Apositolo Divalabubuna 16 - Maiadomu

Timoti, Paulo wete Sailasa taiauda inaqo

¹ Paulo wete Sailasa inaqo Debi taoni waineye mulineye inaqo Lisitila taoni waineye. Tamo tovetumaqana kanawavaqa Timoti imiamia no waineye. We inana Diu vavinedi wete tovetumaqana, we tamana Guliki tomoqina.

² We Lisitila wete Ikoniami kanatovetumaqanavo Timoti ikawagiagiamaieni.

³ Paulo wayaqina Timoti inakweyabuya taiauda inanaqo. We Polovinisinidiavo waidie me Diu iyagovi Timoti tamana Guliki tomoqina, Yaubada nakiakiaya bunu kanagusu ge idavalabubuna wete natuna mesaida. Paipainanina Paulo Timoti waineye bunu kanagusu ivalabubuni beqa me Diu inayagovi divalabubuna ivekimatanedi.

⁴ Sailasa, Paulo wete Timoti inaqo taoni tamoqana tamoqana waidie, we tovetumaqanavo ivonedi apositolovo wete tomoqovo bwaigidi Ielusalema waineye dinuanuana Denitali inavekimatanedi.

⁵ Beqa tovetumaqanavo divetumaqana iveluluna wete kaiata tamoqana tamoqana tomo'otoqa Ieisu waineye ietumaqana.

Paulo kenokisakisa ikiseni Tiloasi waineye

⁶ Vaitabu Maqemaqetana Paulo wete enavo iketobodedi ge inanaqo Eisia Polovinisi waineye Yaubada navona inalauguguyeni. Beqa Piligia wete Galetia Polovinisi kanamatatabu waidiemo itauya inaqo.

⁷ Tutuyanina ilekwa Maisia Polovinisi kanakabavekakava waineye wayaqidi inalugu Bitinia Polovinisi waineye, we Ieisu Vaitabuna iketobodedi ge inanaqo no waineye.

⁸ Beqa ilugu Maisia Polovinisi waineye'eqa ibala iobu inaqo Tiloasi taoni waineye.

⁹ We lovananina Paulo tamo kenokisakisa ikiseni. We nakenokisakisanina waineye tamo Masidonia tomoqina ikiseni iweweseni ivo, “Kumai Masidonia Polovinisi waineye kukaivaisema.”

¹⁰ Tutuyanina Paulo kenokisakisa ikiseni kima vedimadimanaeqa kavalabubuna katauya kanaqo Masidonia Polovinisi waineye, paina kayagovi Yaubada wayaqina kainaqo no waineye Valea Giamaina kailauguguyeni me Masidonia waidie.

Lidia ivetumaqana Ieisu waineye

¹¹ Tiloasi taoni waineye wageye kadodoqa katupa tonotonovina kanaqo Salu Samotilesi waineye. Ikawananaqai kawakawaie katupa kanaqo Niapoli taoni waineye.

¹² Matautauda kaqemaeqa katauya kanaqo Pilipai. Taoninina bwaigina Masidonia Polovinisi naqeneye, we no waineye me Loma puedi imiamia. We no waineye kaiata puedi kamiamia.

¹³ We Kaiata Kabaveyawai waineye taoni waineye'eqa kasauyema kanaqo bwasie paina manuanuana no waineye tamo me Diu divikai kabavelaukui. Beqa kamiabui vikainina waineye kavesipupu vevine imiakauqa waidie.

¹⁴ We tamo vavina gumanidi Denitali ievaneneqema kadiwavaqa Lidia Taiatila taoni waineye'eqa imai gumanidi kaleko yaqoyaqodi iegimwane. Wete Yaubada kanatosobwanu beqa Tomwaya ikaivaisedi nuadi ikawananaqai Paulo navona ivetumaqaneni.

¹⁵ Beqa Paulo wete Sailasa Lidia ibabitaisodi wete tomo'otoqa divanuqe imiamia, we no waineye Lidia ivonema kainaqo divanuqe ivo, “Deqoina komi kwayagovi yau mwaqitana kavetumaqana Tomwaya waineye, beqa kwamai mavanuqa waineye taimiamiana.” We iwewesema beqa kanaqo.

Paulo wete Sailasa iyatodi deli waineye

¹⁶ Tamo kaiata kima kanaqonaqo kabavelaukuinina bwasi waineye tamo vavina tolituqamaimaiqa ibabanema. Base tupwaidiavo tomoqovo vavinenina igimwanei we vaitabu kapoina iekuniqeni kanasala inavonavaqata vakai kawaie inasauyedi we valabubunanina beqa mane bwaigiotoqina ikewakewadi tomoqovonidiavo paipaidi.

¹⁷ We vavinenina Paulo wete matatabuma itatalakwavinima ieqoleqole ivo, “Dede tomoqovonidiavo Yaubada Tabwaotoqineye natolituqavo. Gumanidiavo ivonevonemi banikodiqa Yaubada inaketoyavumi!”

¹⁸ Kaiata puedi naqedie mesaida ieqoleqole beqa Paulo iloqieni itunuvilai vaitabu kapoina waineye ivesipupu ivo, “Ieisu Keliso kanawavaqaeqa aveuqeuqemu kusauyemu vavina waineye'eqa!” Beqa vedimadimanaeqa vaitabu kapoina waineye isauyeni.

¹⁹ Vavinenina kanatogimwanevo iyagovi vaitabu kapoina gunabeida isauyeni vavinenina waineye wete dimane nakabasauye gunabeida ikavekapoi. Beqa Paulo wete Sailasa ikavikavinidi ibiudi inawedi taoni gamwaneye gabemani matadie ivetovoidi.

²⁰ Gabemani waidie ivo, “Dede tomoqovonidiavo me Diu, we kapoina igigiaveluguaqetedi datomo'otoqavo waidie.

²¹ We valabubuna kapoidi iekaivevena waidie sakunidiavo kida daloina waineye ge idatagwaneda kida Loma taivalabubuni.”

²² Matautauda yoko ivelautaubama Paulo wete Sailasa iekawadibidibidi. We gabemani ditolauqaviavo ivonedi ivo, “Paulo wete Sailasa kadikaleko kwasiyavudi we kwanigedi wabibieqa.”

²³ Tolauqaviavo inigedi itutu-palapalaladi iyatodi deli waineye, we gabemani deli kanatogumeta iloineni inaekisabodaboda-vekavekaiedi ge inadeqa.

²⁴ Beqa togumetanina Paulo wete Sailasa inawedi tutudaba naqeotoqineye iyatodi, we kaqedi isinawedi welavi ponuponuna wete mwauna waineye imiamia.

²⁵ We lovana gamwane Paulo wete Sailasa ielaukui we ikewakewa Yaubada waineye we tupwaidiavo pilisinavo ievaneneqedi.

²⁶ We vesalawapaeqa yoyoyo bwaigina isibutu pilisina kanakautu iyuwe. Vedimadimanaeqa pilisinavo diawavo matatabuna isibaledi wete seni dimadie ikawatakidi.

²⁷ Tutuyanina deli kanatogumeta itovoi ikiseni pilisinavo diawavo ikawagegedi nanuanuana nigo pilisinavo matatabudi idadeqa beqa nakepata isiokei nigo taunina idakavewapai.

²⁸ We Paulo itakala ivo, “Ge taunimu kiluvewapamu! Kima matatabuma side kamiamia!”

²⁹ Matautauda togumetanina iveqole natolituqa waidie dugala inamaiedi we ilaukwavina inaqo Paulo wete Sailasa ditutudaba waineye ielaudididiqa menagololo isobwanu matadie.

³⁰ Matautauda gumanina Paulo wete Sailasa ikewadi iluguaqetedi we ivelautoliedi ivo, “Tomoqovo, vakai aivalabubuni Yaubada inaketoyavugu?”

³¹ We ibaivila ivo, “Kuvetumaqana Tomwaya Ieisu waineye inaketoyavumu, wete tomo'otoqa muvanuqe imiamia.”

³² Mulineye Paulo wete Sailasa Tomwaya Ieisu valeana ivesipupuyeni togumetanina waineye wete tomo'otoqa navanuqe imiamia waidie.

³³ We no lovananina waineye togumetanina Paulo wete Sailasa ikewadi kadigimagima ilegwadi. Vedimadimanaeqa gumanina wete tomo'otoqa navanuqe taiauda imiamia ibabitaisodi.

³⁴ Matautauda togumetanina Paulo wete Sailasa ikewadi inawedi navanuqe kanikani iveledi ikani. Togumetanina wete natomo'otoqavo matatabudi imwasana-otoqa paina deqoina ivetumaqana Ieisu waineye.

³⁵ Ikawananaqai kawakawaie gabemani ditolauqaviavo ivetunedi togumetanina inavoneni inavo, “Tomoqovonidiavo kuyavudi inanaqo.”

³⁶ Beqa togumetanina Paulo ivoneni ivo, “Gabemani iloinegu amai aiyavumi komu wete Sailasa. Beqa deqoina komi kanasala kwaitauya. Kwainaqo niwalovaeqa.”

³⁷ We Paulo ivesipupu tolauqaviavo waidie ivo, “Kima ge tamo vakai kapoina kadavalabubuni wete ge idatagwanema kadasivetonova. We inigema itutupalapalalama tomo'otoqa matadie we deli naqeneye iyatoma. We kima Loma kanatomo'otoqavo! We deqoina wayaqidi vaigavueqa inavetunema kainaqo. Gebuka! Gabemani ilaubwainedi taunidi inamai inakewaluguaqetema deli waineye'eqa.”

³⁸ Matautauda tolauqaviavo ivila inaqo gabemani waidie Paulo navona ivesipupuyeni, we tutuyanina gabemani inoqai Paulo wete Sailasa gumanidiavo me Loma, beqa igololo.

³⁹ Beqa medivovomayamayaqa inaqo waidie ivo, “Soli bwaigina.” Matautauda ikewaluguaqetedi deli waineye'eqa we ivelaukuiedi taoni inakiaweni.

⁴⁰ Mulineye Paulo wete Sailasa deli waineye'eqa itauya inaqo Lidia divanuqe, no waineye tovetumaqana igiavepakalidi divetumaqana paipaina. Mulineye ikiawedi.