Apositolo Divalabubuna 25 - Maiadomu

Paulo wayaqina inasivetonova Sisa mataneye

¹ Tutuyanina Gabemani Pesito ilekwa Sisalia taoni no waineye imiamia kaiata kaitonu ikakava. Mulineye itauya ilaga Ielusalema.

² No waineye tovelomuvo bwaigidi wete me Diu kaditogumetavo imai Pesito mataneye Paulo ivemwauya.

³ Paina vaigavueqa nuanuana italaqi kedeye Paulo inaluvewapai, iekautovona Pesito nuana inakania ivelaukuieni, “Wayaqima kudavalabubuna giagiamai waimeye beqa Paulo Sisaliaeqa kivetuneni inalaga Ielusalema.”

⁴ We Pesito ibaivila ivo, “Paulo akakavikavini deli naqeneye Sisalia waineye, we saiqanaqa aivila ainaqo no waineye.

⁵ Beqa tupwaidiavo mutogumetavo kanasala taiauda kaiobu Sisalia waineye, tomoqonina kago menakapoina no waineye kwaivemwauya matague.”

⁶ Pesito imiamia Ielusalema naqeneye kaiata 8 o 10 ikakava mulineye iobu Sisalia. Ikawananaqai kawakawaie imiabui loina kanatokalaqei nakabamiabui waineye natolauqaviavo iloinedi Paulo inamaieni mataneye inavetovoia.

⁷ Tutuyanina Paulo ilekwa, me Diu gumanidiavo Ielusalemaeqa iobuma itovoi-velauvivileni valabubuna kapoidi beqa iemwauya, we ge tamo aitoi vakai idavekaiveveneni mwaqitana Paulo kapoina ivalabubuni.

⁸ We Paulo divemwau paipaidi ivekewa ivo, “Yau ge tamo kapoina adavalabubuni me Diu diloina waineye, Temupolo waineye wete Sisa naloina waineye.”

⁹ We, Pesito wayaqina me Diu inavenuagudadi, beqa Paulo ivelautolieni ivo, “Komu kutagwana tailaga Ielusalema waineye kisivetonova matague vemwaunidiavo paipaidi?”

¹⁰ Paulo ibaivila waineye ivo, “Gebuka, deqoina yau atovotovoi tamo Sisa nakabasivetonova waineye. Yau Loma tomoqigu beqa dede waineye kanasala adavonayavu waimue. We komu kaisemu kuyagovi yau ge tamo kapoina adavalabubuni me Diu waidie.

¹¹ We kago tamo loina bwaigina adabaia ilaubwainegu kwadaluvewapagu, we yau aitagwana! We dede tomoqovonidiavo vakai ivesipupuyedi ge mwaqitana, beqa ge tamo aitoi kanasala inayatogu dimadie. Wayaqigu Sisa mataneye aitovoi Loma waineye aisivetonova we inaloina avalabubuna-kapo o gebuka!”

¹² Pesito natonuauyavo taiauda ivesipupu matautauda ivesipupu Paulo waineye ivo, “Paina komu wayaqimu Sisa, giamaina, kinaqo Sisa waineye!”

Pesito Kini Akalipa ivoneni Paulo paipaina

¹³ Kaiata tupwaidiavo ikakava Kini Akalipa wete novuna Benaisa taiauda imai Sisalia waineye Gabemani kaivauna Pesito inavonamwasamwasaneni.

¹⁴ We imiamia waineye kaiata puedi ikakava, beqa Pesito Akalipa ivoneni me Diu divemwau Paulo waineye ivo, “Pilikesa natutuya loina, tamo tomoqo iyatoi deli waineye, we giladi imiamia.

¹⁵ We tutuyanina anaqo Ielusalema waineye, tovelomuvo bwaigidi wete me Diu tomoqovo bwaigidi ivemwauya we ivelaukuiegu inaluvewapai.

¹⁶ We avonedi kida Loma daloina waineye kago tamo pilisina kanatovemwauvo taiauda ge inasivetonova kida ge kanasala taikaimatavuloqi. Ilaubwaineni naqaida inasivetonova toloina mataneye kanatovemwauvo taiauda, beqa divemwau inabaiviladi. We toloina inavesinua ivalabubuna-kapo o gebuka.

¹⁷ “Tutuyanina me Diu imai ilekwa Sisalia yau ge adalalaugamasa. We kawakawaie amiabui loina kanatokalaqei nakabamiabui waineye, we gutolauqaviavo aloinedi tomoqonina imaieni matague.

¹⁸ We tutuyanina tovemwaunidiavo itovoi divemwau ivesipupu-luguaqetedi paipaina, avona inavonegu tomoqonina kapoina bwaigina ivalabubuni.

¹⁹ We kaia iekawadibidibimo me Diu taunidi divetumaqana paipaina wete tamo towapa kanawavaqa Ieisu paipaina. Paulo iesipupu tomoqonina wapaeqa itovoi-vaituqana meyawaina.

²⁰ Beqa ge adayagovi banikodiqa vemwaunidiavo paipaidi aiyagovedi, beqa Paulo avelautolieni avo, ‘Wayaqimu kinaqo Ielusalema waineye kisivetonova divemwaunidiavo paipaidi?’

²¹ We Paulo ibaila wayaqina Sisa mataneye inatovoi inasivetonova. Beqa tolauqaviavo aloinedi iyato-vaituqani deli waineye, mulineye aivetuneni Sisa waineye.”

²² Akalipa ivesipupu Pesito waineye ivo, “Wayaqigu kaisegu tomoqonina inavesipupu ainoqai.” Pesito ibaivila ivo, “Giamaina, kawaie inavesipupu kinoqai.”

Kini Akalipa Paulo navona inoqai

²³ Ikawananaqai kawakawaie Kini Akalipa wete novuna Benaisa kinivo kadikaleko giamaiotoqidi beqa ivaiqavu, we tolauqavia kaditoloinavo wete taoni kanatomoqovo bwaigidi ikweyabudi inawedi kabamiakauqa waineye. Tutuyanina imaimai tupwaidiavo tomoqovo naqekava iyuveyuvei. Ilugu imiabui mulineye Pesito tolauqaviavo iloinedi Paulo imaieni ivetovoia matadie.

²⁴ Matautauda Pesito ivo, “Kini Akalipa wete komi matatabumi taiauda dede waineye tamiamia, dede tomoqonina me Diu matatabudi Ielusalema wete Sisalia naqeneye iemwauya we ieqoleqole wayaqidi ailuvewapai navalabubuna kapo paipaina.

²⁵ We yau ge tamo kapoina adababaneni beqa ailuvewapai. We taunina wayaqina inatovoi Sisa mataneye, beqa lamunanina aivetuneni inanaqo Sisa nataoni bwaigina Loma waineye.

²⁶ “We yau giladi ge adayagovi vakai aigililia gulubulubu naqeneye Paulo paipaina Sisa waineye. Beqa Paulo akewai amaieni Kini Akalipa matamue wete matatabumi matamie. Navona tainoqai mulineye gulubulubu aigililia Sisa waineye.

²⁷ No ge giamaina waigue kago tamo pilisina nakapoina ge mekanababana we aivetuneni Sisa waineye ge menalamuna.”