Apositolo Divalabubuna 6 - Maiadomu

Tokaivaisa kadikuma 7 ivesinuedi apositolovo inakaivaisedi

¹ No tutuyanina waineye tovetumaqanavo kadiyoko ivebwaiga-otoqa. We tupwaidiavo inua-kapo dikwabulavo paipaidi. Tovetumaqanavo tupwaidiavo me Guliki iesipupu ivo, “Kaiata tamoqana tamoqana tovetumaqanavo me Ibeliu kanikani kwabukwabulavo iveleveledi we kima makwabulavo kadikaleqei siaina we me Ibeliu dikwabulavo kadikaleqei bwaigina.”

² No lamunina paipaina apositolovo kadikuma 12 tovetumaqanavo matatabudi iqolekauqidi taiauda ivesipupu ivo, “Malituqa mwaqitana Yaubada navona kailalauguguyeni ge kanasala lituqanina kaibaileni we kanikani kaikisavekavini.

³ Beqa egwavo kwaivesinuedi 7 tomoqovo mekadivekimatana wamie'eqa, tomoqovonidiavo Vaitabu Maqemaqetana iveadaqidi wete nuanuauyadi. Matautauda veluluna kaiveledi inakedagumeteni dede lituqanina.

⁴ We kima kaisema tutuya puena kaielaukui wete Yaubada navona kailalauguguyeni.”

⁵ Tovetumaqanavo matatabudi itagwana apositolovo dinuanua paipaina. Beqa Sitibeni ivesinueni, tomoqonina Yaubada ivetumaqana-otoqeni wete Vaitabu Maqemaqetana iveadaqi. We wete ivesinuedi Pilipi, Pilokolusi, Nikanoli, Timoni, Palimenasi wete Nikolasi, Anitioki tomoqina. Nikolasi gumanina Denitali we base tutuyanina bununa igusuya we me Diu disobwanu ivemulieni, mulineye ivetumaqana Ieisu waineye.

⁶ Tovetumaqanavo tomoqovo kadikuma 7 imaiedi apositolovo waidie, we apositolovo dimadi iyatodi kunukunudie wete ivelaukui paipaidi, beqa Yaubada inakaivaisedi we veluluna inaveledi inalituqa.

⁷ Wete tutuya puena tovetumaqanavo Yaubada navona ilalauguguyeni, beqa tomo'otoqa puedi Ielusalema naqeneye Ieisu ivetumaqaneni we wete me Diu tovelomuvo puedi ivetumaqana Ieisu waineye.

Sitibeni ikavikavini

⁸ Yaubada Sitibeni ivonavenapwayeweni bwaigiotoqina wete veluluna iveleni kabanuavilele wete kiakiaya inavalabubunidi tomo'otoqa matadie.

⁹ We tupwaidiavo me Diu disinagogi kanawavaqa Yavuyavudi Lituqamaimaiqa Waineye'eqa kanatomoqovo tupwaidiavo imai Sitibeni taiauda ivekawalagalaga. Tomoqovonidiavo me Diu, tupwaidiavo Sailini wete Alekisanidilia waidie'eqa imai we tupwaidiavo Silisia wete Eisia waidie'eqa.

¹⁰ We tutuyanina iekawalagalaga Vaitabu Maqemaqetana nuakawananaqai Sitibeni iveleni beqa ge kadisala navona inabaivilai.

¹¹ Beqa tomoqovonidiavo vaigavueqa inaqo tupwaidiavo tomoqovo itutulidi katupoe'eqa inavesipupu Sitibeni paipaina tovelomuvo waidie we ivo, “Kima kanoqai Sitibeni Mosese wete Yaubada ge idavekimatanedi ivovona-kapo isisiwataodi.”

¹² No mesaida tomo'otoqa, tomoqovo bwaigidi we loina kanatovekaivevenavo kadikapoka iveoqaoqalidi, beqa matatabudi Sitibeni ikavikavini imaieni Diu Kaniselevo waidie.

¹³ Matautauda tokatupoenidiavo ikewadi imaiedi ikatupoe Sitibeni paipaina ivo, “Tutuya puena dede tomoqonina Temupolo maqemaqetana wete Mosese naloina ivovonaobuobuyedi.

¹⁴ Kima kanoqai dede mesaida ivesipupu ivo, ‘Ieisu tomoqo Nasaleta Temupolo inaluvelakovi we davalabubunavo matatabuna imai Mosese waineye'eqa inasiviladi.”

¹⁵ Matatabudi iekalamia Diu Kaniselevo dikabamiakauqa waineye Sitibeni ikisakikikia we ikiseni maiqina mata'udu'udulina mesaida anelose maiqina.