Apositolo Divalabubuna 23 - Maiadomu

¹ Paulo ikisanaqo Diu Kaniselevo waidie ivesipupu ivo, “Egwavo, tutuya puena guvalabubuna kaia tonotonovina Yaubada mataneye beqa nuapougu maqemaqetana.”

² Vedimadimanaeqa tovelomuvo kaditogumeta kanawavaqa Ananaiasi vonanina inoqai kanakapoka ioqala beqa gumanidiavo Paulo vivineye itovotovoi ivonedi kawaneye ikainige.

³ We Paulo ivesipupu Ananaiasi waineye ivo, “Yaubada inanigemu, komu tokatupoe! Tomo'otoqa waidie kamukisa giamaina we nuapoumu naqena bwanebwanenena! Komu kumiabui loina kanatokalaqei nakabamiabui waineye kiloinegu Mosese naloina waineye'eqa, we komu taunimu loinanina kubaibaia tutuyanina tomoqonina kuloloineni inanigegu!”

⁴ Gumanidiavo Paulo vivineye itovotovoi ivelautolieni ivo, “Uvale kuvonaobuobuyeni Yaubada natovelomuvo kaditogumeta?”

⁵ Paulo ibaivila waidie ivo, “Egwavo, yau ge adayagovi gumanina tovelomuvo kaditogumeta. Yaubada Nabuki ivo, ‘Ge kivonaobuobuyeni tomo'otoqa kaditogumeta.”

⁶ Paulo iyagovi Diu Kaniselevo waidie yoko kailuqa Sadusivo wete Palisivo. Beqa bonana bwaiginaeqa iveqole ivo, “Egwavo, tamagu Palisi wete yau mesaida. Avetumaqana mwaqitana Yaubada tomo'otoqa wapaeqa inasivetovoi-vaituqanidi, beqa dede paipainanina matamie asisivetonova.”

⁷ We tutuyanina dede mesaida ivesipupuyedi, Palisivo wete Sadusivo ivelamu iekawadibidibi, beqa yoko iketovegeia kailuqa.

⁸ We divekawadibidibi lamuna dede mesaida. Sadusivo Yaubada ge idavetumaqaneni kamukabeida towapa inasivetovoi-vaituqanidi, wete ge idavetumaqana anelosevo wete vaitabu idamiamia. We Palisivo sakunidiavo ivetumaqanedi.

⁹ We vekawadibidibi ivebwaiga, tupwaidiavo Palisivo loina kanatovekaivevenavo itovoi ivona-veluveluluna ivo, “Dede tomoqonina ge tamo vakai kapoina idavalabubuni! Oge mwaqitana tamo anelose o tamo vaitabu ivesipupu waineye.”

¹⁰ Tutuyanina divekawadibidibi ivebwaiga-otoqa, tolauqavia kaditoloina Lisiasi igololo ivo, “Kago mesaida Paulo inasilakelakevi,” beqa natolauqaviavo ivonedi iobu Paulo ikewai ivileni inaluguveni divanuqa pakalina naqeneye.

¹¹ We lovananina waineye Tomwaya ilausimatala Paulo waineye ivoneni ivo, “Kunuavatu! Komu paipaigu kuvesipupu Ielusalema tomo'otoqa waidie, wete kaia mesaida kivesipupu paipaigu Loma taoni waineye.”

Me Diu wayaqidi Paulo inanigei

¹² Ikawananaqai kawakawaie tupwaidiavo me Diu imiakauqa-vaigavueqa ivesipupu banikodiqa Paulo inaluvewapai. Beqa taunidi ivonadabadaba Yaubada waineye ge inakani wete ge inayemu kanaketoava Paulo inaluvewapai

¹³ We tovonanidiavo kadiyoko 40 iyoqopeleni.

¹⁴ Beqa inaqo tovelomuvo bwaigidi waidie wete me Diu tomoqovo bwaigidi ivonedi ivo, “Kima gunabeida kavonadabadaba Yaubada waineye ge kaikani wete ge kaiyemu kanaketoava Paulo kailuvewapai.

¹⁵ Beqa kima manuanuana dede mesaida, komi wete Diu Kaniselevo taiauda kwainaqo Lisiasi waineye kwaivelaukuieni Paulo inaobuyedima waimie nigodibei kwaivelautoli-vaituqaneni. We kima kedeye kailalaugamaseni inamai kainigei.”

¹⁶ We Paulo avuna novuna natudi gunabeida inoqai divesipupu kanakainige paipaina, beqa inaqo ilugu tolauqavia divanuqa pakalina waineye Paulo ivoneni.

¹⁷ Tutuyanina Paulo inoqai vonanina tamo tolauqavia kaditogumeta ivoneni ivo, “Tubuau dede kukewai kunaweni mutogumeta bwaigina waineye inavesipupu.”

¹⁸ Beqa tolauqavia kaditogumeta tubuaunina ikewai inaweni Lisiasi waineye ivoneni ivo, “Pilisina Paulo ivonegu tubuau dede amaieni inavesipupu waimue kinoqai.”

¹⁹ Lisiasi tubuau dimaneye ikavikavina iveqabaleni ivelautolieni ivo, “Vakai vona kivonegu?”

²⁰ Ibaivila ivo, “Kawaie me Diu inavelaukuiemu Paulo kinaweni Dikaniselevo matadie. We divaiseba inavonemu inavo, ‘Kaivelautolieni nanuanuana kaiyagova-vekavekaia.’

²¹ We ge kinoqayedi paina ditomoqovo kadiyoko 40 iyoqopeleni ivaigavu ilalaugamasa kedeye wayaqidi Paulo inaluvewapai. Gunabeida ivonadabadaba ge inakani wete ge inayemu kanaketoava Paulo inaluvewapai. Deqoina gunabeida ivalabubuna ilalaugamaseni mutagwana.”

²² Beqa Lisiasi tubuau ivemataluani ivo, “Ge tamo aitoi kivoneni dede kuvonegu paipaina.” Matautauda ivoneni inaqo.

Paulo ivetuneni Pilikesa waineye

²³ Matautauda Lisiasi natolauqavia kaditogumeta kadikailuqa iqoledi ivonedi ivo, “Mitolauqavia kwaivonedi kwaivalabubuna kamiyoko dede mesaida: Tolauqaviavo 200, osi kanatolauqaviavo 70, wete kibadi kanatolauqaviavo 200. Lovane 9 koloki matatabumi Paulo kwainaweni Sisalia taoni waineye.

²⁴ Wete osi tupwaidiavo kwaivalabubunidi Paulo inadodoqa. Kwaibalabodebodeni kwainaweni Loma Gabemani Pilikesa waineye.”

²⁵ Matautauda Lisiasi lubulubu igililia ivesipupu ivo,

²⁶ “Yau, Kolodiasi Lisiasi, agiligilili, Gabemani kaditogumeta bwaigimu Pilikesa, waimue. Avonamwasamwasanemu.

²⁷ “Dede tomoqonina Paulo me Diu ikavikavini nigo idaluvewapai we tamo tomoqo ivonegu ivo, ‘Dede Loma tomoqina,’ beqa gutolauqaviavo taiauda kanaqo kaketoyavuya.

²⁸ Matautauda wayaqigu lamuna ailauwaleni paipainanina iemwauya beqa anaweni Diu Kaniselevo waidie.

²⁹ We avelautoliedi beqa ayagovi divemwau taunidi diloina paipaina, we Loma naloina waineye ge tamo kapoina idavalabubuni beqa aiyatoi deli waineye o ailuvewapai.

³⁰ We tamo tomoqo ivonegu, me Diu iesipupu-vaigavu wayaqidi Paulo inaluvewapai, beqa vedimadimanaeqa avetuneni iwaiwai waimue. Wete kanatovemwauvo avonedi inawai no waineye inasivetonova divemwau paipaina waimue.”

³¹ Tolauqaviavo Lisiasi naloina inoqai beqa no lovananina waineye Paulo ikewai inaqo ilekwa Anitipatili taoni waineye.

³² Ikawananaqai kawakawaie tolauqaviavo wete kibadi kanatolauqaviavo ivila inaqo divanuqa pakalina Ielusalema waineye we kaia osi kanatolauqaviavo kaisedi Paulo ikewai inaqo Sisalia waineye.

³³ Tutuyanina osi kanatolauqaviavo ilekwa Sisalia naqeneye lubulubinina Gabemani Pilikesa iveleni, wete Paulo dimaneye iyatoi.

³⁴ We Gabemani lubulubu iwawai ikakava Paulo ivelautolieni ivo, “Komu kamutuvada vakaiebeida?” Paulo ibaivila ivo, “Silisia Polovinisi.” We tutuyanina Pilikesa navona inoqai

³⁵ ivesipupu Paulo waineye ivo, “Tutuyanina kamutovemwauvo inamai mulineye kwaisivetonova matague.” Matautauda natolauqaviavo tupwaidiavo ivonedi Paulo inakewai inaekisabodabodeni vanuqa bwaigina waineye base Kini Elodi iyoqoni.