Apositolo Divalabubuna 11 - Maiadomu

Pita navalabubuna igiavemaqetai me Diu tovetumaqanavo waidie

¹ Matautauda apositolovo wete tupwaidiavo tovetumaqanavo Iudia Polovinisi waineye imiamia inoqai Denitali gunabeida Yaubada navona inoqai wete ivetumaqaneni.

² Beqa tutuyanina Pita inaqo Ielusalema waineye tupwaidiavo me Diu tovetumaqanavo ivona nigo idavalabubuna-kapo

³ ivesipupu ivo, “Komu kunaqo kulugu Denitali divanuqe taiauda kwakani daloina kubaia!”

⁴ Beqa Pita igiavemaqeta waidie vakai matatabuna isauyeni waineye.

⁵ Ivo, “Tamo kaiata yau amiamia Iopa taoni waineye aelaukui, we kenokisakisa akiseni. Tamo vakai akiseni mesaida kaleko bwaigina iobuobuma abamaeqa mesaida tamo aitoi kaleko dolena pulina waidie idakakavekavini, we idaobuobuma waigue.

⁶ Akisalugu naqeneye kaisaya akisedi, kaisayanidiavo kaqedi pulina, kaisaya walawalakai, baisoa, dumakala wete manuqa kaisayanidiavo me Diu daketoboda.

⁷ Matautauda bonana anoqai ivonevonegu ivo, ‘Pita, kutovoi tamo kunigei kukani!’

⁸ “We yau abaivila avo, ‘Gebuka, Tomwaya! Yau kaisayanidiavo ge aikanidi kima me Diu maketoboda paina ge maqemaqetadi.’

⁹ “Matautauda bonana ivesipupu-vaituqana abame'eqa ivo, ‘Vakai Yaubada ivo maqemaqetadi komu ge kunavo ge maqemaqetadi.’

¹⁰ Dede kenokisakisanina kaitonu isauyeni waigue matautauda kalekonina ivila-vaituqana ilaga abame.

¹¹ “Tutuyanina kalekonina ivila-vaituqana, tomoqovo kadikaitonu kaditogumeta ivetunedi waigue Sisalia waineye'eqa, imai vanuqanina waineye amiamia.

¹² Vaitabu Maqemaqetana ivonegu taiauda kainaqo we ge adavenuanaluqa. Dede tovetumaqanavo kadikuma 6 Iopa waineye'eqa ikweyabugu wete kanaqo kalugu Konilio navanuqe.

¹³ Matautauda Konilio ivonema anelose ikiseni navanuqa naqeneye itovotovoi we ivoneni ivo, ‘Kuvetunedi tomoqovo inanaqo Iopa navikaie Saimoni Pita inamaieni.

¹⁴ Gumanina inavonemu tamo valea. Dede valeanina komu wete mususuvo inaketoyavumi.’

¹⁵ “Tutuyanina avelamu Yaubada valeana avonevonedi, Vaitabu Maqemaqetana iobuma iveadaqidi kaia mesaida base nakabavelamu waineye iobuma kida iveadaqida.

¹⁶ We anuavekavini no Tomwaya Ieisu ivona waimeye ivo, ‘Ioni Tobabitaiso tomo'otoqa ibabitaisodi bwasieqa, we komi Yaubada inababitaisomi Vaitabu Maqemaqetanaeqa.’

¹⁷ Gunabeida tayagovi Yaubada nakalaqei Vaitabu Maqemaqetana Denitali iveledi kaia mesaida kida me Diu iveleda tutuyanina tavetumaqana Tomwaya Ieisu Keliso waineye. Beqa ge kagulaubwaina Yaubada aiketobodeni.”

¹⁸ Tutuyanina me Diu tovetumaqanavo Pita navona inoqai, ge tamo vakai idavesipupuyeni we Yaubada ididigeni ivo, “Mwaqitana, Yaubada Denitali itagwanedi inanuavila beqa yawaina vaqata inababaneni.”

Banabasi inaqo tovetumaqanavo waidie Anitioki waineye

¹⁹ Tutuyanina me Diu Sitibeni iluvewapai, tovetumaqanavo veviqa bwaigina iveleveledi. Beqa tovetumaqanavo iyavula inaqo vikai tupwaidiavo waidie mesaida Ponisia, Salu Saipilosi wete Anitioki taoni waineye. We iesipupu kedakeda Ieisu valeana paipaina we me Diu kaisediqa waidie.

²⁰ We tupwaidiavo tovetumaqanavo Salu Saipilosi wete Sailini taoni waineye'eqa, inaqo Anitioki waineye ivelamu ilauguguya Tomwaya Ieisu paipaina Denitali waidie.

²¹ We Yaubada naveluluna gumanidiavo taiauda, beqa Denitali pueotoqidi valeanina inoqai ivetumaqaneni we Tomwaya ivemulieni.

²² Tovetumaqanavo Ielusalema waineye inoqai vakai isasauyeni, beqa Banabasi ivetuneni inaqo Anitioki waineye.

^23-24 Banabasi gumanina tomoqo giamaina, Vaitabu Maqemaqetana iveadaqi we navetumaqana iveluluna Ieisu waineye. We tutuyanina ilekwa ikiseni Yaubada navenapwayewa tomo'otoqa waidie paipaina imwasana we igiavepakalidi Tomwaya Ieisu inavetumaqaneni nuapoudi matatabunaeqa. We tomo'otoqa pueotoqidi Banabasi ivevaneneqeni we ivetumaqana Tomwaya waineye.

²⁵ Matautauda Banabasi Anitioki ikiaweni inaqo Tasisi waineye Saulo inalaualeni,

²⁶ we tutuyanina Banabasi Saulo ibabaneni ivileni imaieni Anitioki waineye. Matautauda diqaba tamo kanamatatabu naqeneye Banabasi wete Saulo tovetumaqanavo taiauda imimiakauqa, we iekaivevena tomo'otoqa puedi waidie. Anitioki waineye tomo'otoqa ivelamu tovetumaqanavo iqoleqoledi Kelisitiani.

²⁷ No kaiatanidiavo waidie Yaubada napalopitavo tupwaidiavo Ielusalemaeqa iobuma Anitioki waineye.

^28-30 We tamo palopita kanawavaqa Agabusi itovoi we Vaitabu Maqemaqetana navelulunaeqa ivonavaqata kawaie lase bwaigina inasauyeni inasapayavula pwayapwaya matatabuna waineye. Beqa tovetumaqanavo Anitioki waineye inuanuana wayaqidi tomo'otoqa tamoqana tamoqana kanalaubwainaeqa mane inayato ediavo Iudia Polovinisi waineye imiamia kadikaivaisa paipaina. No mesaida ivalabubunedi matautauda divenapwayewa Banabasi wete Saulo dimadie iyatoi inanaweni tovetumaqana kaditogumetavo inaveledi. (Diqaba puedi ikakava mulineye dede lasenina isauyeni Sisa Kolodiasi natutuya iloloina Loma navikaie.)