Apositolo Divalabubuna 4 - Maiadomu

Pita wete Ioni itovoi Diu Kaniselevo matadie

¹ No tutuyanina waineye Pita wete Ioni giladi iesipupu tomo'otoqa waidie, tupwaidiavo togumetavo imai waidie. Gumanidiavo tovelomuvo, tupwaidiavo Sadusivo wete Temupolo Kanatomiagamata kaditogumeta, gumanina Temupolo iekisabodebodeni.

² Pita wete Ioni tomo'otoqa waidie iekaivevena Yaubada kanasala tomo'otoqa tamoqana tamoqana inasivetovoi-vaituqanidi wapaeqa mesaida Ieisu itovoi-vaituqana wapaeqa, beqa dede togumetanidiavo kadikapoka ioqala-otoqa waidie.

³ Beqa tomiagamata Pita wete Ioni ikavikavinidi. Paina gunabeida lavilavie, beqa iyatodi deli naqeneye ikeno.

⁴ We puedi Pita nalauguguya Ieisu paipaina inoqai ivetumaqaneni ilugu tovetumaqanavo kadiyoko ikavesulaia beqa tomoqovokava kadiyoko 5,000, we vevine wete gwagwama ge mekadiwawa.

⁵ Beqa ikawananaqai kawakawaie me Diu togumetavo, tomoqovo bwaigidi wete Mosese naloina kanatovekaivevenavo imiakauqa Ielusalema waineye.

⁶ No miakauqanina waineye tovelomuvo kaditogumeta Anasi wete Kaiapasi wete tupwaidiavo tomoqovo disusu waineye'eqa Ioni, Alikisana wete tupwaidiavo taiauda.

⁷ Matautauda togumetanidiavo tomiagamata iloinedi Pita wete Ioni imaiedi waidie, we ivelautoliedi ivo, “Aitoi navelulunaeqa o aitoi kanawavaqaeqa tomoqonina kwakavegiagiamaia?”

⁸ Matautauda Pita Vaitabu Maqemaqetana navelulunaeqa ibaivila waidie ivo, “Me Isileli kamatogumetavo wete tomoqovo bwaigimi!

⁹ Kasiotoqa komi kwavelautoliema makaivaisa tomoqonina kaqena gemwayana paipaina kwavo, ‘Aitoi ikavegiagiamaia?’

¹⁰ Beqa wayaqigu komi kwaiyagovi Ieisu Keliso tomoqo Nasaleta gumanina kwatutupwateni laukenobalabala waineye, we Yaubada wapaeqa isivetovoia navelulunaeqa tomoqonina ikavegiagiamaia, beqa dede kwakiseni itovoi matamie.

¹¹ Buki Tutuaina waineye ivo Ieisu paipaina dede mesaida, “ ‘We komi toyoqona gileu kwavedumwekaikaieni, we Yaubada gunabeida gileunina iyatoi ivekunututu navanuqa waineye.’

¹² Beqa, Ieisu kaisena kanasala inaketoyavuda. Yaubada ge tamo wavaqa idaveleda pwayapwaya waineye gumanina inaketoyavuda kaia Ieisu kaisena.”

¹³ Togumetavo nuadi ivilele paina Pita wete Ioni iesipupu mesaida tomo'otoqamaimaiqa ge idasikulu we medinuavatu iesipupu. We iyagovi gumanidiavo Ieisu kanakweyabuvo.

¹⁴ We ikiseni tomoqonina Yaubada gumanidiavo veluluna iveledi ikavegiagiamaia taiauda itovotovoi, beqa ge kadisala vakai inavesipupuyeni waidie.

¹⁵ Beqa togumetavo ivonedi Pita wete Ioni inakiawedi, we ediavo taiauda ivesipupu paipaidi.

¹⁶ We kaisekavadi waidie ivesipupu ivo, “Vakai taivalabubuni Pita wete Ioni waidie? Ge kadasala dilituqa veluvelulunina taivekeweni paina tomo'otoqa puedi Ielusalema naqeneye gunabeida ikiseni gumanidiavo tomoqonina ikavegiagiamaia. Beqa ge kanasala taikaimatavuloqidi!

¹⁷ We ge wayaqida taitagwanedi tomo'otoqa puedi inanoqai dede kabanuavilele tomoqonina ikavegiagiamaia paipaina. Beqa tailoina-pakaledi ge inavesipupu-vaituqana tomo'otoqa waidie Ieisu kanawavaqaeqa.”

¹⁸ Beqa iqoledi Pita wete Ioni ilugu-vaituqana. We iloinedi ge wete inavesipupu o inavekaivevena Ieisu kanawavaqaeqa.

¹⁹ We Pita wete Ioni ibaivila waidie ivo, “Ge giamaina kago mivona kaivematamatani Yaubada kaisiwataoi!

²⁰ Beqa kima ge kaivekwada kaia kaiesipupu tomo'otoqa waidie paina Ieisu nalituqa matamaeqa kakiseni wete navekaivevena taniqamaeqa kanoqai!”

^21-22 Matautauda me Diu togumetavo kadikapoka ioqala-otoqa Pita wete Ioni waidie, we iloina-pakaledi. We tomo'otoqa matatabudi Yaubada idididigeni tomoqo gemwayana navegiagiamai paipaina. Tomo'otoqa puepuedi iyagovi mwaqitana Yaubada veluluna Pita wete Ioni iveledi kabanuavilele ivalabubuni. Paina tomoqonina kaqena gemwayana 40 diqaba naqedie. Beqa togumetavo ge tamo kedakeda idanuani beqa inakaimatavuloqidi. Kago gumanidiavo inakaimatavuloqidi tomo'otoqa kadikapoka inaoqala, beqa Pita wete Ioni iketoyavudi.

Tovetumaqanavo ivelaukui Yaubada waineye

²³ Tutuyanina Pita wete Ioni iyavudi inaqo tupwaidiavo tovetumaqanavo ivonedi vakai matatabuna tovelomuvo bwaigidi wete togumetavo ivesipupuyeni waidie.

²⁴ Tutuyanina tovetumaqanavo inoqai, Yaubada waineye ivelaukui nuadi tamoqanaeqa ivo, “Tomwaya, abama, pwayapwaya, ligwagwa wete vakai yawayawaidi matatabudi imiamia waidie komu kuvalabubunidi.

²⁵ Vaitabu Maqemaqetana tubuma Deibida, gumanina tamo mutolituqa, muvona kuveleni tutuyanina ivesipupuyedi ivo, “ ‘Uvale kabaloina kanatogumetavo kadikapoka ioqala, wete uvale tomo'otoqa dinuanuana ivalabubunidi ge mevuadi Yaubada waineye?

²⁶ Kinivo wete tupwaidiavo togumetavo pwayapwaya waineye ivalabubuna vetalaqa paipaina, imai ivelautaubama tamoqana waineye inavetalaqa Tomwaya Yaubada wete Mesaia taiauda.’

²⁷ “Dede mesaida Deibida ivonavaqata isauyeni. Dede Ielusalema taoni waineye Kini Elodi wete Pailato natolauqaviavo taiauda wete me Isileli imiakauqa dinuanuana ivalabubunidi mutolituqa maqemaqetana Ieisu nawapa paipaina, gumanina kuvetuneni Mesaia.

²⁸ Yaubada komu veluvelulunimu, beqa vakai matatabuna kutagwana ivalabubuni wete vakai gunabeida kunuanidi dede mesaida isauyeni Ieisu waineye.

²⁹ Tomwaya Yaubada deqoina kunoqai diloina-pakala kima waimeye, we kima mutolituqavo kukaivaisema ge kaigololo muvalea Ieisu paipaina kaivesipupu-luguaqeteni.

³⁰ Muveluluna kuvelema, beqa mutolituqa maqemaqetana Ieisu kanawavaqaeqa kima kamasala tomo'otoqa kaikavegiagiamaidi, we kabanuavilelekaivalabubuni tomo'otoqa waidie muveluluna kaivekaiveveneni.”

³¹ Tutuyanina ivelaukui ikakava, no vanuqanina waineye imiakauqa iyue, we Vaitabu Maqemaqetana matatabudi iveadaqidi, beqa ivelamu Yaubada valeana inalauguguyeni tomo'otoqa waidie medinuavatu.

Tovetumaqanavo disakuvo isenadi

³² Matautauda tovetumaqanavo matatabudi nuapoudi wete nuadi tamoqana. Ge tamo aitoi idavesipupu idavo, “Gusakuvo kaia paipaigu,” we saku puepuedi waidie ediavo tovetumaqanavo taiauda isenai.

³³ Yaubada apositolovo igiaveluvelulunidi, beqa tomo'otoqa waidie ivesipupu-luguaqeta Tomwaya Ieisu natovoi vaituqana paipaina. We Yaubada Ieisu kanatovemulivo ivonavenapwayewa-otoqedi.

^34-35 Beqa tupwaidiavo tutuya waidie tovetumaqanavo dipwayapwayavo wete divanuqavo ivegimwaneyedi we mane apositolovo iveledi. Apositolovo manenina iveledi gumanidiavo ge medisakuvo waidie, beqa ge tamo tovetumaqana inakokoila.

³⁶ Iosepa tamo kanawavaqa Banabasi (kananuakawananaqai Togiavepakala) imai Salu Saipilosi waineye'eqa we manuqa Libai waineye'eqa.

³⁷ Iosepa tamo pwayapwaya ivegimwaneyeni, we manenina imaieni apositolovo iveledi.