Apositolo Divalabubuna 22 - Maiadomu

¹ Paulo ivesipupu ivo, “Tamagwavo wete egwavo, kwavekwada aivonemi, yau avona-otoqa ge tamo kapoina adavalabubuni.”

² Tutuyanina yoko inoqai Paulo taunidi Ibeliu bonadieqa iesipupu beqa bwau ivekwada.

³ Ivesipupu-vaituqana ivo, “Yau Diu tomoqigu Tasisi waineye atubuqa Silisia Polovinisi waineye. We Ielusalema avebwaiga wete waineye asikulu. Gamalieli gutovekaivevena we tubumavo diloinavo wete divalabubunavo ivevevekavekaiegu. Yau wayaqigu Yaubada aivekimatana-otoqeni, kaia mesaida komi wayaqimi deqoina.

⁴ Beqa tomo'otoqa aloinedi Ieisu Nakeda kanatovemulivo ikakavekavinidi, tomoqovo wete vevine, imaimaiedi deli waineye, we veviqa bwaigina tovetumaqanavo aveledi we tupwaidiavo iwapa.

⁵ Tovelomuvo kaditogumeta wete Diu Kaniselevo matatabudi iyagovi no vonanina mwaqitana. Lubulubu igililidi ivelegu ainaqo Damasiko waineye ediavo adaveledi. We adanaqo no waineye Ieisu kanatovemulivo adalaualedi vikainina waineye, we adayoqonidi senieqa adamaiedi Ielusalema kaimatavuloqa paipaina.

⁶ “We kaiatagamwana waineye anaqonaqo kenaoye Damasiko vivineye, we vedimadimanaeqa maqeta mata'udu'udulina iobuma abamaeqa ivelauviviligu.

⁷ We abeku aobu pwayepwayeye, bonana anoqai iesipupu ivo, ‘Saulo! Saulo! Uvale Yau veviqa bwaigina kuvelevelegu?’

⁸ “Abaivila avo, ‘Aitoi komu, Tomwaya?’ “Ibaivila waigue ivo, ‘Yau, Ieisu, Tomoqo Nasaleta gumanigu veviqa kuvelevelegu.’

⁹ Kagukweyabuvo maqetanina ikiseni, we bonana yau ivonevonegu ge idanuakawananaqaia.

¹⁰ “Avelautoli avo, ‘Tomwaya, vakai aivalabubuni?’ “Tomwaya ibaivila waigue ivo, ‘Kutovoi kunaqo Damasiko waineye. No waineye tomoqo inavonemu vakai matatabuna wayaqigu kivalabubunidi.’

¹¹ “We maqeta matagu iuduli ge kagusala vakai aikisedi, beqa kagukweyabuvo dimague ikavikavina ikewagu kanaqo Damasiko.

¹² “Tamo tomoqo kanawavaqa Ananaiasi imiamia no waineye. Yaubada waineye isobwasobwanu wete naloina iemuli-vekavekaiedi. Me Diu matatabudi no waineye imiamia ivekimataneni.

¹³ We imai vivigue itovoi ivo, ‘Iagu Saulo, kukisa-vaituqana!’ We navona ivekakavai akisalagata akiseni.

¹⁴ “Matautauda Ananaiasi ivonegu ivo, ‘Tubudavo di Yaubada ivesinuemu, wayaqina komu nanuanuana kiyagovi, gunabeida kukiseni Natolituqa Maqemaqetana Ieisu wete kunoqai iesipupu waimue.

¹⁵ Beqa komu inayatomu natovesipupu vakai matatabuna kukisedi wete kunoqai kivesipupuyeni tomo'otoqa matatabudi waidie.

¹⁶ Beqa ge wete kilaugamasa. Kutovoi, aibabitaisomu. We tutuyanina Tomwaya waineye kivelaukui mukapoina inalegwayavuledi.’

¹⁷ “Matautauda avila anaqo Ielusalema waineye. We tutuyanina aelaukui Temupolo naqeneye tamo kenokisakisa akiseni.

¹⁸ Akiseni Tomwaya Ieisu iesipupu waigue ivo, ‘Tomo'otoqanidiavo dede waineye muvalea paipaigu ge inanoqai, beqa kuvedimadimana Ielusalema kukiaweni!’

¹⁹ “We abaivila avo, ‘Tomwaya, tomo'otoqa gunabeida iyagovigu paina base anaqo alugu disinagogi tamoqana tamoqana waidie kamutovetumaqanavo anigenigedi wete akakavekavinidi amaimaiedi deli waineye ayatoyatodi.

²⁰ We tutuyanina mutovesipupu Sitibeni iluvewapai yau atovotovoi waineye avo giamaina no valabubunanina paipaina. We tokainige kaditalauma aekisabodebodedi.”

²¹ “We Tomwaya ivonegu ivo, ‘Kunaqo, Yau aivetunemu kinaqo kanikie Denitali waidie.”

Paulo ivona gumanina Loma tomoqina

²² Paulo luvewana waineye iesipupu tomo'otoqa waidie navona ievaneneqeni, we tutuyanina ivonedi ivo, “Tomwaya ivetunegu anaqo Denitali waidie,” beqa kadikapoka ioqala-otoqa ieqoleqole ivo, “Kwanigei! Ge idalaubwaineni meyawaina taiauda taimiamia kwaluvewapai!”

²³ Tutuyanina iekalabwau, kaditalauma kadiveluqa ilalaukwaikwaiedi wete pwayapwaya isevalidi iveyavula ilagalaga kadikapoka iekaiveveneni Paulo waineye.

²⁴ Tolauqavia kaditoloina Lisiasi ivonedi Paulo inakewai inaluguveni divanuqa pakalina naqeneye. We inapitali wete inavelautolieni vakai paipaina me Diu kadikapoka ioqaoqala.

²⁵ Tutuyanina tolauqaviavo Paulo dimana iyoqonidi ikakava nigo idapitali, we Paulo ivesipupu kaditogumeta waineye ivo, “Komu muloina ge kibaia we Loma tomoqina kinigei kago ge inasivetonova.”

²⁶ We tutuyanina togumeta Paulo navona inoqai, inaqo Lisiasi ivoneni ivo, “Vakai kivalabubuni? Dede tomoqonina Loma tomoqina, beqa daloina waineye ge taipitali!”

²⁷ Beqa Lisiasi inaqo Paulo waineye ivelautolieni ivo, “Kuvonegu. Komu mwaqitana Loma tomoqimu?” Paulo ibaivila ivo, “Mesaida.”

²⁸ We Lisiasi ivesipupu waineye ivo, “Yau mane bwaigina Loma Gabemani aveleni beqa yau Loma kanatomo'otoqa.” Paulo ivo, “Tamagu Loma tomoqina beqa yau Loma kanatomo'otoqa.”

²⁹ Vedimadimanaeqa tolauqavianidiavo Paulo nigo idavelautolieni igololo we ivemulikina waineye'eqa. We Lisiasi wete igololo-otoqa tutuyanina iyagovi Paulo Loma tomoqina, paina Loma naloina ibaia tutuyanina natolauqaviavo ivonedi Paulo seni beqa iyoqoni.

Paulo itovoi Diu Kaniselevo matadie

³⁰ Ikawananaqai kawakawaie, Lisiasi iloinedi tovelomuvo bwaigidi wete Diu Kaniselevo matatabudi taiauda imiakauqa. Wayaqina inayagovi vakai paipaina me Diu Paulo iemwauya, beqa Paulo ikewaluguaqeteni deli waineye ikewai inaweni ivetovoia matadie.