Apositolo Divalabubuna 20 - Maiadomu

Paulo inaqo Masidonia wete Akaia (Gilisi) Polovinisi

¹ Tutuyanina mwaunina Epeso naqeneye ikakava, Paulo tovetumaqanavo iqolekauqidi igiavepakalidi Ieisu inaemulieni tutuya puena. Ikalanowaidi matautauda itauya inaqo Masidonia waineye.

² Polovinisinina waineyemo inaqo inayavusidi taoninidiavo base waidie inaqo we no waineye tovetumaqanavo vona puedi beqa igiavepakalidi. Matautauda ilekwa Akaia waineye,

³ imia kanaketoava wetaki kaitonu ikakava. Mulineye iekautovona wayaqina wagaeqa inanaqo Silia Polovinisi waineye. We inoqai tupwaidiavo me Diu wayaqidi inanigei tauyanina waineye, paipainanina ivila Masidonia Polovinisi waineyemo inaqo kanakweyabuvo taiauda.

⁴ Tomoqovonidiavo kadiwavaqa: Sopate, Belea tomoqina, Pailusi natuna; Alisitako wete Sekenidasi, Tesalonaikaeqa imai; Gaiasi, Debi tomoqina; Tikiasa wete Tolopimusi, Eisia tomoqovo; wete Timoti.

⁵ No tomoqovonidiavo wagaeqa igumeta inaqo Tiloasi taoni waineye, we no waineye inalalaugamasa yau, Luke, wete Paulo paipaima.

⁶ We Paulo wete yau kanaqo Pilipai taoni. We tutuyanina *Beledi Tutubeabeana Ge Mekana'isiti Kanakani ikakava, mulineye Pilipai waineye wagaeqa kadodoqa kanaqo Tiloasi. Kaiata 5 ikakava mulineye kalekwa Tiloasi, we no waineye gumanidiavo ilalaugamasema kababanedi. Matatabuma Tiloasi waineye kamiana kaiata 7 ikakava.

Tiloasi waineye Paulo Iutiko wapaeqa isivetovoia

⁷ Satade lavilavie, tovetumaqanavo matatabuma kamiakauqa Tomwaya Nakani kananuavekavina kaikania. Paina kawakawaie Paulo Tiloasi inakiaweni beqa ilalauguguya waimeye inaqo lovana gamwana.

⁸ We vanuqanina kaitubwatubwana waineye kima kavelautaubama—tutudaba tupwaidiavo dibuneye, tupwaidiavo gamwaneye wete tupwaidiavo tabwaotoqineye. Tutudabanina waineye kamia-velautaubama tabwaotoqineye, we no waineye maqeta puedi ikalakalata.

⁹ Tamo tubuau kanawavaqa Iutiko imiabui vanuqa kanatalabwega waineye Paulo navesipusipupu ievaneneqeni. We Paulo iesipupu tutuya kaniakwanina, beqa Iutiko matana iduduna-kapokapo. Ikenomataiva-otoqa ibeku iobu pwayepwayeye. We talabweganina tutudaba kanavetonu waineye ibeku iobu pwayepwaye, we tutuyanina tomo'otoqa iobu isivetovoia dede gunabeida iwapa.

¹⁰ We Paulo wete iobu tubuau isobwanutaqoni iloaqavuya tomo'otoqa ivonedi ivo, “Ge kwainuanuana, tubuau meyawaina ge idawapa!”

¹¹ Matautauda Paulo ivila ilaga ilugu vanuqe, Tomwaya Nakani ikania wete kanikani ikani-velautaubama tovetumaqanavo taiauda, wete ivesipupu waidie kanaketoava vanuqa ikawananaqai. Matautauda vanuqanina ikiaweni.

¹² We tovetumaqanavo tubuaunina ikewai medimwasana inaweni navanuqe.

Paulo wagaeqa inaqo Milito

¹³ Emavo kakiawedi. Paulo ivonema kadodoqa kagumeta kanaqo Asosi taoni waineye Paulo kalalaugamaseni ikekenodaba kaqenaeqa imaimai.

¹⁴ Tutuyanina imai ibabanema Asosi waineye matatabuma kadodoqa wagaeqa kanaqo Mitilini taoni.

¹⁵ Kakeno ikawananaqai Mitilinieqa kanaqo Salu Kaiosi doleyenemo kayoqovaqata kanaqo wete kaiata tamoqana ikakava kalekwa Salu Samosi waineye we kawakawaie kanaqo kalekwa Milito taoni.

¹⁶ Paulo iedimadimana wayaqina naqai inalekwa Ielusalema mulineye Penitikosi Kanakani kanakaiata inababaneni. Paipainanina ge wayaqina inamiamia Eisia Polovinisi waineye, beqa ge kadalugu Epeso waineye.

Paulo Epeso tomoqovo bwaigidi ikalanoaidi

¹⁷ Tutuyanina kalekwa Milito taoni, Paulo valea ivetuneni Epeso tomoqovo bwaigidi inamai taiauda inavesipupu.

¹⁸ Tutuyanina tomoqovonidiavo ilekwa, Paulo ivonedi ivo, “Tutuya gumegumetana alekwa Eisia Polovinisi waineye inaqo kanaketoava deqoina, komi gunabeida gumiana kwayagovi tutuya puena taiauda tamiamia.

¹⁹ We komi gunabeida kwayagovi me Diu tupwaidiavo inuanuana yau kagukainige paipaina, wete mwau bwaigina ivelegu. We yau anuaobu we alituqa Tomwaya paipaina, we tupwaidiavo tutuya ataitaiqa lituqanidiavo paipaidi.

²⁰ Komi gunabeida kwayagovi Yaubada navona alalauguguyeni waimie, we ge tamo vona giamaidi kabakaivaisa adavaigavuyedi waimie. Yau alalauguguya tomo'otoqa matadie wete aekaivevena komi mivanuqe.

²¹ We vona veluvelulunidi beqa me Diu wete Denitali avonedi. Avonedi dikapoinaeqa inanuavila inamai Yaubada waineye, wete inavetumaqana Tomwaya Ieisu waineye.

²² “We vona dede kwavevaneneqeni. Yaubada Vaitabuna ivonegu ainaqo Ielusalema, beqa yau anaqonaqo. We ge adayagovi no waineye vakai inasauyeni waigue,

²³ we taoni tamoqana tamoqana waidie anaqonaqo, Vaitabu Maqemaqetana ivonevonegu no kawaie inayatogu deli waineye, wete mwau bwaigidi inavelegu Ielusalema waineye.

²⁴ We kago inaluvewapagu ge saku bwaigina gunuanuana waineye. We saku bwaigiotoqina Tomwaya Ieisu nalituqa ivelegu aivalabubuni aivekakavai. Lituqanina tomo'otoqa aivonedi Valeana Giamaina Yaubada navenua'ina'inaqe waideye paipaina.

²⁵ “Dede mesaida. Tutuya puedi matamie Yaubada Nakabaloina paipaina alalauguguya waimie, we ayagovi kawaie ge wete maiqigu kwaikiseni.

^26-27 Yau ge tamo Yaubada navona adavaigavuyedi komi waimie tomo'otoqa kadiketoyavu paipaina, beqa deqoina avona-veluveluluna waimie, kago aitoi vonanina ge inavetumaqaneni ge kanasala yawaina vaqata inababaneni, we yau ge gukapoina.

²⁸ “Komi tomoqovo bwaigimi taunimi kwavekisabodebodemi, wete tovetumaqanavo gumanidiavo Vaitabu Maqemaqetana imaiedi mivekisabodaboda naqeneye. Kwavekisabodebodedi mesaida sipi kaditovekisabodaboda nasipivo iekisabodebodedi. Gumanidiavo Yaubada natomo'otoqavo, natuna dayaqina beqa itakonadi.

²⁹ Ayagovi no kawaie aikiawemi, we tolauguguya katupoe inamai waimie tomo'otoqa divetumaqana inakavekapoidi, mesaida koukou walawalakai inamai sipi inaovadi.

³⁰ We taunimi miyoko waineye'eqa tupwaidiavo tomo'otoqa vekaivevena katupoe'eqa tovetumaqanavo inakatupwaiedi, we divekaivevena kapoidi inavemuliedi.

³¹ Beqa taunimi kwavekisabodebodemi vekaivevena katupoe waidie'eqa! We kwanuapwatedi banikodiqa yau aekaivevena Yaubada valeana diqaba kaitonu naqedie, kaiata, lovana wete tutuya puedi ge adaekwada memataqeugu aloloina-pakalemi.

³² “Beqa deqoina akiakiawemi we akakalaqeiemi Yaubada waineye inavekisabodebodemi wete navenua'ina'inaqe valeana inavelauvivilimi. Valeanina kanasala mivetumaqana inagiaveluvelulunidi, wete Yaubada navonavenapwayewa giamaina inavelemi vonavenapwayewanidiavo ivonadabedabedi taunina natomo'otoqavo inaveledi.

³³ “We yau ge tamo aitoi namane o kanatalauma adanua-vaigavuyedi kadikewa paipaina.

³⁴ Gunabeida kwayagovigu yau wete egwavo taiauda ge kalaqeieqa kadakanikani, taunima dimamaeqa kalitulituqa mane kakewakewai beqa kama wete masakuvo kagimwagimwanedi.

³⁵ Dede mesaida, tutuya matatabuna avevevemi tadalituqa-veluveluluna mane tadakewadi tomo'otoqa laulauyogudi tadakaivaisedi. Tomwaya Ieisu navona, kwanuapwateni ivo, ‘Kago tamo saku taikewai taimwasana, we kago saku taikalaqeieni taimwasana-otoqa.”

³⁶ Tutuyanina Paulo navona ikakava, matautauda tutuqana iveketonokuyedi enavo taiauda ivelaukui.

^37-38 Nuadi ikapo-otoqa navona paipaina paina ivonedi ge wete inakisekiseni. Beqa ivekalataiqa wete iloaqavuya iyaoqi. Matautauda matatabuma kanaqo wageye kima kadodoqa.