Apositolo Divalabubuna 12 - Maiadomu

Kini Elodi veviqa bwaigidi tovetumaqanavo iveledi

¹ We tutuyanina waineye Banabasi wete Saulo inaqo Ielusalema, Kini Elodi ivelamu Ieisu kanatovetumaqanavo veviqa bwaigina iveleveledi.

² Natolauqaviavo ivonedi Ioni tatana Iemesa kepataeqa iluvewapai.

³ Iemesa nawapa paipaina me Diu togumetavo imwasana beqa Elodi natolauqaviavo ivonedi Pita ikavikavini iyatoi deli waineye. Dede valabubunanina isauyeni *Beledi Tutubeabeana Ge Mekana'isiti Kanakani kanatutuya waineye.

⁴ Mulineye Pita ikewai deli waineye iyatoi, Elodi ivonedi tolauqaviavo yoko pulina inakisavekavini, yoko tamoqana tamoqana waidie kadikumapuli. Elodi wayaqina Vesikaqalataqona kanakani inakakava mulineye Pita inavelautolieni inasivetonova tomo'otoqa matadie matautauda inaluvewapai.

⁵ Beqa tolauqaviavo Pita deli waineye imimiagamatai. We tovetumaqanavo ielaukui-veluveluluna Yaubada waineye Pita inakaivaiseni.

Yaubada na'anelose Pita ikewaluguaqeteni deli waineye'eqa

⁶ Lovananina waineye Pita deli naqeneye tolauqaviavo kadikailuqa gamwadie ikenokeno. Dimana kailuqa isipwatedi seni veluvelulunidi beqa we tupwaidiavo tolauqaviavo itovotovoi deli kawana waineye.

⁷ We tutuyanina waineye vesalawapaeqa Tomwaya na'anelose ilausimatala Pita mataneye, we maqetana mata'udu'udulina tutudaba naqena imaqetai. Anelosenina Pita ilauvaqoni ivo, “Vedimadimanaeqa kutovoi!” Pita itovoi dimaneye seni ikawaqeudi ibeku.

⁸ Matautauda anelose ivo, “Kuvaiqavu kamukaqeyapayapa kusilagaidi.” Pita mesaida ivalabubunedi, wete ivoneni ivo, “Kamukaleko kusilagai kivemuliegu.”

⁹ Beqa Pita kanakaleko isilagai isauyeni tutudaba waineye'eqa anelose ivemulieni, we ge idayagovi nigodibei idakekenokisakisa we anelose vakai ivavalabubuni waineye kaia mwaqitanaotoqa.

¹⁰ Matautauda itauya inaqo tolauqaviavo yoko kailuqa ikiawedi mulineye ilekwa awa kainumu waineye awanina matana inaqo taoni waineye. Awanina taunina isibaleni waineye isauyedi inaqonaqo tamo keda waineye we vedimadimanaeqa anelosenina Pita ikiaweni.

¹¹ Matautauda Pita nuana ikawananaqai ivo, “Mwaqitana Tomwaya na'anelose ivetuneni iketoyavugu Elodi naveluluna waineye, beqa ge kanasala kapoina inavalabubuni waigue mesaida me Diu togumetavo dinuanuana!”

¹² Tutuyanina Pita iyagovi Yaubada ikaivaiseni inaqo Meli divanuqe, gumanidi Ioni inana. Ioni tamo kanawavaqa Malika. No waineye tovetumaqanavo puedi imiakauqa Pita paipaina ielaukui.

¹³ Pita ilekwa vanuqa kanakala kawana waineye itovoi iveqole, we tamo tolituqa vavinena kanawavaqa Loda bonana inoqai imai inasibaleni.

¹⁴ Tutuyanina Pita ivesipupu Loda waineye bonalamuna inoqai imwasana-otoqa beqa ge awa idasibaleni kaia ilaukwavina inaqo tovetumaqanavo ivonedi ivo, “Pita sinoko itovotovoi awa waineye.”

¹⁵ We ge idavetumaqaneni beqa waineye ivesipupu ivo, “Komu qauqaumu!” We Loda kaia iesipupumo ivo, “Mwaqitana, Pita sino maleweye.” Ivoneni ivo, “Weye tamo anelose Pita kanatovekisabodaboda.”

¹⁶ Tutuyanina Loda iesipupu tovetumaqanavo taiauda, Pita giladi ieqole awa waineye. We tutuyanina inaqo awa isibaleni ikiseni dede mwaqitana nuadi ivilele.

¹⁷ Pita dimanaeqa iketobodedi inavekwada matautauda ivonedi banikodiqa mesaida Tomwaya deli waineye'eqa ikewaluguaqeteni. Wete ivo, “Vakai isauyeni kwavesipupuyeni Iemesa wete tovetumaqanavo tupwaidiavo waidie.” Pita ivesipupu ikakava Ielusalema ikiaweni inaqo tamo vikai waineye.

¹⁸ Ikawananaqai kawakawaie tolauqaviavo Pita imimiagamatai nuadi ivilele paina ge idayagovi Pita vakaiebei inaqo.

¹⁹ Tutuyanina Elodi inoqai Pita ideqa, natolauqaviavo ivonedi inalaualeni, we ge kadisala inababaneni. Beqa Elodi tolauqaviavo 16 ivelautoliedi gumanidiavo Pita imimiagamatai. Matautauda tupwaidiavo tolauqaviavo iloinedi tolauqavianidiavo kadikuma 16 inawedi iluvewapadi, paina Pita ge idavekisavekavina-vekavekaia. Matautauda Elodi Ielusalema ikiaweni Iudia Polovinisi waineye we inaqo imiana Sisalia taoni waineye.

Kini Elodi iwapa

²⁰ Tutuya kaniakwanina Elodi iekawadibidibi me Taia wete me Saidoni taiauda. We deqoina wayaqidi Kini Elodi taiauda inaveiaiana kago mesaida kadi nakabamai inagiabodai paina kadi imaimai Elodi navikaie'eqa. Beqa inaqo Elodi natolituqa bwaigina kanawavaqa Balasitusi ivelaukuieni inakaivaisedi tamo kaiata inavesinueni meyokodi Elodi taiauda inamiakauqa divekawadibidibi inasivetonovi inaveiaiana.

²¹ Balasitusi ivesipupu Elodi waineye beqa itagwana diyoko taiauda inamiakauqa. We kaiatanina waineye yokonina inaqonaqo inakiseni, Elodi kanakaleko giamaiotoqidi isilagaidi imiabui kini nakabamia waineye we navona ivesipupuyedi waidie.

²² Tutuyanina yoko inoqai Elodi iesipupu, matatabudi ivelamu ieqoleqole ienuagudai ivo, “Ge tomoqo bonana we yaubada bonana!”

²³ Vedimadimanaeqa Tomwaya na'anelose Elodi viqa iveleni paina Elodi igagasa ge Yaubada idadidigeni beqa mwatamwata pueotoqidi naqena ikani-kakavai iwapa.

²⁴ No tutuyanina waineye Ieisu Valeana ivebwaiga-otoqa wete isasapayavula. Tovetumaqanavo Yaubada valeana iesipupuyeni tomo'otoqa waidie, beqa tomo'otoqa puedi Ieisu waineye ivetumaqana.

²⁵ Tutuyanina Saulo wete Banabasi Anitioki tovetumaqanavo dikaivaisa Ielusalema tovetumaqanavo iveledi we gunabeida dilituqa ivekakavai Ielusalema waineye, ivila inaqo Anitioki taoni Silia Polovinisi naqeneye. Ioni ikewai taiauda inaqo. Tamo kanawavaqa Malika.