Apositolo Divalabubuna 27 - Maiadomu

Paulo itupa inaqonaqo Loma

¹ Tutuyanina Paulo deli waineye imiamia, Pesito wayaqina kima inavetunema kaitupa kainaqo Itali. We Loma tolauqaviavo tamo diyoko kanawavaqa Sisa Natovetalaqavo kaditogumeta kanawavaqa Duliasi. Togumetanina menatolauqaviavo Paulo wete tupwaidiavo pilisinavo ikewadi taiauda inanaqo Loma.

² No tutuyanina tamo waga imai Adolomitiamieqa. No waganina ivavalabubuna inatupa inanaqo taoni tupwaidiavo waidie Eisia Polovinisi kwadewina waineye. Beqa waganina waineye kadodoqa we Alisitako Masidonia tomoqina nataoni Tesalonaika taiauda kanaqo.

³ Ikawananaqai kawakawaie kalekwa Saidoni taoni waineye. Duliasi Paulo ikisa-venua'ina'inaqeyeni we itagwaneni inanaqo enavo inakisedi beqa vakai wayaqina inaveleni.

⁴ Kima katupa. Paina yaqina ivilevilema, beqa Salu Saipilosi wete pwayapwaya bwaigina gamwaneyemo niwaniwalovina waineye katupa kanaqo.

⁵ Matautauda kabala kasauyema kawasasamaiqe kanaqo Silisia Polovinisi wete Pamupilia Polovinisi dolediemo kamai kalugu Maila taoni, Lisia Polovinisi waineye.

⁶ Maila waineye Duliasi waga ikiseni imai Alekisanidilia waineye'eqa we inaqonaqo Itali Polovinisi, beqa kima kadodoqa waganina waineye.

⁷ We kaiata puedi kima katupa ge kadalalaukwavina kaemumuna kanaqonaqo mulineye kalekwa Naidasi taoni vivineye. Matautauda katupa-vaituqana, we yaqina bwaigina matameye'eqa inununuqa beqa kabala Salu Kiliti waineye Salimoni Budona kakiaweni.

⁸ Matautauda katupa kavale'eqa salunina waineye kanuama kamai tamo vikai kanawavaqa Kawagova Niwaniwalovina Lasea taoni vivineye.

⁹ Kaiata puedi gunabeida ikakava we ge kamasala kaiveqanaqo paina Vekudiqana Kanakaiata ikakava we gaugau wete yaqina bwaigina kaditutuya ilekwa, beqa Paulo waga kanatolituqavo iloina-pakaledi

¹⁰ ivo, “Egwavo, anuani matadeye mwau bwaigina taibabaneni. We kago kida taitauya yaqina wete kaiayava waga inatula wete saku kwavedodoqidi inakavekapoidi we tupwaidiavo tomo'otoqa wete inawapa.”

¹¹ We Duliasi Paulo navona ge idanoqai we kaia toniwaga wete waga kanatovekuniqa bonadi ivevaneneqeni.

¹² Kawagovanina ge giamaina yaqina kanatutuye, beqa tomo'otoqa puedi wayaqidi kaitupa-vaituqana kago kamasala kainaqo Ponikisi taoni Salu Kiliti kawagovana waineye. Kawagovanina giamaiotoqina paina yaqina kanatutuya waineye ge kanasala inalugu beqa no waineye kaimiamia.

Yaqina wete kaiayava bwaigina ligwagwa waineye

¹³ Tutuyanina kawagovanina waineye kamiamia yaqina giamaina kwaiboga (sauti) ivelamu iyayaqidididina we tutuyanina tomo'otoqa ikiseni, wayaqidi dinuanuananina inavalabubuni kainaqo Ponikisi taoni waineye. Beqa lomu ikwalia itupa Salu Kiliti doleneyemo kanaqo.

¹⁴ We tutuyanina katupa ge kanikie yaqina veluvelulunina kanawavaqa Yaweana itoa iobuma Salu Kiliti waineye'eqa.

¹⁵ Yaqina naya ikonai, waga iyaqivegebai we ge kanasala yaqina mataneye'eqa inanaqo. Tovekuniqa waga isisivetonovi we yaqina kaisena waga ibibibini.

¹⁶ Matautauda salu siaina kakiaweni kanawavaqa Kauda doleneye ivelaubebelema yaqina waineye'eqa. We lituqa bwaigina kavalabubuni waga siaina kabiuya ilaga bulavaeqa kakailailaipwai.

¹⁷ Lituqanina kavekakavai kanatolituqavo waga bwaigina bulavaeqa isikwavekavini beqa ge kanasala inatutubaibaia. Igololo waga inatula tepala kanawavaqa Saitisi Apilika ligwagwana waineye, beqa naya isitakia we yaqina ibibinima kanaqonaqo.

¹⁸ We ikawananaqai kawakawaie yaqina isaki inigenigema, beqa saku wageye'eqa ikewadi iveyavuledi ligwagweye.

¹⁹ We kaiata kanavetonu waineye waga kanasakuvo iveyavuledi iobu ligwagweye, kananaya, kanayoayoana, kanakaiduala wete kanawelavivo.

²⁰ We tutuya ikapo-otoqa, beqa mwatuia wete valavala ge kadakisedi kanaketoava tupwaidiavo kaiata ikakava. We yaqina naveluluna mesaida guvaguvala, beqa kima kaenuana no kago kaiwapa.

²¹ Tutuya kaniakwanina ge tamo aitoi idakani. Matautauda Paulo itovoi matadie ivesipupu ivo, “Boma! Avonemi avo, ‘Kiliti ge taikiaweni’ we bonagu kwatutupeleni. Beqa, deqoina miwaga ikapo we misakuvo kwatawetawedi.

²² We kwanuavatu ge kwaigololoqa! Kaia wagaqa inatanunu we tomo'otoqa ge tamo inawapa.

²³ Lovane Yaubada gu Tomwaya waineye asobwasobwanu na'anelose tamo imai waigue

²⁴ ivo, ‘Paulo ge kigololo. Komu Sisa mataneye kitovoi kisivetonova. Beqa Yaubada muvelaukui inoqai inayoyoimu komu wete tomo'otoqa matatabudi wageye.’

²⁵ Egwavo, kwanuavatu. Yau Yaubada avetumaqaneni vakai ivesipupuyeni waigue inasauyeni.

²⁶ We yaqina inabibinida salu waineye taitula.”

Waga itula

²⁷ Kaiata 14 naqedie guvaguvala inununuqa we ibibibinima Ligwagwa Mediteliani waineye. We lovana gamwane waga kanatolituqavo dinuanuana nigodibeida gunabeida kadamai kavala vivineye.

²⁸ Beqa ligwagwa kanawawana iketoavai ikiseni 40 mitasi kanaobu. Ilaugamasa tutuya kalakusana wete iketoavai kanaobu 30 mitasi ikiseni.

²⁹ We waga kanatolituqavo igololo-otoqa waga inatula gileu waidie paipaina, beqa lomu pulina itawedi waga mulineye. We ivelaukui wayaqidi valavala idavedimadimana idalagaqeta beqa kanasala gileu inakisedi.

³⁰ We waga kanatolituqavo wayaqidi waga inakiaweni, beqa ikatupwaiema nigodibei lomu inataweni waga budoneye we waga siaina isiobuyeni ligwagweye.

³¹ Paulo Duliasi wete tolauqaviavo waidie ivesipupu ivo, “Kago waga kanatolituqavo waga inakiaweni komi matatabumi kwaiwapa.”

³² Beqa tolauqaviavo waga siaina kanabulava igusuya ibeku iobu ligwagweye idoeni.

³³ Ivelamu ikakawananaqai, Paulo tomo'otoqa iwewesedi inakani ivonedi ivo, “Komi kwaenuapousakala beqa ge tamo vakai kwadakani wiki kailuqa naqedie.

³⁴ Yau wayaqigu komi kwaikani kwaiveluluna. Komi ge tamo vakai kwaivai, matatabumi giamaimi.”

³⁵ Paulo ivesipupu ikakava beledi ikewai matadie ivekaiwa Yaubada waineye ikakava matautauda beledi igiatomwatomwai ivelamu ikani.

³⁶ Beqa tomo'otoqa matatabudi nuadi ivatu ikani.

³⁷ We kamayoko waga naqeneye 276.

³⁸ Matatabudi ikani ikabiawa. Kani ikakava wayaqidi waga inameaqana beqa witi base ivedodoqidi iveyavuledi iobu ligwagweye.

³⁹ We kawakawaie waga kanatolituqavo pwayapwaya ikiseni we ge idayagovi. Kwadewa giamaina ikiseni kawagovaneye. Dinuanuana wayaqidi diwaga inavekuniqeni inalugu kavale inabiulaga.

⁴⁰ Beqa lomu kadibulava igusudi ikalavainanidi ligwagwa naqeneye wete kuniqa isiobuyeni we budoneye naya siaina isilagai beqa kanasala yaqina inakonai inanaqo inalugu kavale.

⁴¹ We waga budona sea waineye ibiulagai ipakali ge kanasala inapeto, we kaiayava bwaigina waga mulina inigenigei itutubaibaia.

⁴² Tolauqaviavo ienuana pilisinavo inaluvewapadi vagi ge kanasala ina'ayaqa inalugu kavale inadeqa.

⁴³ We Duliasi wayaqina Paulo yawaina inaketoyavuya, beqa iketobodedi dinuanuana ge inavalabubuni. Matautauda iloinedi gumanidiavo kadisala ina'ayaqa isou iobu ligwagweye ia'ayaqa ilugu kavale.

⁴⁴ We ivonedi tomo'otoqa gumanidiavo ge kadisala ina'ayaqa inaqo waga sepidi waidie ikalapwata. We no kedanina beqa matatabuma kalugu kavale giamaima.