Apositolo Divalabubuna 24 - Maiadomu

Paulo itovoi Pilikesa mataneye

¹ Kaiata 5 ikakava, matautauda tovelomuvo kaditogumeta Ananaiasi wete tupwaidiavo tomoqovo bwaigidi taiauda ilekwa Sisalia, tamo tovesipupu kanawavaqa Tetalasisi taiauda. We tovesipupunina Loma tomo'otoqa diloinavo iyagova-vekavekaidi. Matatabudi inaqo itovoi Pilikesa Gabemani mataneye Paulo inavemwauya.

² Tutuyanina Pilikesa Paulo iqoleni ilugu waidie, matautauda Tetalasisi me Diu divemwau Paulo paipaina ivesipupuyedi Pilikesa waineye ivo, “Tomoqo Bwaigimu, muyagova bwaigiotoqina wete kamatogumeta munuanuana giamaidi, beqa tutuya kaniakwanina kamia niwalovaeqa we saku puedi giamaidi isauyedi dakabaloina naqeneye.

³ Kima tutuya matatabuna vikai tamoqana tamoqana waidie memamwasana kavekaiwa bwaigina waimue!

⁴ Ge wayaqima vona puedi kaivesipupuyedi waimue kago mesaida kikabiawa, we kavelaukuiemu mavona kalakusana kudanoqai.

⁵ “Kima dede tomoqonina kayagovi-mwaqitana togiaveqau, paina taoni tamoqana tamoqana waidie navonaeqa me Diu iekapokaoqaoqalidi iekawadibidibi. Ieisu kanatovemulivo diyoko kanawavaqa Nasaleta, Paulo tamo kanatogumeta.

⁶ We iekautovona Yaubada na  Temupolo inakavebwanenei, beqa kakavikavini.

⁷ We tolauqavia kaditoloina Lisiasi imai menaveluluna dimameye Paulo ikewai.

⁸ Iloinema kamai dede waineye Paulo kaivemwauya matamue. Kaisemu Paulo kivelautolieni kiyagova-vekavekaia vakai paipaina kima kaemwauya!”

⁹ Tutuyanina Tetalasisi navona ikakava, me Diu matatabudi ioqali ivo, “E'e mwaqitana!”

¹⁰ Matautauda Gabemani dimana ikaiyoyoweni Paulo waineye inavesipupu, we Paulo ivesipupu ivo, “Tomoqo Bwaigimu, gunabeida ayagovi diqaba puedi kuloloinema kima makabaloina waineye beqa me Diu manuanuana kuyagovidi paipainanina megumwasana divemwau paipaina aivekewa matamue.

¹¹ Kaisemu tomo'otoqa kivelautoliedi kiyagovi, tutuyanina alaga Ielusalema Yaubada waineye asobwanu kanaketoava imai deqoina saiqanaqa kaiata 12 inakakava.

¹² Tovemwaunidiavo ge idakisegu tamo tomo'otoqa taiauda kadaekawadibidibi Temupolo naqeneye, ge idakisegu tomo'otoqa adaekapokaoqaoqalidi sinagogi waineye wete ge idakisegu tupwaidiavo vikai taoni waidie.

¹³ Tomo'otoqanidiavo ivemwaugu ge kanasala tamo vakai inavevemu beqa kikawamwaqitana divonanidiavo paipaidi.

¹⁴ “We aivona-luguaqeta mwaqitana tubudavo di Yaubada waineye asobwasobwanu wete Tomwaya Ieisu Nakeda aemulieni. We me Diu ditogumetavo inuani dede Kedanina maloina ibaia, we Mosese naloina avetumaqaneni wete vakai puepuena Yaubada napalopitavo igililia avetumaqanedi.

¹⁵ Yau wete kagutovemwauvo taiauda kavetumaqana mwaqitana kamukabeida Yaubada tomo'otoqa wapaeqa inasivetovoi-vaituqanidi, togiamaina wete tokapoina.

¹⁶ Beqa tutuya matatabuna aekautovona aimia yawaina tonotonovina wete nuapougu maqemaqetana Yaubada wete tomo'otoqa matadie.

¹⁷ “Diqaba puedi naqedie aelauvivila vikai puedi waidie matautauda avila amai Ielusalema waineye no lamunina venapwayewa amaieni gutomo'otoqavo me Diu laulauyogudi paipaidi we velomu gabugabunidi adakalaqei Yaubada waineye.

¹⁸ Tutuyanina gugiavemaqeta kanavalabubuna ikakava we guvelomu gabugabunidi adavalabubuni, kagutovemwaunidiavo ikisegu Temupolo naqeneye we yoko ge yau taiauda wete ge tamo giaveqau.

¹⁹ We tupwaidiavo me Diu Eisia Polovinisi imai no waineye. We no gumanidiavo kanasala idamai matamue idavemwaugu vakai kapoina avalabubuni ikisegu.

²⁰ O dede tovemwaunidiavo dede waineye kanasala idavonemu vakai kapoina idababaneni waigue tutuyanina atovoi Diu Kaniselevo matadie we ielautoliegu.

²¹ We oge dede nuanuananina tamoqana paipaina iemwaugu tutuyanina atovoi matadie bonagu bwaiginaeqa avesipupu avo, ‘Avetumaqana Yaubada kamukabeida tomo'otoqa inasivetovoi-vaituqanidi wapaeqa!’ Beqa dede lamunanina kasiotoqa yau atovotovoi asisivetonova matamue.”

²² We Pilikesa gunabeida iyagovi Tomwaya Nakeda paipaina. Beqa miakauqa igiavekwadai ivesipupu waidie ivo, “Tutuyanina tolauqavia kaditoloina Lisiasi inamai dede waineye, navona ainoqai matautauda aivesinua Paulo ivalabubuna-kapo o gebuka.”

²³ We Pilikesa tamo tolauqavia kaditogumeta ivoneni Paulo inakisavekavini we itagwaneni enavo inamai inakaivaiseni tupwaidiavo saku beqa, we ge inatatalabodebodedi.

Paulo Pilikesa iveveveni Ieisu paipaina

²⁴ Tutuyanina tupwaidiavo kaiata ikakava Pilikesa imai kabamiakauqa waineye mwanena Dalusila taiauda, gumanidi Diu vavinedi. Valea ivetuneni tolauqaviavo waidie Paulo inamaieni waidie. Paulo igiavemaqeta banikodiqa tomo'otoqa divetumaqana iyatodi Ieisu Keliso waineye, we Pilikesa memwanena ievaneneqa.

²⁵ We tutuyanina Paulo ivelamu iesipupu valabubuna giamaidi paipaidi, taunida davalabubuna paipaidi taikisavekavinidi, wete banikodiqa kamukabeida tutuya kabavekakava waineye tomo'otoqa matatabudi inavonayavu Ieisu waineye inaloinedi. Pilikesa navona inoqai igololo Paulo ivoneni ivo, “Kunaqo! Tamo kaiata meameaqanina waigue aiqolemu kimai.”

²⁶ Tutuya puena iqoleqoleni imaimai waineye taiauda iesipupu. Pilikesa wayaqina Paulo vaigavueqa mane inamaieni inaveleni matautauda inaketoyavuya deli waineye'eqa.

²⁷ Diqaba kailuqa ikakava mulineye, Posiasi Pesito imai Pilikesa iketopesali. Paina Pilikesa wayaqina me Diu inavenuagudadi beqa iloineni Paulo deli waineye inamiamia.