Apositolo Divalabubuna 18 - Maiadomu

Paulo inaqo Kolinita waineye tomo'otoqa inavonedi Ieisu paipaina

¹ Paulo Alopaga waidie ivesipupu ikakava matautauda Atenisi ikiaweni inaqo Kolinita taoni waineye.

² No waineye Diu tomoqina ibabaneni kanawavaqa Akwila, Ponitio taoni kanatuvadeye. Sisa Kolodiasi me Diu ivonedi Loma taoni inakiaweni, we Akwila memwanena Pilisila bakamidiqa imai Lomaeqa Itali Polovinisi waineye.

³ Paulo inaqo divanuqe imiamia taiauda ilitulituqa. Dilituqa kaisaya bunudi iyaqiyaqilidi ukweta paipaidi we iegimwaneyedi. We base lituqanina Paulo nalituqa.

⁴ Kaiata Kabaveyawai tamoqana tamoqana waidie Paulo me Diu wete me  Guliki taiauda iekawavonavona sinagogi waineye inawewesedi Ieisu valeana inavetumaqaneni.

⁵ Tutuyanina Sailasa wete Timoti iobuma Kolinita waineye Masidonia Polovinisi waineye'eqa, Paulo ivekwada ukweta kanavalabubuna we tutuya puena Yaubada valeana ilalauguguyeni me Diu waidie ivo, “Ieisu gumanina Mesaia.”

⁶ We tutuyanina me Diu Paulo ivedumwekaikaieni we ivona-kapoyeni, kanakaleko kaupualidi ilauvutuvutuqidi ivonedi ivo, “Kago Yaubada inakaimatavuloqimi taunimiqa, we yau ge kwaivemwaugu! Kaiana, deqoina aikiawemi ainaqo Denitali waidie Yaubada valeana ailauguguyeni!”

⁷ Beqa Paulo sinagogi ikiaweni inaqo tamo tomoqo kanawavaqa Taito Dasitusi navanuqe. No tomoqonina Denitali wete Yaubada kanatosobwanu. Navanuqa sinagogi vilaneye.

⁸ Sinagogi kanatogumeta kanawavaqa Kilisipa, we tomo'otoqa matatabudi navanuqe Tomwaya Ieisu waineye ivetumaqana. Wete tomo'otoqa puedi Kolinita waineye Ieisu valeana inoqai ivetumaqana we ibabitaisodi.

⁹ Tamo lovana waineye Tomwaya kenokisakisaeqa ivesipupu Paulo waineye ivo, “Ge kigololo! Kaia kiesipupu Yau paipaigu tomo'otoqa waidie we ge kivekwada!

¹⁰ Yau komu taiauda aikaivaisemu beqa ge tamo aitoi inanigemu wete inakavekapoimu, paina tomo'otoqa puedi dede taoninina waineye Yau gutomo'otoqavo.”

¹¹ Beqa Paulo imiamia Kolinita waineye diqaba tamoqana wete wetaki 6 naqedie, Yaubada valeana iekaiveveneni tomo'otoqa waidie Ieisu paipaina.

¹² Tutuyanina Galio natutuya Gabemani Akaia Polovinisi waineye, tupwaidiavo me Diu dinuanuana tamoqanaeqa itovoi inaqo Paulo ikavekavini inaweni togumetanina bwaigina waineye inasivetonova.

¹³ Ivemwauya ivo, “Dede tomoqonina matomo'otoqavo iwewewesedi kedakeda kaivauna Yaubada kanasobwanu paipaina kaivemulieni we kima maloina ibaibaidi.”

¹⁴ Tutuyanina Paulo nigo idavesipupu, Galio ivesipupu me Diu waidie ivo, “Kago komi me Diu dede tomoqonina kwaivemwauya kapoina bwaigina kanavalabubuna paipaina Loma naloina waineye'eqa, yau kanasala mivona aivevaneneqedi.

¹⁵ We komi kaia vona wete wavaqa me Diu taunimi miloina paipaina kwaekawadibidibi, beqa komi taunimi kwaisivetonovi. Yau abaila dede sakunidiavo ge kaditoloina.”

¹⁶ Matautauda Galio me Diu ivetuneluguaqetedi vanuqa kabasivetonova kanavikaie.

¹⁷ Isauyedi we Sosideni sinagogi kanatogumeta ivunuqi, we inigei vanuqa kabasivetonova mataneye. We Galio ikisedi divalabubunanina paipaidi ge idanuanuana.

Paulo ivila inaqo Anitioki taoni Silia Polovinisi waineye

¹⁸ Kaiata puedi naqedie Paulo imiamia Kolinitia tovetumaqanavo taiauda. Matautauda ikiawedi inaqo Senikilia taoni waineye Pilisila wete Akwila taiauda. No waineye Paulo navakauna igusuya paina base vonadabadaba ivalabubuni Yaubada waineye. Matautauda Paulo, Akwila wete Pilisila idodoqa waga waineye itupa paina wayaqidi inanaqo Silia Polovinisi waineye.

¹⁹ Tutuyanina ilekwa Epeso taoni waineye, Paulo Pilisila wete Akwila ikiawedi. We Paulo kaisena inaqo sinagogi waineye me Diu taiauda ivekawavonavona.

²⁰ Me Diu Paulo ivelaukuieni wayaqidi saiqana inayoqomia, we Paulo ibaila.

²¹ Tutuyanina itautauya ivonedi ivo, “Kago Yaubada inatagwanegu wete aivila-vaituqana aimai.” Matautauda idodoqa waga waineye Epeso ikiaweni itupa inaqo.

²² We tutuyanina ilekwa Sisalia taoni waineye itauya ilaga Ielusalema tovetumaqanavo ikisedi. Kaiata tupwaidiavo ikakava matautauda iobu inaqo Anitioki Silia Polovinisi waineye.

²³ Anitioki waineye Paulo tovetumaqanavo taiauda imiamia tutuya kalakusana matautauda ikiawedi inaqo taoni tamoqana tamoqana waidie, Piligia Polovinisi wete Galetia Polovinisi kadimatatabu naqedie tovetumaqanavo igiavepakalidi.

Apolosa Yaubada Valeana ilauguguyeni Epeso waineye

²⁴ Tutuyanina waineye tamo Diu tomoqonina kanawavaqa Apolosa nataoni Alekisanidilia Itipita naqeneye, imai Epeso imiamia. We gumanina tovesipupu giamaina wete tonuauya Yaubada Nabuki inuakawananaqai-otoqidi.

²⁵ Tutuyanina Apolosa imiamia Itipita naqeneye, tupwaidiavo tomo'otoqa gumanina Tomwaya Nakeda iveveni. Menaveluluna wete menamwasana iesipupu Ieisu paipaina wete iekaivevena tonotonova tomo'otoqa waidie, we kaia Ioni nababitaiso kaisena iyagovi.

²⁶ Beqa ivelamu sinagogi waineye menanuavatu iesipupu. Tutuyanina Pilisila wete Akwila navona inoqai beqa Apolosa imaseagai inaweni divanuqe vakai matatabuna Ieisu Nakeda paipaina igiavemaqeta-vekavekaidi waineye.

²⁷ No tutuyanina waineye Apolosa wayaqina inanaqo Akaia Polovinisi waineye inalauguguya, beqa tovetumaqanavo Epeso waineye igiavepakali we lubulubu igililia kanakawagiagiamai paipaina Akaia tovetumaqanavo waidie, Apolosa kanakisavekavina paipaina. Base puedi me Akaia Yaubada navenua'ina'inaqe'eqa ivetumaqana Ieisu waineye. Tutuyanina Apolosa ilekwa, tomo'otoqanidiavo ibabanedi beqa nalauguguyaeqa divetumaqana iveluluna.

²⁸ Beqa vekawavonavonaeqa me Diu ivelulunapeledi yoko matadie kabamiakauqa waineye. Ivesipupu Yaubada Navonaeqa inakawamwaqitana Ieisu gumanina Mesaia.