Apositolo Divalabubuna 13 - Maiadomu

Vaitabu Maqemaqetana Saulo wete Banabasi ivesinuedi Yaubada nalituqa paipaina

¹ Anitioki waineye palopitavo wete Ieisu navona kanatovekaivevenavo tovetumaqanavo gamwadie. Kadiwavaqavo Banabasi, Simioni gumanina tamo kanawavaqa Bweubweuna, Lusiasi Sailini tomoqina, Manaeni gumanina Kini Elodi Anitipasi taiauda isikulu, wete Saulo.

² Tamo tutuya waineye Ieisu kanatovetumaqanavo imiakauqa Tomwaya waineye isobwasobwanu wete iekudiqana, we Vaitabu Maqemaqetana ivesipupu ivo, “Banabasi wete Saulo kwayatokedi paina avesinuedi inalituqa paipaigu.”

³ We tutuyanina kani kanavekudiqana wete velaukui ikakava, dimadi iyatodi Saulo wete Banabasi kunukunudie ivelaukui Yaubada waineye veluluna inaveledi nalituqa inavalabubuni, matautauda ivetuneluguaqetedi.

Banabasi wete Saulo Yaubada valeana Ilauguguyeni Salu Saipilosi waineye

⁴ Matautauda Vaitabu Maqemaqetana Banabasi wete Saulo Anitioki waineye'eqa ivetuneluguaqetedi inaqo Selusia taoni waineye. Iobu kwadeweye wageye idodoqa inaqo Salu Saipilosi waineye.

⁵ Ilekwa Salamisi taoni waineye, we Yaubada valeana ilauguguyeni sinagogi waidie. Ioni Malika ikweyabudi kaditokaivaisa.

⁶ Matautauda salunina ivelauvivili inaqo taoni tamoqana tamoqana waidie kanaketoava imai Paposi waineye. No waineye tamo tomoqo Diu ibabaneni kanawavaqa Ba-ieisu. Gumanina tobalau wete palopita katupoe.

⁷ Ba-ieisu ilitulituqa tamo Loma Gabemani kanawavaqa Segiasi Paulosi paipaina, gumanina tamo tonuauya we salunina iloloineni. Wayaqina Yaubada valeana inanoqai, beqa tamo valea ivetuneni Banabasi wete Saulo waidie inamai inakiseni.

⁸ We tobalaunina, Guliki bonadieqa tamo kanawavaqa Elimasi, wayaqina Segiasi Paulosi nanuanuana inasivilai ge inavetumaqana Ieisu waineye beqa Saulo wete Banabasi iveqaviqaviadi.

⁹ Matautauda Saulo, tamo kanawavaqa Paulo, Vaitabu Maqemaqetana veluluna iveleni beqa ikisanaqo Elimasi ikisakikikia.

¹⁰ Ivoneni ivo, “Komu Seitani natuna! Tutuya puena kukakatupoe wete kapoina kuvavalabubunidi! Komu valabubuna tonotonovidi kadiqavia! We komu tutuya puena kaia kuvovona-kapo Tomwaya nanuanuana tonotonovidi paipaidi!

¹¹ Sideqoina Tomwaya kaimatavuloqa inavelemu matamu inapwalu beqa tutuya tupwaidiavo waidie ge kanasala maqeta kikiseni.” Vedimadimanaeqa Elimasi matana iveqanuqanu wete ivaitomadi, beqa ikakabitaula wayaqina tamo tomoqo dimaneye inakavekavina inasiveyaia.

¹² We tutuyanina Gabemani Segiasi Paulosi ikiseni vakai Vaitabu Maqemaqetana ivalabubuni Elimasi waineye, iyagovi Paulo navona mwaqitana beqa ivetumaqana Tomwaya Ieisu waineye.

Paulo Yaubada valeana ilauguguyeni Anitioki taoni waineye Pisidia navikaie

¹³ Matautauda Paulo wete enavo Paposi ikiaweni wagaeqa inaqo Pega waineye Pamupilia Polovinisi waineye. We no waineye Ioni Malika ikiawedi ivila inaqo Ielusalema waineye.

¹⁴ Pega waineye'eqa koya waidie itauya inaqo ilekwa Anitioki taoni Pisidia Polovinisi waineye. We Kaiata Kabaveyawai waineye inaqo sinagogi naqeneye imiabui.

¹⁵ Tamo tomoqo iwawawadi Mosese naloina wete Yaubada napalopitavo digilili waidie'eqa, matautauda sinagogi kanatogumetavo valea ivetuneni Paulo wete enavo waidie ivo, “Emavo, kago tamo valea kabakaivaisa waimie tomo'otoqa paipaidi, kwaimai kwaivesipupuyeni waimeye.”

¹⁶ Beqa Paulo itovoi dimanaeqa igiavekwadadi we ivesipupu waidie ivo, “Me Isileli wete gumanimiavo Denitali Yaubada kanatosobwanu aivonemi!

¹⁷ Basenaqaida kida me Isileli da Yaubada tubudavo ivesinuedi wete tutuyanina imiamia Itipita waineye kadiyoko ivebwaiga-otoqa. Matautauda Yaubada navelulunaeqa ikewaluguaqetedi Itipita waineye'eqa.

¹⁸ We diqaba 40 naqedie pwayapwayamaiqe isasasala, tupwaidiavo tutuya Yaubada ge idaekimataneni we iekisabodebodedi.

¹⁹ Mulineye Kenani waineye, Yaubada ikaivaisedi kabaloina 7 kaditomo'otoqavo ivelulunapeledi, we dipwayapwaya matatabuna ikalaqeieni me Isileli waidie inaloineni.

²⁰ Ivelamu Iakobo natutuya Itipita naqeneye inaqo kanaketoava me Isileli me Kenani ivelulunapeledi dipwayapwaya ikewai diqaba kanakaniakwana 450 ikakava. “Tutuyanina imiamia Kenani waineye, Yaubada diloina kanatokalaqeivo iveledi igumegumetedi kanaketoava Yaubada napalopita Samuela isauyeni.

²¹ Samuela natutuye me Isileli Yaubada ivelaukuieni tamo Kini inaveledi, beqa Yaubada Saulo ivesinueni, Kisi natuna Beniamina manuqa waineye'eqa ivekini diqaba 40 naqedie.

²² Matautauda Yaubada Saulo isiobuyeni, we Deibida isilagai ivekini. Yaubada tomoqonina paipaina ivesipupu ivo, ‘Dese natuna Deibida nanuanuana mesaida Yau gunuanuana. Nuagu ikewa-otoqi we guvona matatabuna inavematamatanidi.’

²³ “Deibida tubuleleleqinavo waidie'eqa Yaubada tamo tomoqo isilagai kanawavaqa Ieisu, Toketoyavu me Isileli paipaida mesaida basenaqaida ivonadabadaba Deibida waineye.

²⁴ Ieisu nalituqa giladi ge idavelamu, we naqaida Ioni Tobabitaiso ilauguguya me Isileli matatabudi waidie inanuavila dikapoina waidie'eqa we inababitaiso.

²⁵ Saiqanaqa Ioni nalituqa inavekakava, tomo'otoqa ivonedi ivo, ‘Komi nigo yau Mesaia? Yau gebuka! We gumanina muligue imaimai isaki-otoqa ge kagusala kanakaqeyapayapa kaqeneye aikewayavuleni.’

²⁶ “Egwavo, Ebelamo tubuleleleqinavo wete gumanimiavo Denitali Yaubada kanatosobwanuvo, kwavevaneneqa! Yaubada valea ivetuneni imai waideye Ieisu kanasala inaketoyavuda.

²⁷ We me Ielusalema wete ditogumetavo ge idayagovi Ieisu gumanina Mesaia.Kaiata Kabaveyawai tamoqana tamoqana waineye iwawawai Yaubada napalopitavo digilili Ieisu paipaina sinagogi waineye, we tomo'otoqa inoqai ge idanuakawananaqaia. Beqa iloina Ieisu inawapa, we palopitavo digilili kanamwaqitana isauyeni.

²⁸ Ge tamo lamu idababaneni Ieisu nawapa paipaina, we kaia ivelaukuienimo Pailato waineye inaluvewapai.

²⁹ “Tutuyanina dinuanuana Ieisu waineye ivekakavai mesaida basenaqaida Yaubada napalopitavo igililia, Ieisu isitakia laukenobalabala waineye inaweni iyatoi ovu waineye.

³⁰ We Yaubada wapaeqa isivetovoia.

³¹ We kaiata puena Ieisu ilalausimatala kanatovemulivo waidie, gumanidiavo base taiauda Galilieqa inaqo Ielusalema. Deqoina gumanidiavo Ieisu iesipupuyeni me Isileli waidie.

³² “We deqoina yau wete Banabasi Valea Giamaina kaesipupuyeni waimie. Vakai basenaqaidaotoqa Yaubada ivonadabadaba tubudavo waidie

³³ gunabeida ivalabubuni kida paipaida paina Ieisu isivetovoia. Deibida igililia Ieisu paipaina Same kanaveluqa waineye Yaubada ivo, “ ‘Komu Yau natugu, Deqoina avesinuemu kivekini.’

³⁴ “Yaubada ivonadabadaba Ieisu wapaeqa inasivetovoia ge kanasala vovona inapwasa. Dede vonadabadabanina paipaina Yaubada ivesipupu tubudavo waidie ivo, “ ‘Vonavenapwayewanina Deibida waineye avonadabedabeni aivelemi.”

³⁵ “Wete tamo Same waineye Deibida Yaubada waineye ivesipupu ivo, “ ‘Komu Mesaia vovona ge kitagwaneni inapwasa ovu waineye.’

³⁶ “Deibida ge taunina paipaina idagililia. Yaubada nalituqa ivekakavai matautauda iwapa itavuni tubunavo vividie we vovona ipwasa.

³⁷ We ivonavona Ieisu paipaina. Yaubada Ieisu wapaeqa isivetovoia we vovona ge idapwasa.

³⁸ “Beqa egwavo, kwavevaneneqa-vekavekai. Ieisu waineye'eqa Yaubada kanasala mikapoina inanuataqonidi beqa valeana kalalauguguyeni.

³⁹ Yaubada naloinavo imai Mosese waineye kago kwaiqeuya kamikaimatavuloqa kwaiwapa. Loinanina ge kanasala inaketoyavumi mikapoina waidie'eqa. We Ieisu gumanina kanasala inaketoyavumi. Beqa wayaqima kwaiyagovi meqavoi Ieisu inavetumaqaneni kapoina waineye'eqa inaketoyavudi we inavegiagiamai Yaubada mataneye.

⁴⁰ No lamunanina kwavekisabodebodemi, beqa vakai palopitavo basenaqaida igililia ge inasauyeni waimie.

⁴¹ We gililinina Yaubada ivo, “ ‘Komi tosaidibinimiavo guvona kwadumwekaieni, tutuyanina vakai aivalabubuni kwaikiseni nuami inavilele we kwaiwapa. Paina meyawaimie kaimatavuloqa bwaigina aivelemi komi gumanimiavo Yau ge kwadaetumaqanegu. Kago tamo tomoqo inagiavemaqeta veviqanina paipaina we ge kwaivetumaqaneni dede mesaida aivalabubunedi.”

⁴² Tutuyanina Paulo wete Banabasi sinagogi ikiakiaweni tomo'otoqa ivelaukuiedi ivo, “Tamo Kaiata Kabaveyawai waineye kwaimai-vaituqana wete Yaubada valeana kwaikavesulaia kwaivesipupuyeni waimeye.”

⁴³ Matatabudi iyavula, puedi me Diu wete Denitali, gumanidiavo bunudi igusudi me Diu disobwanu iemulieni, Paulo wete Banabasi ivemuliedi. Igiavepakalidi ivo, “Komi Yaubada valeana kwaivetumaqaneni navenua'ina'inaqe'eqa mikapoina waidie'eqa inaketoyavumi.”

⁴⁴ Kaiata Kabaveyawai matadeye, tomo'otoqa puedi taoni waineye'eqa imai sinagogi waineye imiakauqa wayaqidi Tomwaya valeana inanoqai.

⁴⁵ We tutuyanina me Diu togumetavo yoko bwaigina ikiseni Paulo wete Banabasi ivedebasaguguyedi. Beqa ivelamu Paulo isisiwataoi ivo, “Paulo ikakatupwaiemi bonana ge kwainoqai.”

⁴⁶ We Paulo wete Banabasi medinuavatu ivesipupu waidie ivo, “Yaubada wayaqina naqaida valeana kailauguguyeni me Diu waimie mulineye Denitali waidie, we komi kwavedumwekaikaieni. We paina valeana kwavedumwekaikaieni we taunimi kwanuanuana nigodibei komi tomo'otoqamaimaiqa ge kanasala yawaina vaqata kwaikewai, beqa komi kaikiawemi kainaqo we Yaubada valeana kaivesipupuyeni Denitali waidie.

⁴⁷ Paina Yaubada iloinema dede mesaida kaivalabubunedi tutuyanina ivo, “ ‘Yau avesinuemu kivemaqeta Denitali waidie beqa tomiapwayapwaya kanamatatabu kivonedi banikodiqa aiketoyavudi dikapoina waidie'eqa.”

⁴⁸ Tutuyanina Denitali navona inoqai matatabudi imwasana-otoqa vonanina paipaina wete Tomwaya ididigeni valeanina paipaina. We gumanidiavo Yaubada gunabeida ivesinuedi yawaina vaqata inakewai, ivetumaqana Ieisu waineye.

⁴⁹ Beqa Tomwaya valeana isapayavula Anitioki taoni kanavikai matatabuna waidie.

⁵⁰ Matautauda me Diu inaqo vevine kadiwavaqa bwaigidi Denitali Yaubada kanatosobwanu wete taoni kanatogumetavo nuadi ikavekapoidi. Beqa togumetanidiavo ivonedi Paulo wete Banabasi veviqa iveledi wete ikwavinedi divikaie'eqa isauyedi.

⁵¹ Beqa Banabasi wete Paulo tamo kiakiaya kapoina ivalabubuni we kiakiayanina kadikaqeyapayapa kaupualina itutuvutuqidi paina dede tomo'otoqanidiavo Ieisu Valeana ivedumwekaikaieni. Matautauda apositolo kadikailuqa inaqo Ikoniami taoni waineye.

⁵² We Anitioki waineye, tovetumaqanavo imwasana-otoqa wete Vaitabu Maqemaqetana iveadaqidi.