Apositolo Divalabubuna 26 - Maiadomu

Paulo ivesipupu Akalipa mataneye

¹ Pesito navona ikakava matautauda Akalipa Paulo waineye ivesipupu ivo, “Deqoina katagwanemu taunimu paipaimu kivesipupu.” No tutuyanina Paulo dimanaeqa ikakatuava, we divemwau paipaina ivesipupu ivo,

^2-3 “Kini Akalipa, komu kima me Diu mavalabubuna gunabeida kuyagovidi wete velautolinidiavo paipaidi kaekawadibidibi, beqa deqoina yau amwasana atovotovoi matumue we taunigu aisivetonova me Diu divemwau paipaidi. Avelaukuiemu guvona kudavevaneneqa-vekaveakaieni.

⁴ “Gututuya gwamana waineye kanaketoava deqoina me Diu guvalabubuna iyagovi taunigu kagutuvadeye wete Ielusalema waineye.

⁵ We tutuya kaniakwanina iyagovigu, beqa kago wayaqidi kanasala idavonemu yau paipaigu. Iyagovi yau me Diu kadiyoko naqeneye kanawavaqa Palisivo we diketoboda matatabudi aemuli-vekavekaiedi.

^6-7 “Basenaqaida Mesaia Ieisu Keliso ivonadabedabeni inavetuneni tubumavo waidie, beqa me Diu mamanuqa 12 tutuya matatabuna medivetumaqana isobwasobwanu we vonadabadabanina ilalaugamaseni. Kini Akalipa, vonadabadabanina waineye yau wete avetumaqana beqa me Diu iemwaugu deqoina atovotovoi matamue.

⁸ Uvale dede mesaida kwavenuanedi nigo Yaubada ge kanasala tomo'otoqa wapaeqa inasivetovoidi?

⁹ “Base yau gunuanuana mesaida vakai matatabuna aivalabubuni no paipainanina tomo'otoqa Nasaleta tomoqina kanawavaqa Ieisu inasiwataoni inavona-kapoyeni.

¹⁰ Naqaida dede mesaida yau avalabubuni Ielusalema waineye, no waineye tovelomuvo bwaigidi loina wete veluluna ivelegu Ieisu kanatovetumaqanavo puedi deli waineye ayatoyatodi. We tutuyanina inigedi yau atagwana kadiluvewapa paipaidi.

¹¹ Tutuya puena tovetumaqanavo akaimatavuloqidi masinagogi naqedie, we akakavegololodi divetumaqana Ieisu paipaina inavekeweni. We kagukapoka ioqala-otoqa beqa anaqo alalaualedi mali vikaie taoni waidie we veviqa aveleveledi.

¹² “Tamo tutuya tovelomuvo bwaigidi Ielusalema naqeneye loina ivelegu ivetunegu ainaqo Damasiko.

¹³ Kini, no tutuyanina yau kaisegu anaqonaqo Damasiko kanakedeye kaiatagamwane maqeta mata'udu'udulina abame akiseni. We maqetanina isaki mulineye valavala! Imaqeta-velauviviligu wete tomoqovonidiavo taiauda kanaqonaqo.

¹⁴ We matatabuma kabeku kaobu pwayepwaye. Matautauda tamo aitoi bonana anoqai iesipupu waigue Ibeliu bonadieqa. Ivo, ‘Saulo, Saulo, uvale veviqa kuvelevelegu? Wete komu taunimu veviqa kuvelevelemu.’

¹⁵ “Beqa avelautoli avo, ‘Aitoi komu, Tomwaya?’ “We Tomwaya ibaivila ivo, ‘Yau Ieisu, gumanigu veviqa kuvelevelegu tutuyanina kagutovemulivo veviqa kuveleveledi.

¹⁶ Kutovoi! Yau alausimatala waimue, beqa avesinuemu Yau gutolituqa wete gutovesipupu. Kinaqo malitomo'otoqa waidie kivesipupu kasiotoqa asauyegu waimue paipaina wete kamukabeida vakai aivevemu paipaidi.

¹⁷ Yau aivetunemu kinaqo Denitali waidie, tomo'otoqanidiavo wete taunimu mutomo'otoqavo me Diu wayaqidi inaluvewapamu we aiketoyavumu.

¹⁸ Tomo'otoqanidiavo matadi kigiavekawananaqaidi, beqa kanasala inanuakawananaqai dikapoinaeqa inanuavila inamai maqeta waineye, we Seitani naveluluna waineye'eqa inasauyedi inamai Yaubada waineye. Paina inavetumaqana waigue, Yau dikapoina ainuataqonidi matautauda inalugu gutomo'otoqa maqemaqetadi basenaqaida avesinuedi waidie.’

¹⁹ “Kini Akalipa, dede kenokisakisanina abame'eqa imai beqa ge adavedumwekaikaieni we avematamataneni.

²⁰ Alauguguya me Diu waidie Damasiko, Ielusalema, wete Iudia Polovinisi kanamatatabu naqeneye. We wete alauguguya Denitali waidie. Matatabudi avonedi dikapoinaeqa inanuavila inamai Yaubada waineye we divalabubunaeqa inavekaivevenedi gunabeida valabubuna kapoidi ivekwada.

²¹ “Paina valeanina alalauguguyeni me Diu ikavikavinigu Temupolo naqeneye we nigo idaluvewapagu.

²² We Yaubada ikakaivaisegu no tutuyanina kanaketoava deqoina. Beqa dede waineye atovoi avonevonemi, tomo'otoqa bwaigimi wete tomo'otoqamaimaiqa. Vakai aesipupuyedi waimie Yaubada napalopitavo wete Mosese ivesipupuyedi inasauyedi ivesala.

²³ We ivesipupu ivo, ‘Tomo'otoqa Mesaia veviqa bwaigina inaveleni inawapa wete naqaida inatovoi-vaituqana we Yaubada valeana mesaida maqeta inalalauguguya taunina natomo'otoqavo me Diu wete Denitali waidie.”

²⁴ Vesalawapaeqa Pesito iveqole ivo, “Paulo, komu kwavakwavamu! Munuauya bwaigina gumanina igiavekwavakwavamu!”

²⁵ We Paulo ibaivila ivo, “Pesito, tomoqo bwaigimu, yau ge kwavakwavagu! Gebuka! Vakai yau aesipupuyeni mwaqitana wete tonotonovina!

²⁶ Dede sakunidiavo yau avesipupuyedi paipaidi ge idasauyedi vaigavueqa. Beqa ayagovi komu, Kini Akalipa, sakunidiavo kuyagovidi no lamunina kanasala megunuavatu aivesipupu paipaidi waimue.

²⁷ Kini Akalipa, banikodiqa komu kuvetumaqaneni vakai palopitavo igililia? Yau ayagovi kuvetumaqaneni.”

²⁸ Beqa Akalipa ibaivila Paulo waineye ivo, “Banikodiqa, nigo muvona kalakusanaeqa wayaqimu yau gunuanuana kisivilai aivetumaqana Ieisu waineye?”

²⁹ Paulo ibaivila ivo, “Aiqodi, guvesipupu kalakusana o kaniakwanina we aivelaukui Yaubada waineye wayaqigu komu wete tupwaidiavo deqoina guvona kwanoqanoqai kwaivetumaqana Ieisu waineye mesaida yau avetumaqana, we ge idalaubwainemi kwaivepilisina yau mesaida.”

³⁰ Matautauda Kini Akalipa, Gabemani Pesito, Benaisa wete tomo'otoqa matatabudi itovoi tutudaba ikiaweni.

³¹ We no tutuyanina waineye kaisedi ivesipupu ivo, “Tomoqonina ge menakapoina, beqa ge idalaubwaineni inayatoi deli waineye o inaluvewapai.”

³² Akalipa ivesipupu Pesito waineye ivo, “Kida kanasala tomoqo tadayavuya deli waineye idanaqo. We gunabeida ivona wayaqina Sisa mataneye inatovoi inasivetonova. Beqa paipainanina kida ge kanasala taiyavuya inanaqo.”