Apositolo Divalabubuna 2 - Maiadomu

Vaitabu Maqemaqetana imai Ieisu kanatovemulivo iveadaqidi

¹ We Penitikosi kanakaiata waineye, tovetumaqanavo matatabudi imimiakauqa tamo vikai waineye.

² Vesalawapaeqa tamo butu inoqai abame'eqa iobuma, kananoqaya mesaida yaqina veluvelulunina inununuqa. Butunanina vanuqa naqena matatabuna iveadaqi waineye iekalamia.

³ Matautauda mesaida kai yabeyabelidi siaidi ikisedi ilausimatala. We kai yabeyabelanidiavo isapayavula inaqo tovetumaqanavo tamoqana tamoqana kunukunudie itoa.

⁴ Matautauda Vaitabu Maqemaqetana matatabudi iveadaqidi, beqa bonana sulina sulina waidie'eqa ivelamu iesipupu, bonananidiavo base ge idayagovidi.

⁵ No kaiatanina waineye, ulatau puedi Ielusalema iekalamia gumanidiavo me Diu Yaubada kanatovekimatana imai kabaloina tamoqana tamoqana waidie'eqa. Imai Temupolowaineye sobwanu paipaina.

⁶ Tutuyanina butunina inoqai, ulataunidiavo iyoko inaqo no vanuqanina waineye tovetumaqanavo imiamia, we tamoqana tamoqana bonadi inoqai paipainanina nuadi ivilele.

⁷ We nuadi ivilele-otoqa taunidi waidie iesipupu ivo, “Kwavevaneneqa. No tomo'otoqanidiavo matatabudi iesipupu Galilieqa imai.

⁸ Beqa banikodiqa tainoqayedi matatabuda kida bonadaeqa iesipupu?

⁹ Kida matatabuda tamai Polovinisi sulidi sulidi waidie'eqa tupwaidavo tamai Patia, Media, Elama waidie'eqa. We tupwaidavo Mesopotemia naqeneye tamai, Iudia, Kapadosia, Ponitisi wete Eisia,

¹⁰ Piligia we Pamupilia, Itipita wete Libia navikai Sailini vivineye waineye'eqa. We tupwaidavo tamai Lomaeqa,

¹¹ me Diu wete Denitali we bunudi igusudi me Diu disobwanu iemulieni. Tupwaidavo tamai Kiliti wete Aleibia, we taunida bonada kida matatabuda tanoqai gumanidiavo iesipupu Yaubada saku bwaigidi ivalabubunidi paipaidi!”

¹² We ulatau matatabudi nuadi ivilele we ge idanuakawananaqaia, tamoqana tamoqana ediavo ivelautoliedi ivo, “Vakai kananuakawananaqai?”

¹³ We tupwaidiavo inamaqa tovetumaqanavo waidie ivo, “Gumanidiavo bwasi veluvelulunina iyemu, beqa dede mesaida iesipupuyedi.”

Pita ilauguguya tomo'otoqa waidie

¹⁴ Matautauda Pita itovoi apositolovo kadikuma 11 taiauda, we bonana bwaiginaeqa yoko ivonedi ivo, “Egwavo me Diu wete komi Ielusalema waineye kwaekalamia, guvona kwavevaneneqa-vekavekaieni, we kananuakawananaqai aivonemi.

¹⁵ Kima ge bwasi veluvelulunina kadayemu, mesaida kwaenuana. Pai dede 9 koloki kawakawai, we tomo'otoqa ge idayemu dede tutuyanina waineye.

¹⁶ Gebuka, dede isauyeni mesaida base tutuyanina Yaubada napalopita Dioeli ivesipupu paipaina no tutuyanina ivo,

¹⁷ “Yaubada ivo, ‘Kaiata kabavekakava waineye, Vaitabugu aivetuneni tomo'otoqa matatabudi waidie. Matautauda natumiavo inavonavaqata. Mitubuauvo kisanidiavo inakisedi Yau waigue'eqa, we tomwatomwayavo kenokisakisa inakekenokisekisedi Yau waigue'eqa.

¹⁸ No tutuyanina Vaitabugu aikata'iwaqi gutolituqavo, tomoqovo wete vevine waidie, beqa inavonavaqata.

¹⁹ We kiakiaya kabanuavilele aivalabubunidi abame, wete kiakiaya aivevemi pwayapwaya tabwaneye. No waineye dayaqa wete kai wete lupwa badubaduna pwayapwaya tabwaneye.

²⁰ Naqai valavala inavaitomai, we wetaki inayamota mesaida dayaqa, we matautauda kaiatanina bwaigiotoqina inamai Yau, Tomwaya, gukaiata aimai.

²¹ Matautauda aitoi gumanina Tomwaya ivetumaqaneni inaketoyavuya.”

²² Matautauda Pita ivesipupu-vaituqana ivo, “Me Isileli, guvona kwavevaneneqeni Ieisu tomoqo Nasaleta paipaina. Gunabeida kwayagovi Yaubada veluluna iveleni beqa kabanuavilele wete kiakiaya puedi ivalabubunidi matamie we ivekaiveveneni kanamwaqitana imai Yaubada waineye'eqa.

²³ Basenaqaida Yaubada inuanuana Ieisu paipaina we iyagovi vakai inasauyeni pwayepwayeye. Komi kwaketoqiluveni we miloinaeqa tokapoina itutupwateni laukenobalabala waineye iluvewapai.

²⁴ We Yaubada Ieisu wapa kanaveviqa waineye'eqa iketoyavuya we isivetovoi-vaituqani wapaeqa, paina wapa naveluluna ge kanasala inakavikavini.

²⁵ Base tutuyanina igililia Mesaia paipaina Kini Deibida dede mesaida ivesipupuyeni, “ ‘Yau Tomwaya akiseni tutuya puena vivigue. Gumanina vivigue beqa ge kanasala kaguqaviavo aigololoyedi.

²⁶ Beqa Yau amwasana bwaigiotoqina wete akewa megumwasana, we avetumaqana komu vovogu kivekisabodebodeni.

²⁷ Yaubada, towapa divikai waineye komu ge kikiawegu. Komu Mesaia vovona ge kitagwaneni inapwasa ovu waineye.

²⁸ Komu gunabeida kuvevegu Yau aitovoi-vaituqana wapaeqa. Yaubada komu vivigue beqa Yau amwasana.”

²⁹ Matautauda Pita ivesipupu-vaituqana ivo, “Egwavo, mwaqitana Yau kanasala aivonemi tubuda Kini Deibida iwapa, tomo'otoqa itavuni wete kanaovu kasiotoqa giladi imiamia.

³⁰ Beqa tayagovi no gililinina waineye ge idaesipupu taunina paipaina. We gumanina palopita, we iyagovi Yaubada vonadabadaba veluveluluninaeqa mwaqitana ivonadabadaba ivo, ‘Yau tamo tubuleleleqimu aisilagai gutomo'otoqa inaloinedi mesaida komu kaisemu kuloinedi.’

³¹ Deibida iyagovi vakai kawaie Yaubada inavalabubuni beqa tutuyanina ivesipupu, “ ‘Yaubada ge idakiaweni towapa divikai waineye, o vovona ge idatagwaneni inapwasa,’ gumanina iesipupu Mesaia inatovoi-vaituqana wapaeqa.

³² “Yaubada dede tomoqo Ieisu isivetovoia, we kima matatabuma matamaeqa kakiseni itovoi-vaituqana.

³³ Yaubada imaseagai ilagaveni ivemiabuia kataqineye vikai vekivekimatanina waineye, wete Vaitabu Maqemaqetana iveleni basenaqaida mesaida ivonadabadaba waineye. Vaitabunina Ieisu ikata'iwaqi kima waimeye, mesaida deqoina kwakisekiseni we kwanoqanoqai.

³⁴ Deibida kaisena ge idalaga abame, beqa ge idaesipupu taunina paipaina tutuyanina ivo, “ ‘Iave ivona gu Tomwaya waineye, “Kumiabui kataqigue vikai vekivekimatanina waineye,

³⁵ kanaketoava kamutalavualavo aivelulunapeledi we aiyatodi muloina matakwanineye.”

³⁶ Pita ivesipupu-vaituqana ulatau wete me Diu iekalamia Ielusalema waineye ivo, “Komi me Isileli matatabumi, kwayagovi mwaqitana gumanina Ieisu kwatutupwateni, Yaubada isilagai gumanina Tomwaya wete Mesaia.”

³⁷ Tutuyanina tomo'otoqa Pita navona inoqai, nuapoudi imwalaqidi. Beqa gumanidiavo Pita wete tupwaidiavo apositolovo waidie ivelautoli ivo, “Emavo, banikodiqa kaivalabubunedi beqa Yaubada inanuataqonima?”

³⁸ Pita ibaivila ivo, “Tamoqana tamoqana kwainuavila we kima kaibabitaisomi Ieisu Keliso kanawavaqaeqa inavekiakiaya Yaubada mikapoina inuataqonidi, we Yaubada Vaitabu Maqemaqetana inavelemi navenapwayewa.

³⁹ Dede venapwayewanina komi paipaimi, tubuleleleqimiavo paipaidi wete tomo'otoqanidiavo matatabudi kanikie—gumanidiavo Tomwaya da Yaubada inaqoledi inamai waineye.”

⁴⁰ Pita vona puedi ivesipupuyedi tomo'otoqa waidie we iloinedi inanuavila. Ivo, “Komi kwaivelaukui Yaubada waineye inaketoyavumi beqa ge inakaimatavuloqimi tutuyanina tomo'otoqa kapoidi inakaimatavuloqidi.”

⁴¹ Matautauda tomo'otoqanidiavo Pita navona ivetumaqaneni ibabitaisodi, beqa no kaiatanina tomo'otoqa 3,000 imai Ieisu kanatovemulivo kadiyoko waineye iluvetaubama.

Tovetumaqanavo imia-velautaubama

⁴² Tutuya puena tovetumaqanavo apositolovo divekaivevena ievaneneqeni, imimiakauqa, ikanikani-velautaubama we Tomwaya Nakani ikanikania wete ielaukui-velautaubama.

⁴³ We apositolovo kabanuavilele wete kiakiaya puedi ivalabubunidi, beqa tomo'otoqa puedi Ielusalema naqeneye Yaubada ivekimatana-otoqeni.

⁴⁴ We tovetumaqanavo matatabudi imimiakauqa tamo vikai waineye, we disakuvo matatabudi isenadi ediavo taiauda.

⁴⁵ Tupwaidiavo tutuya dipwayapwaya wete disakuvo ivegimwaneyedi we manenidiavo iveledi tomo'otoqanidiavo diyoko naqeneye ikokokoila.

⁴⁶ We kaiata puena Temupolo waineye imimiakauqa we ikakani-velautaubama divanuqavo waidie. Kadi isenadi tamoqana tamoqana waidie medimwasana wete divenapwayewa lagalagaotoqidi.

⁴⁷ Tutuya puena tovetumaqanavo Yaubada idididigeni we tomo'otoqa matatabudi Ielusalema waineye ivekimatanedi. Kaiata matatabuna Tomwaya tomo'otoqa puedi iketoyavudi, we imaiedi tovetumaqanavo kadiyoko waineye.