Apositolo Divalabubuna 19 - Maiadomu

Paulo inaqo Epeso

¹ Tutuyanina Apolosa imiamia Kolinita taoni waineye, Paulo Galetia wete Piligia Polovinisi gamwadiemo itauya inaqo ilekwa Epeso taoni waineye. No waineye tupwaidiavo tovetumaqanavo ibabanedi,

² ivelautoliedi ivo, “Tutuyanina kwavetumaqana Ieisu waineye Vaitabu Maqemaqetana iveadaqimi o gebuka?” Matautauda ibaivila ivo, “Vaitabu Maqemaqetana vakai? Kima ge kadayagovi paipaina.”

³ Beqa Paulo ivelautoliedi ivo, “No tutuyanina kwababitaiso aitoi navekaivevena kwavetumaqaneni?” Ibaivila ivo, “Ioni Tobabitaiso navekaivevena waineye kavetumaqana.”

⁴ Paulo ivesipupu waidie ivo, “Ioni tomo'otoqa ibabitaisodi dinuavila kanakiakiaya dikapoina waidie'eqa. We ivonedi inavetumaqana gumanina mulineye imaimai, Ieisu.”

⁵ Tutuyanina Paulo navona inoqai, tovetumaqananidiavo ibabitaisodi Tomwaya Ieisu kanawavaqaeqa.

⁶ Matautauda Paulo dimana iyatodi kunukunudie Vaitabu Maqemaqetana iveadaqidi, we ivelamu bonana sulina sulina beqa ivesipupu wete ivonavaqata.

⁷ We tovetumaqananidiavo kadiyoko 12.

⁸ Tutuya puena wetaki kaitonu naqedie Paulo inaqonaqo sinagogi waineye menanuavatu iesipupu me Diu waidie. Taiauda iekawavonavona wayaqina Yaubada nakeda kaivauna natomo'otoqa kadiloina paipaina inayagovi inavetumaqana.

⁹ We tupwaidiavo nuapoudi ipakalidi beqa Yaubada valeana ge idavetumaqaneni, we vona kapoidi iesipupuyedi tomo'otoqa waidie Ieisu Nakeda paipaina. Beqa no lamunina Paulo ikiawedi. Tovetumaqanavo ikewadi taiauda inaqo Telanasi navanuqa sikulu waineye. We kaiata tamoqana tamoqana iesipusipupu Yaubada nakeda kaivauna natomo'otoqavo kadiloina paipaina.

¹⁰ Paulo dede mesaida ivavalabubunedi diqaba kailuqa naqedie, beqa me Diu wete Denitali matatabudi imiamia Eisia Polovinisi naqeneye Tomwaya Ieisu valeana inoqai.

¹¹ We Yaubada navelulunaeqa Paulo kabanuavilele bwaigidi ivavalabubunidi,

¹² beqa tupwaidiavo tutuya Paulo kaleko siaina o kaleko kabalituqa inakavikavinidi tomo'otoqa inakewai inanaweni toviqa waidie beqa inakavegiagiamaidi wete vaitabu kapoidi inasauyedi.

Sikiva natunavo wayaqidi vaitabu kapoidi inaveuqeuqedi

¹³ We tupwaidiavo me Diu gumanidiavo inaqonaqo vikai tamoqana tamoqana waidie vaitabu kapoidi ieuqeuqedi we wete iekautovona Tomwaya Ieisu kanawavaqaeqa vaitabu kapoidi tomo'otoqa waidie'eqa ieuqeuqedi ivesipupu waidie ivo, “Aloinemu Ieisu kanawavaqaeqa, gumanina Paulo ilalauguguyeni beqa kusauyemu tomoqonina waineye.”

¹⁴ Tamo Diu tovelomu bwaigina kanawavaqa Sikiva natunavo kadikuma 7 gumanidiavo wete dede mesaida ivavalabubunedi iekautovona vaitabu kapoidi inakwavinedi inasauyedi tomo'otoqa waidie.

¹⁵ Tamo kaiata vaitabu kapoina iloineni inasauyeni tamo tomoqo waineye'eqa, we vaitabu kapoina ivesipupu waidie ivo, “Ieisu wete Paulo ayagovidi, we komi ge adayagovimi—meqavoi?”

¹⁶ Matautauda tomoqonina vaitabu kapoina iekuniqeni isoumo waidie diveluluna ikakava we kadikuma 7 ge idayavadi itutu-palapalaladi kadikaleko itutulabulabukidi medayaqidi kayagwenegwenedi vanuqa waineye isauyedi ideqa.

¹⁷ Tutuyanina me Diu wete Denitali Epeso waineye imiamia valeanina inoqai, igololo-otoqa beqa Tomwaya Ieisu kanawavaqa ivekimatana-otoqeni.

¹⁸ Tovetumaqanavo kaivaudi puedi inaqo ediavo matadie dikapoina ivesipupu-luguaqetedi.

¹⁹ We gumanidiavo iebalau dibukivo imaiedi maleweye tomo'otoqa matadie iboudi itunudi. We kago bukinidiavo idavegimwaneyedi kaditutula mesaida 50,000 seluba.

²⁰ We dede valabubunanina isauyeni veluvelulunina beqa Tomwaya Ieisu valeana isapayavula inaqo vikainina matatabuna waineye we tomo'otoqa pueotoqidi ivetumaqaneni.

²¹ Dede valabubunanidiavo ikakava matautauda Paulo inuanuana wayaqina inanaqo Masidonia Polovinisi wete Akaia Polovinisi waidie'eqa inanaqo Ielusalema. Tovetumaqanavo waidie ivesipupu ivo, “Egwavo, naqaida ainaqo Ielusalema, mulineye ainaqo Loma.”

²² Beqa kanatokaivaisavo Timoti wete Elasitasi ivetunedi igumeta inaqo Masidonia, we taunina Eisia Polovinisi waineye imiamia tutuya kalakusana matautauda inanaqo.

Mwau bwaigina isauyeni Epeso waineye

²³ Tutuyanina waineye tomo'otoqa puedi Epeso naqeneye ivetumaqana Ieisu waineye, paipainanina tupwaidiavo tomo'otoqa kadikapoka ioqala waidie.

²⁴ Vesipupunina dede mesaida. Epeso waineye tamo yaubada katupoe vavinena kadiwavaqa Atemisi tomo'otoqa isobwasobwanu waidie beqa kaditosobwanuvo vanuqa kabasobwanu bwaigina iyoqoni paipaidi. We tamo tomoqo kanawavaqa Demitiliasi seluba beqa vanuqa siaidi ivalabubunidi kadikisa mesaida divanuqa kabasobwanu. We tomo'otoqa igimwagimwanedi beqa Demitiliasi menatolituqavo mane bwaigina ikewakewai.

²⁵ Tomo'otoqa puedi Atemisi ivedumwekaikaiedi we Ieisu ivetumaqaneni, beqa Demitiliasi natolituqavo matatabudi iqolekauqidi wete gumanidiavo lituqanina mesaida ilitulituqi taiauda ivonedi ivo, “Tomoqovo, kwayagovi dede lituqanina waineye mane bwaigina takewakewai.

²⁶ We Paulo navalabubuna gunabeida kwakiseni wete kwanoqai ivonavona Atemisi wete dayaubadavo ge yaubadaotoqa paina tomo'otoqa dimadaeqa tavalabubunidi! Dede Epeso waineye wete Eisia Polovinisi kanamatatabu saiqana naqeneye tomo'otoqa puedi Paulo navona ikawamwaqitaneni.

²⁷ We yau avenuapousakala inanaqonaqo dalituqa inakavekapoi, beqa mane tabababaneni inavekwada. Wete dayaubada Atemisi paipaidi avenuapousakala we gunabeida me Eisia wete tomiapwayapwaya matatabudi idididigedi kago mesaida diveluluna inamwea wete divanuqa kabasobwanu inavesaku-maimaiqa.”

²⁸ Tutuyanina seluba kanatolituqavo Demitiliasi navona inoqai kadikapoka ioqala-otoqa ivelamu ieqoleqole ivo, “Kida me Epeso dayaubada Atemisi kanawavaqa bwaigina!”

²⁹ Beqa taoni naqeneye tomo'otoqa matatabudi inoqai wete ieqoleqole we diveqoleqolenina ge mekananuakawananaqai. Matautauda yoko matatabudi inaqo Paulo kanakweyabuvo Gaiasi wete Alisitako ikavikavinidi, gumanidiavo me Masidonia, ibiudi inawedi taoni vanuqa kabamiakauqa waineye.

³⁰ Paulo wayaqina inanaqo yoko matadie inavesipupu, we tovetumaqanavo ge idatagwaneni mesaida inavalabubunedi.

³¹ We Eisia Polovinisi kanatogumetavo, gumanidiavo Paulo enavo, valea ivetuneni ivona-veluveluluna waineye ge inanaqo taoni kabamiakauqa waineye.

³² Kabamiakauqa naqeneye yoko matatabudi nuadi iqau. Tupwaidiavo tomo'otoqa ieqoleqole saku tamoqana paipaina, we tupwaidiavo ieqoleqole saku sulidi sulidi paipaidi. We tomo'otoqa puedi ge idayagovi vakai lamuna inaqo no waineye.

³³ Me Diu ibibipeleni tamo tomoqo kanawavaqa Alekisenida tomo'otoqa matadie, we tupwaidiavo tomo'otoqa yoko gamwadie iveqole waineye wayaqidi idavesipupu. Taunina dimanaeqa ikatuava wayaqina puepuedi inavekwada beqa kanasala yoko inavonedi dede kapoinanina me Diu ge idavelamuya.

³⁴ Tutuyanina yoko ikiseni gumanina Diu tomoqina beqa ieqoleqole mesaida kawasasa kailuqa waidie ivesipupu ivo, “Kida me Epeso dayaubada Atemisi kanawavaqa bwaigina!”

³⁵ We tamo taoni kanatogumeta yoko igiavekwadadi waidie ivesipupu ivo, “Me Epeso, tomo'otoqa pwayapwaya matatabuna waineye iyagovi kida tokisavekavina dayaubada bwaigina Atemisi divanuqa kabasobwanu wete gileu kadikiakiaya abame'eqa ibeku iobuma!

³⁶ Matatabuda tayagovi dede mwaqitana, beqa lamunanina komi kanasala kwavekwada ge tamo vakai giaveqau kwaivalabubuni.

³⁷ Komi dede tomoqovo kwakewadi kwamaiedi dede waineye, we ge tamo vakai idavainaqoi vanuqa kabasobwanu waineye wete ge idavona-kapo dayaubada vavinena paipaina.

³⁸ Kago Demitiliasi wete natolituqavo taiauda tamo tomoqo inavemwauya kanasala inanaqo vanuqa kabasivetonova waineye toloina matadie inasivetonova.

³⁹ “We kago tamo nuanua paipaina kwaibwadubwadu, taoni kanatogumetavo dimiakauqa waineye mibwaduvo kwaivesipupuyedi inasivetonovidi.

⁴⁰ Yau gunabeida agololo vakai kasiotoqa kwavalabubuni paipaina. Kasiotoqa kwadaba, paipainanina oge Loma gabemani kaimatavuloqa mwauna inaveleda. We kida banikodiqa taivesipupuyedi paina midaba ge melamuna.”

⁴¹ Dede mesaida ivesipupuyedi mulineye tomo'otoqa vanuqa kabamiakauqa waineye'eqa ivetuneluguaqetedi inaqo.