Apositolo Divalabubuna 3 - Maiadomu

Pita tomoqo kaqena gemwayana ikavegiagiamaia

¹ Tamo kaiata Pita wete Ioni inaqo Temupolo waineye velaukui paipaina—no kaiatanina 3 koloki lavilavie.

² No kaiatanina waineye tupwaidiavo tomo'otoqa tamo tomoqo kaqena gemwayana ikavalai imaieni Temupolo malewina kana'awa iqoleni Awa Giamaiotoqina waineye. Dede tomoqonina kaqena gemwayana inana gamodieqa itubuqeni, we tutuya puena enavo no waineye iyatoyatoi. We tomo'otoqanidiavo ilugulugu Temupolo malewina waineye waidie mane ielaukui.

³ Tutuyanina Pita wete Ioni ikisedi saiqanaqa inalugu Temupolo malewina waineye, we ivelaukuiedi ivo, “Ee, mane kwavelegu!”

⁴ Matautauda Pita wete Ioni ikisanaqo waineye ivesipupu ivo, “Kukisema.”

⁵ Beqa ikisanaqo waidie ienuana mane inaveleni.

⁶ Matautauda Pita ivesipupu waineye ivo, “Yau ge megumane, we Yau vakai waigue aivelemu. Ieisu Keliso tomoqo Nasaleta veluluna ivelegu, beqa Yau kagusala aivonemu komu kutovoi kutauya!”

⁷ Matautauda Pita tomoqonina kanakataqina waineye ikavikavina isivetovoia, we vedimadimanaeqa kaqena kaditubwa ivegiagiamai

⁸ we memasona itovoi ivelamu itauya. Matautauda itautauya, iyoyoqosuyasuya we Yaubada idididigeni, we Pita wete Ioni taiauda inaqo Temupolo malewina waineye.

⁹ No tutuyanina tomo'otoqa puedi Temupolo naqeneye ikiseni tomoqonina itautauya we Yaubada idididigeni.

¹⁰ Tutuyanina iyagovi tomoqonina kaqena gemwayana gumanina tovelaukui ikiseni tutuya puena imiamia Awa Giamaiotoqina waineye, beqa tomo'otoqa puedi nuadi ivilele kawadi iokedi vakai isauyeni waineye paipaina.

¹¹ No tutuyanina tovelaukuinina itoge ikavikavina Pita wete Ioni waidie paina imwasana-otoqa, we tomo'otoqa puedi nuadi ivilele we ilaukwavina imai waidie no vikainina Temupolo waineye iqoleni Solomoni Na'ukweta.

Pita ivesipupu yoko waidie

¹² Tutuyanina Pita tomo'otoqa puedi ikisedi iyokoyoko ivesipupu waidie ivo, “Me Isileli banikodiqa, nuami ivilele vakai isauyeni dede tomoqonina waineye? Banikodiqa, beqa kwaetonovima tadavona kima mavelulunaeqa kadakavegiagiamaia idatauya o paina kima Yaubada imwasana-otoqema? Gebuka! Yaubada navelulunaeqa dede isauyeni.

¹³ Ebelamo, Aisake, wete Iakobo di Yaubada—tubudavo matatabudi di Yaubada—Natolituqa Ieisu isilagata-otoqi. Dede Ieisu kwakalaqeieni mitogumetavo waidie wapa paipaina, nigodi Loma Gabemani Pailato wayaqina idaketoyavuya, we komi kwadumwekaieni.

¹⁴ Tutuya puena Ieisu navalabubuna tonotonovidi wete maqemaqetadi, we komi giladi kwadudumwekaieni. Komi kaia kwaelaukuieni wayaqimi Pailato tamo toluvewapa kanawavaqa Balabasi inaketoyavuya.

¹⁵ Beqa komi yawaina vaqata kanatokalaqei kwaluvewapai, we Yaubada wapaeqa isivetovoia. We kaiata 40 naqedie kima matamaeqa kakiseni.

¹⁶ Ieisu naveluluna kavetumaqaneni, beqa dede tomoqonina ikavegiagiamaia, dede tomoqonina kwakiseni wete kwayagovi. Ee mwaqitana! Kima mavetumaqana Ieisu kanawavaqa waineye tomoqonina ikavegiagiamaia matamie!

¹⁷ “Egwavo, ayagovi komi ge kwadayagovi Ieisu Mesaia, beqa komi wete mitogumetavo taiauda Ieisu kwaluvewapai.

¹⁸ We basenaqaida Yaubada napalopita matatabudi ivonavaqata Mesaia inaveviqa wete inawapa, beqa dede mesaida kanamwaqitana isauyeni.

¹⁹ Beqa mikapoina waidie'eqa kwainuavila Yaubada waineye, beqa mikapoina inanuataqonidi.

²⁰ Matautauda Yaubada da Tomwaya vaitabumi inagiveluvelulunidi, we gumanina gunabeida ivesinueni komi kami Toketoyavu, gumanina Ieisu, inavetuneni waimie.

²¹ Ieisu inamiamia abame kanaketoava Yaubada natutuya inasauyeni. Tutuyanina waineye vakai matatabuna pwayepwayeye wete abame inaketokaivaudi mesaida basenaqaida Taunina ivonavaqata napalopita maqemaqetadi waidie'eqa.

²² “Yaubada napalopita Mosese ivo, ‘Iave mi Tomwaya tamo palopita mesaida Yau inasilagai mitomo'otoqavo waidie'eqa. Vakai inavesipupuyeni kwaivevaneneqa-vekavekaieni.

²³ Aitoi palopitanina ge idavevaneneqeni we ge idavekimataneni Yaubada inaketovegeia natomo'otoqa waidie'eqa we inakavekapo'otoqi.”

²⁴ Pita giladi iesipupu ivo, “Samuela waineye ivelamu, Yaubada napalopita matatabudi vakai isauyeni kasiotoqa paipaina ivonavaqata.

²⁵ Komi dede palopitavo natudiavo, we komi naqeneye vonadabadaba Yaubada ivalabubuni tubumiavo taiauda. Paina Yaubada Ebelamo ivoneni ivo, ‘We kamukabeida tubuleleleqimwavo waidie'eqa tomo'otoqa matatabuna pwayepwayeye giamaina inababaneni.”

²⁶ Pita ivesipupu ikakava ivo, “Beqa tutuyanina Yaubada Natolituqa Ieisu isivetovoia, naqaida komi me Diu waimie ivetuneni inavalabubuna-giagiamai waimie inakaivaisemi mikapoinaeqa kwainuavila.”