatabuna loinanidiavo giligililidi kiwawawadi, kaiata wete lovana waidie kienuanedi, beqa loinanidiavo matatabuna kivekimatanedi. Kago mesaida kivavalabubunedi mulituqa puena kaia giamaikavadi.”