Apositolo Divalabubuna 14 - Maiadomu

Paulo wete Banabasi ilauguguya Ikoniami waineye

¹ Tutuyanina Paulo wete Banabasi ilekwa Ikoniami waineye, inaqo sinagogi naqeneye mediveluluna Yaubada valeana ilauguguyeni waidie. Beqa me Diu wete Denitali puedi Ieisu waineye ivetumaqana.

² We me Diu tupwaidiavo ibaila ge wayaqidi inavetumaqana Ieisu waineye inaqo Denitali ivenuagudadi beqa Paulo wete Banabasi ivedumwekaikaiedi.

³ We Paulo wete Banabasi imiamia tutuya kaniakwanina no waineye. Medinuavatu ilalauguguya Tomwaya navenua'ina'inaqe paipaina. Divonanina Tomwaya ikawamwaqitaneni paina veluluna iveledi beqa kiakiaya wete kabanuavilele puedi ivavalabubunidi.

⁴ We taoninina waineye tomo'otoqa iketovegeidi yoko kailuqa. Tupwaidiavo me Diu ivonakaivaisedi wete tupwaidiavo apositolo kadikailuqa ivonakaivaisedi. Beqa yoko kailuqa ivekawadibidibi.

⁵ Matautauda tupwaidiavo me Diu wete Denitali ditogumetavo taiauda nuanuana italaqi apositolo kadikailuqa gileueqa inaluvewapadi.

^6-7 We tutuyanina apositolo kadikailuqa me Diu dinuanuana iyagovi, ideqa inaqo Lisitila we Debi taoni Laikonia Polovinisi naqeneye wete vikainavo vividie Valea Giamaina ilalauguguyeni.

We tomo'otoqa dinuanua Banabasi wete Paulo nigodibei yaubadavo

⁸ Lisitila taoni waineye tamo tomoqo imiamia kaqena gemwayadi inana gamodie'eqa itubuqa ge kanasala inasasala.

⁹ Tamo kaiata Paulo ilalauguguya, we gemwayanina ievaneneqeni. Paulo ikisakikikia iyagovi gemwayanina Ieisu ivetumaqaneni inakavegiagiamaia,

¹⁰ beqa Paulo bonana bwaiginaeqa ivesipupu waineye ivo, “Iagu kutovoi!” Beqa vedimadimanaeqa kaqena ivegiagiamai itovoi itauya.

¹¹ Tutuyanina tomo'otoqa ikiseni Paulo vakai ivalabubuni gemwayanina waineye, ivelamu ieqoleqole taunidi Laikonia bonadieqa ivo, “Dayaubada kadikailuqa ivetomo'otoqa iobuma waideye.”

¹² Tomo'otoqanidiavo diyaubadavo puedi, ditomwaya kanawavaqa Susi, wete ditovesipupu kanawavaqa Emesi. Tomo'otoqa dinuanua ivo, “Banabasi ive Susi we Paulo ive Emesi paina gumanina tovesipupu.”

¹³ Beqa Susi natovelomu wete tomo'otoqa wayaqidi inavelomu Paulo wete Banabasi waidie. Susi navanuqa kabasobwanu taoni kana'awa waineye. Kaiatanina waineye Susi kanatovelomu bulumakau tupwaidiavo wete welavi diadi isuladi ikewadi imaiedi kana'awanina waineye velomu paipaina.

¹⁴ We tutuyanina Banabasi wete Paulo inoqai tomo'otoqa wayaqidi inasobwanu waidie beqa kadikaleko ilabukidi dinuakapo ivekaivevenedi tomo'otoqa waidie we ideqa inaqo yoko gamwadie ieqoleqole ivo,

¹⁵ “Tomo'otoqa, ge kanasala dede mesaida kwaivalabubunedi! Kima ge miyaubada kaia tomo'otoqaotoqa komi mesaida! Kamai Valea Giamaina kaivonemi, beqa kwaivekwada yaubada katupoe waidie kwasobwasobwanu we kwaivelamu Yaubada miamiavaqaina waineye kwaisobwanu. Gumanina abama, pwayapwaya, ligwagwa wete saku puena naqedie ivalabubunidi.

¹⁶ Basenaqaida Yaubada tomo'otoqa itagwanedi taunidi diyaubadavo waidie isobwasobwanu.

¹⁷ We Yaubada vakai puedi giamaidi ivalabubunidi paipaida, dakabakisa beqa taiyagovi Gumanina miamiavaqaina wete veluvelulunina. Navenapwayewa iveveda paina kwei iveleveleda abame'eqa wete kanikani tamoqana tamoqana kaditutuya waidie iveleveleda, beqa tutuya puena medamwasana.”

¹⁸ Paulo wete Banabasi dede vonanina beqa tomo'otoqa iketobodedi ge inavelomu waidie we tomo'otoqa iwewesedi inaqo kanaketoava diketoboda iveluluna.

Lisitila tomo'otoqa Paulo gileueqa inigei

¹⁹ Matautauda me Diu Anitioki wete Ikoniami taoni waidie'eqa imai, we tomo'otoqa ivekapokaoqaoqalidi Paulo inadumwekaieni. Beqa tomo'otoqanidiavo gileueqa Paulo inigei. We dinuanuana nigo gunabei idawapa beqa taoni waineye'eqa ibiuya iluguaqeteni.

²⁰ We tupwaidiavo tovetumaqana iyoko itovoi-velauvivili, we Paulo itovoi ivila inaqo Lisitila waineye. Ikawananaqai kawakawaie Paulo wete Banabasi itauya inaqo Debi.

²¹ Debi waineye Valea Giamaina ilauguguyeni tomo'otoqa waidie, beqa puedi ivetumaqana Ieisu waineye. Matautauda ivila inaqo Lisitila wete Ikoniami waidie we Anitioki taoni Pisidia Polovinisi waineye.

²² We taoninidiavo waidie Paulo wete Banabasi tovetumaqanavo igiaveluvelulunidi ivesipupu ivo, “Ge kwaivekwada, kwaietumaqana Ieisu waineye, paina naqaida veviqa puedi taibabanedi, mulineye Yaubada Nakabaloina waineye tailugu inaloineda.”

²³ Tovetumaqanavo dikabasobwanu tamoqana tamoqana waidie Paulo wete Banabasi tomoqovo bwaigidi ivesinuedi isilagaidi tovetumaqanavo inavekisabodebodedi. We ivekudiqana wete ivelaukui tomoqovo bwaigidi paipaidi we ikalaqeiedi Tomwaya dimaneye.

Paulo wete Banabasi ivila inaqo Anitioki Silia navikaie

²⁴ Mulineye Pisidia Polovinisi ikiaweni inaqo ilekwa Pega taoni Pamupilia Polovinisi waineye.

²⁵ Pega taoni waineye Tomwaya valeana ilauguguyeni ikakava matautauda itauya iobu Atalia taoni waineye.

²⁶ No waineye wageye idodoqa itupa ivila inaqo Anitioki taoni Silia Polovinisi waineye. Base waineye ditauya ivelamu we tovetumaqanavo ivelaukui Yaubada waineye Paulo wete Banabasi inavekisabodebodedi lituqanina deqoina gunabeida ivekakavai.

²⁷ Tutuyanina Paulo wete Banabasi ilekwa tovetumaqanavo iqolekauqidi disasala paipaina isimanaluguaqetedi vakai matatabuna Yaubada ikaivaisedi ivalabubunidi wete banikodiqa mesaida Denitali Ieisu ivetumaqaneni.

²⁸ Anitioki waineye imiamia tutuya kaniakwanina tovetumaqanavo taiauda.