Apositolo Divalabubuna 17 - Maiadomu

Paulo wete Sailasa Ieisu valeana ilauguguyeni Tesalonaika waineye

¹ Paulo wete Sailasa Pilipaieqa itauya inaqo taoni kailuqa, Amipipoli wete Apolonia, waidie'eqa inaqo mulineye ilekwa Tesalonaika taoni waineye. We no taoninina waineye tamo sinagogi.

² Paulo navalabubuna dede mesaida tutuyanina inalekwa tamo taoni waineye inanaqo sinagogi waineye we Yaubada navona iesipupuyedi tomo'otoqa taiauda. Dede mesaida ivavalabubunedi Kaiata Kabaveyawai kaitonu waidie.

³ We igigiavemaqetadi wete ivevedi Mesaia paipaina ilaubwaineni veviqa ibabaneni, we mulineye itovoi-vaituqana wapaeqa. We Paulo ivonedi ivo, “Tomoqonina Ieisu, gumanina yau alalauguguyeni waimie, gumanina Mesaia.”

⁴ Tupwaidiavo me Diu wete me  Guliki, gumanidiavo Yaubada kanatosobwanu, wete vevine kadiwavaqa bwaigidi puedi navona ivetumaqaneni beqa Ieisu ivemulieni mesaida Paulo wete Sailasa.

⁵ We tupwaidiavo me Diu ivedebasagugu paina tomo'otoqa puedi Paulo navona ivetumaqaneni beqa inaqo kabavegimwane waineye tomoqovo kapoidi iketoqoqonidi imaiedi taiauda vetalaqa ivelamu. Matatabudi ilaukwavina inaqo Daisoni navanuqa kawana itutubaia ilugu naqeneye Paulo wete Sailasa ilalaualedi wayaqidi inakewaluguaqetedi yoko waidie.

⁶ We ge idababanedi, beqa Daisoni wete tovetumaqana tupwaidiavo ikavikavinidi ikewadi inawedi taoni kanatoloinavo waidie we ieqoleqole ivesipupu ivo, “Dede tomoqovonidiavo gumanidiavo kapoina igigiaveluguaqetedi vikai matatabuna waidie wete deqoina imai kida dataoni waineye.

⁷ We Daisoni ivonamwasamwasanedi ikewadi inawedi navanuqe! Kida me Loma daloina da Kini tamoqana Sisa taekimataneni we gumanidiavo daloina ibaibaia iesipupu tamo Kini kanawavaqa Ieisu taivekimataneni.”

⁸ Tutuyanina tomo'otoqa wete toloinavo vonanina inoqai kadikapoka ioqala-otoqa.

⁹ Beqa taoni kanatoloinavo Daisoni wete tovetumaqana waidie'eqa mane ikewai, nigodibei divalabubuna kapo kanatakona, matautauda iyavudi inanaqo.

Paulo wete Sailasa Ieisu paipaina ilauguguya Belea waineye

¹⁰ We no lovananina waineye tovetumaqanavo Paulo wete Sailasa ivetunedi inaqo Belea taoni waineye. Tutuyanina ilekwa inaqo sinagogi waineye.

¹¹ Me Belea nuadi ge mesaida me Tesalonaika. Medimwasana Paulo navona inoqai beqa nuadi imaqetadi. Kaiata tamoqana tamoqana Yaubada Nabuki iwawawai wayaqidi inayagovi Paulo navona mwaqitana o gebuka.

¹² Beqa me Diu, me  Guliki tomoqovo wete vevine kadiwavaqa bwaigidi puedi ivetumaqana Ieisu waineye.

¹³ We tutuyanina me Diu Tesalonaika waineye iyagovi Paulo Yaubada navona ilalauguguyeni Belea waineye, beqa inaqo no waineye tomo'otoqa iekapokaoqaoqalidi Paulo paipaina.

¹⁴ We vedimadimanaeqa tovetumaqanavo Paulo ivetuneni inaqo kwadeweye, we Sailasa wete Timoti imiamia Belea waineye Masidonia Polovinisi naqeneye.

¹⁵ Paulo wete kanakweyabuvo taiauda itauya inaqo Atenisi taoni waineye. We kanakweyabuvo ivila inaqo Belea, Paulo navemataluana inavesipupuyeni Sailasa wete Timoti waidie inavedimadimana inanaqo Paulo ilalaugamasedi Atenisi.

Paulo Atenisi tomo'otoqa ivonedi Yaubada paipaina

¹⁶ Tutuyanina Paulo ilalaugamasa Sailasa wete Timoti Atenisi waineye, ikisedi yaubadavo pueotoqidi taoninina waineye beqa nuana ikapo-otoqa tomo'otoqa paipaidi.

¹⁷ Beqa sinagogi waineye ivelamu Ieisu valeana iesipupuyeni me Diu wete me Guliki waidie gumanidiavo Yaubada kanatosobwanu. We wete kaiata tamoqana tamoqana inaqonaqo kabavegimwane waineye tomo'otoqa taiauda iekawavonavona.

¹⁸ Tupwaidiavo toyagova inaqo Paulo taiauda iekawavonavona, toyagovanidiavo yoko kailuqa kadiwavaqa Epikuliani wete Sitoika. Paulo ilauguguya waidie Ieisu Valeana Giamaina wete natovoi vaituqana wapaeqa paipaina. Beqa tupwaidiavo taunidi waidie ivo, “Tomoqonina qauqauna ge idavenuana we ivesipupu.” Tupwaidiavo ivesipupu ivo, “Oge olaolaga diyaubadavo paipaidi iesipupu.”

^19-21 Me Atenisi wete olaolaga imiamia Atenisi waineye tutuya puena wayaqidi nuanuana kaivauna inaevaneneqeni wete paipaina inaesipupu. Beqa Paulo imaseagai inaweni tomoqovo bwaigidi diyoko kanawavaqa Alopaga waidie, we ivesipupu waineye ivo, “Kima wayaqima kigiavemaqeta kaiyagovi vakai vekaivevena kaivauna paipaina kuesipupu. Paina base vona tupwaidiavo kukinanadi kima nuama ivilele beqa wayaqima kadinuakawananaqai kigiavemaqetadi.”

²² Matautauda Paulo itovoi Alopaga matadie ivesipupu ivo, “Akiseni komi me Atenisi tutuya puena yaubadavo waidie kwasobwasobwanu.

²³ Dede mesaida avesipupuyedi, paina mitaoni akapavivili wete mikabasobwanuvo kadivikaivo gunabeida akisa-vekavekaidi, we tamo didiqa kabavelomu waineye akiseni kwagililia kwavo, ‘Dede waineye taekimataneni tamo yaubada ge tadayagovi.’ Komi yaubadanina ge kwadayagovi we kwasobwasobanu waineye. We aivonemi yaubadanina paipaina.

²⁴ “Yaubadanina pwayapwaya wete saku matatabuna naqeneye ivalabubunidi. Gumanina abama wete pwayapwaya kaditoloina beqa ge idamiamia vanuqa kabasobwanu tomo'otoqa dimadieqa iyoqoni waineye.

²⁵ We tomo'otoqa ge kadasala vakai tamo taivalabubuni taiveleni, paina vakai matatabuna dimaneye isauyedi wete yawaida lamuna.

²⁶ We kabavelamu waineye tamo tomoqo kanawavaqa Adama ivalabubuni, we tomoqonina waineye manuqa matatabuna isaila pwayapwaya matatabuna imiani. We dimiana wete diwapa kaditutuya iyatodi wete divikai kadiketoava iyatodi waidie inamiana.

²⁷ “Yaubada dede mesaida ivalabubunedi beqa tomo'otoqa kanasala inalaualeni, we tutuyanina inalaualeni oge kanasala inababaneni. We mwaqitana gumanina ge kanikie tomo'otoqa tamoqana tamoqana waideye.

²⁸ Dede mesaida tamo tomoqo ivesipupu ivo, ‘Gumanina yawaida iveleveleda tapetopeto, wete vakai danuanua tavavalabubunidi.’ We tupwaidiavo mitogililivo ivesipupu ivo, ‘Kida natunavo.’

²⁹ “Mwaqitana kida Yaubada natunavo, beqa no lamunanina ge kanasala tanavo Yaubada mesaida yaubadavo tomo'otoqa dimadieqa goula o seluba o gileu beqa ivalabubuni. Gumanidiavo tomo'otoqa taunidi dinuanuaeqa ivalabubunidi.

³⁰ Basenaqaida tomo'otoqa Yaubada ge idayagovi, we ge idakaimatavuloqidi, we deqoina iloina tomo'otoqa matatabudi imiamia vikai matatabuna waidie inanuavila dikapoina waidie.

³¹ Paina Yaubada nakaiata ivesinueni tomiapwayapwaya matatabuda taivonayavu mataneye. Gunabeida tomoqonina ivesinueni kawaie loina inakalaqei. Yaubada ivekaiveveneni tomo'otoqa matatabudi waidie gumanina ivesinueni paina tomoqonina wapaeqa isivetovoia.”

³² Tutuyanina tomo'otoqa inoqai Paulo iesipupu tovoi vaituqana wapaeqa paipaina, tupwaidiavo isaidibieni, we tupwaidiavo ivo, “Kima wayaqima kivesipupu-vaituqana tamo kaiata waineye.”

³³ Matautauda Paulo Alopaga dikabamiakauqa waineye isauyeni itauya.

³⁴ We tupwaidiavo tomo'otoqa Ieisu waineye ivetumaqana. We naqedie Dionesio gumanina tamo tomoqo bwaigina Alopaga waineye, vavine kadiwavaqa Damali wete tupwaidiavo tomo'otoqa.