Apositolo Divalabubuna 21 - Maiadomu

Paulo inaqo Ielusalema

¹ We Epeso tomoqovo bwaigidi waidie kalaukapoi, mulineye waga waineye kadodoqa tonotonovina katauya kanaqo Salu Kosi waineye kakeno. Kawakawaie katauya kanaqo Salu Lodisi waineye, wete no waineye'eqa katauya kanaqo Patala taoni waineye.

² No waineye tamo waga kababaneni we waganina idamadamana Ponisia Polovinisi, beqa waineye kadodoqa kanaqo.

³ We Salu Saipilosi kakiseni kamakelieqa kakiaweni, we katupa kanaqo Silia Polovinisi Taia taoni kanakawagova waineye kalugu saku kasiobuyedi.

⁴ No waineye tupwaidiavo tovetumaqanavo kababanedi taiauda kamiamia wiki tamoqana. We Vaitabu Maqemaqetana ivonedi kamukabeida mwau inasauyeni Paulo waineye Ielusalema naqeneye, beqa Paulo ivoneni ge inanaqo no waineye.

⁵ Tutuyanina dede wikinina ikakava, mulineye kima katauya. We tovetumaqanavo matatabudi memwanediavo wete natudiavo taoni ikiaweni taiauda kaobu kwadeweye, kaqema kaveketonokuyedi matatabuma kavelaukui.

⁶ Kakalanoaidi wete ikalanoaima, matautauda kadodoqa waga waineye, we ivila inaqo divanuqe.

⁷ We Taia waineye'eqa kanaqo kalekwa Tolemesi taoni. Tovetumaqanavo tupwaidiavo kababanedi kavelavulavudi, no waineye kamia kaiata tamoqana ikakava.

⁸ Ikawananaqai vikainina kakiaweni kanaqo Sisalia taoni no waineye Pilipi navanuqe taiauda kamiamia. Base Ielusalema waineye tovetumaqanavo Pilipi me'enavo kadikuma 6 ivesinuedi Yaubada nalituqa paipaina kwabukwabulavo waidie wete Pilipi tamo Valea Giamaina kanatolauguguya.

⁹ We natunavo vevinediavo pulina ge idanaqi, we tutuya puena ivovonavaqata.

¹⁰ Kaiata tupwaidiavo ikakava, we tamo tovetumaqana kanawavaqa Agabusi, gumanina Yaubada napalopita, Iudia Polovinisi waineye'eqa iobuma Sisalia taoni waineye.

¹¹ Imai waimeye, Paulo kanawakila ikewai beqa taunina kaqena wete dimana iyoqonidi. Ivesipupu ivo, “Vaitabu Maqemaqetana ivona ivo, ‘Dede wakilanina kanatomoqo kawaie mesaida me Diu inayoqoni Denitali waidie inakalaqeieni.”

¹² Tutuyanina kima wete tovetumaqanavo vonanina kanoqai, Paulo kataiqabodebodeni kavo, “Ge kinaqo Ielusalema waineye.”

¹³ We Paulo ivo, “Kwavekwada taiqa! Komi nuagu kwakakavekapoi! Paina yau alitulituqa Tomwaya Ieisu paipaina, beqa atagwanegu tomo'otoqa inayoqonigu wete inaluvewapagu Ielusalema waineye. Beqa yau ainaqo.”

¹⁴ Kima ge kamasala nanuanuana kaisivilai, beqa kavekwada kavo, “Taivelaukui mesaida Tomwaya nanuanuana inavalabubuni.”

¹⁵ Matautauda kima kavalabubuna katauya Sisaliaeqa kanaqo Ielusalema.

¹⁶ Tupwaidiavo tovetumaqana Sisalia waineye'eqa ikweyabuma taiauda ikewama kanaqo Nasoni navanuqe kamiamia. Gumanina Saipilosi tomoqina, we Ieisu waineye ivetumaqana tutuya kaniakwanina.

Paulo inaqo Iemesa iyavusi

¹⁷ Tutuyanina kalekwa Ielusalema waineye tovetumaqanavo medimwasana ivelavulavuma.

¹⁸ Ikawananaqai Paulo taiauda kanaqo Iemesa kaikiseni, wete no waineye Ielusalema tomoqovo bwaigidi matatabudi kakisedi.

¹⁹ Paulo ivelavulavudi wete ivonedi vakai matatabuna Yaubada ivalabubunidi Denitali waidie nalituqa waineye.

²⁰ Tutuyanina navona inoqai Yaubada ididigeni. Matautauda ivoneni ivo, “Iama, side waineye me Diu tausani gunabeida ivetumaqana Ieisu waineye, wete Mosese naloina ivemuli-vekavekaiedi.

²¹ We kadikapoka ioqala waimue paina valea katupoe inoqai nigodibei komu kudaekaivevena me Diu tovetumaqanavo mali vikaie imiamia waidie kudavo Mosese naloina inavedumwekaikaieni, ge Yaubada nakiakiaya bunu kanagusu natudiavo waidie inavalabubunidi, wete ge kima me Diu mabubuna tupwaidiavo inavemuliedi.

²² We kago valea inanoqai komu gunabeida kulekwa dede waineye, banikodiqa taivalabubunedi?

²³ “Kima vakai kavonemu kuvalabubuni. Tomoqovo kadikumapuli waideye, gumanidiavo ivonadabadaba Yaubada waineye.

²⁴ No tomoqovonidiavo taiauda kwainaqo Temupolo waineye giavemaqeta kanavalabubuna kwaivalabubuni Yaubada mataneye. We dimanuqa kigimwanedi dikalaqei gabugabunidi paipaidi. Matautauda tokweli kigimwanedi tomoqovonidiavo navakaudi inakwelidi inavekaivevenedi gunabeida divonadabadaba ivalabubuna-kakavai. Beqa tomo'otoqa inakiseni inayagovi komu Mosese naloina kuemulieni, wete inayagovi valea katupoenina komu paipaimu ge mwaqitana.

²⁵ “We base Denitali tovetumaqanavo paipaidi valea kagililia kavonedi dede mesaida kavo, “ ‘Kaisayanidiavo ikakalaqeiedi yaubada katupoe waineye ge kwaikanidi. Kaisaya dayaqidi ge kwaikanidi. Kaisayanidiavo tomo'otoqa igigiamakidi we dayaqidi ge idalalailoloyedi ge kwaikanidi. Ge kwainaqi kapoina kwaivalabubuni.”

²⁶ Beqa ikawananaqai kawakawaie Paulo tomoqovonidiavo kadikumapuli ikewadi taunidi igiavemaqetadi Yaubada mataneye. Matautauda Paulo ilugu Temupolo malewina waineye, we ivesipupu-luguaqeta tovelomu waidie vakai kaiata waineye giavemaqeta kanavalabubuna inavekakavai. We no tutuyanina waineye divelomu gabugabunidi inavalabubuni inavekaiveveneni divonadabadaba gunabeida ivekakavai Yaubada waineye.

Me Diu Paulo ikavikavini Temupolo kanakala naqeneye

²⁷ Paulo me'enavo kadikumapuli saiqanaqa dikaiata 7 kadigiavemaqeta kanavalabubuna inavekakavai, we me Diu tupwaidiavo imai Eisia Polovinisi waineye'eqa Paulo ikiseni Temupolo kanakala kanaveluqa naqeneye. Ieqoleqole beqa puepuedi ilaukwavina imai Paulo ikavikavini.

²⁸ We ieqoleqole ivo, “Me Isileli tomoqovo kwamai! Dede tomoqonina taikaimatavuloqi! Inaqonaqo vikai puena waidie iekaivevena katupoe me Diu paipaida, Mosese naloina wete Temupolo paipaina. We Denitali ikewadi imaiedi Temupolo kanakala kanaveluqa naqeneye we vikainina maqemaqetana ikavekapoi Yaubada mataneye!”

²⁹ Dede mesaida ivesipupuyedi paina base Paulo ikiseni taoni waineye isasasala Tolopimasi taiauda Epeso tomoqina. Beqa deqoina tutuyanina Paulo ikiseni me Diu kadikumapuli taiauda inuanuana-kapo ivo, “Tamo Tolopimusi.” Inuanuana Paulo Tolopimasi ikewai iluguveni Temupolo kanakala kanaveluqa naqeneye.

³⁰ Ielusalema waineye tomo'otoqa matatabudi inoqai Temupolo waineye ietalaqa, beqa ivedimadimana ilaukwavina inaqo no waineye. Paulo ikavikavini ibiuya iluguaqeteni Temupolo kanakala kanaveluqa malewineye, matautauda tomiagamata kala kawana isibodai.

³¹ Tutuyanina iekautovona Paulo inaluvewapai, Loma tolauqavia kaditoloina kanawavaqa Kolodiasi Lisiasi inoqai Ielusalema tomo'otoqa matatabudi ietalaqa.

³² Ivedimadimana natolauqaviavo wete ditogumetavo ikewadi ilaukwavina inaqo vikainina waineye. Tutuyanina yoko ikisedi Lisiasi wete tolauqaviavo imaimai, Paulo inigenigei ivekwada.

³³ We Lisiasi imai Paulo ivunuqi, natolauqaviavo ivonedi inayoqoni seni kailuqa beqa. Matautauda yoko ivelautoliedi ivo, “Aitoi tomoqo dede? Vakai ivalabubuni?”

³⁴ Tupwaidiavo tomo'otoqa dinuanuana tamoqanaeqa ieqole we tupwaidiavo dinuanuana sulidi sulidi beqa ieqoleqole. Iekalabwau bonadi bwaigidieqa, beqa Lisiasi ge kanasala inayagovi vakai lamuna ietalaqa, beqa natolauqaviavo ivonedi Paulo inamaieni inaluguveni tolauqaviavo divanuqa pakalina waineye.

³⁵ Tutuyanina inaweni ilekwa vanuqanina kanaluvewana waineye, yoko wayaqidi inavunuqi beqa tolauqaviavo ikavalai isilagai wayaqidi inaketoyavuya tomo'otoqa waidie'eqa.

³⁶ Yoko giladi itatalakwavina ibwaubwau wete ieqoleqole ivo, “Kwaluvewapai, kwaluvewapai!”

Paulo ivesipupu yoko waidie

³⁷ Saiqanaqa Paulo inaluguveni vanuqanina waineye, ivesipupu Lisiasi waineye Guliki bonadieqa ivo, “Yau wayaqigu aivesipupu waimue.” We Lisiasi itoalavunuqi ivo, “Komu Guliki bonadi kuyagovi?

³⁸ Yau gunuanuana nigodibei komu Itipita tomoqimu. Base 4,000 tovetalaqa kukewadi kwasauyemi pwayapwayamaiqe Loma gabemani taiauda kwavetalaqa.”

³⁹ Paulo ibaivila ivo, “Gebuka, yau Diu tomoqigu Tasisi kagutuvada, taoni vesivesinuana Silisia Polovinisi. Avelaukuiemu wayaqigu aivesipupu tomo'otoqa waidie.”

⁴⁰ We Lisiasi ivo, “Giamaina.” Paulo luvewana waineye itovoi dimana isilagai iketobodedi ivekwada matautauda ivesipupu waidie Ibeliu bonadieqa.