Apositolo Divalabubuna 1 - Maiadomu

Ieisu kanatovemulivo ivonedi Vaitabu Maqemaqetana kawaie inamai waidie

¹ Yau Luke avonamwasamwasanemu Tiopilo. Buki gumegumetana naqeneye agililia Ieisu navalabubuna wete navekaivevena matatabuna paipaidi avonemu, ivelamu Ieisu natubuqa inaqo nalituqa kabavelamu we inaqo

^2-3 kabavekakava kaiatanina Yaubada imaseagai ilagaveni abame. Gunabeida Ieisu iveviqa iwapa, we kaiata 40 naqedie ilalausimatala tutuya puena na'apositolovo waidie, we ivekaiveveneni kedakeda puedi waidie ikawamwaqitaneni gumanina meyawaina itovoi-vaituqana. Wete iesipupu waidie Yaubada nakeda kaivauna natomo'otoqa kadiloina paipaina. We Ieisu Vaitabu Maqemaqetana navelulunaeqa na'apositolovo vesivesinuadi iloinedi vakai puepuena wayaqina inavalabubunidi, matautauda ivila abame.

⁴ We kaiatanidiavo naqedie tamo tutuya taiauda imiamia, dede mesaida iloinedi ivo, “Ielusalema ge kwaikiaweni, we kwailalaugamasa dede waineye. Tamagu Vaitabu Maqemaqetana inavetuneni inamai waimie mesaida base tutuyanina ivonadabadaba waimie. Dede paipaina gunabeida kwanoqai vakai avesipupuyeni.

⁵ Ioni Tobabitaiso tomo'otoqa kaia bwasieqa ibabitaisodi, we tutuya kalakusana inakakava Tamagu Vaitabu Maqemaqetana komi inababitaisomi.”

Yaubada Ieisu imaseagai ilagaveni abame

⁶ We mulineye, tutuyanina apositolovo Ieisu taiauda imiakauqa ivelautolieni ivo, “Tomwaya, deqoina komu kanasala Loma Gabemani kivetuobuyedi, we kabaloina me Isileli kiveledi beqa taunidi inaloinedi?”

⁷ Beqa ibaivila waidie ivo, “Tamagu kaisena iloinedi vakai tutuya wayaqina sakunidiavo inavalabubunidi, beqa komi ge kanasala kwaiyagovi paipaidi.

⁸ We tutuyanina Vaitabu Maqemaqetana inamai waimie veluluna inavelemi, beqa komi kanasala tomo'otoqa kwaivonedi Yau paipaigu dede Ielusalema taoni naqeneye, Iudia Polovinisi kanamatatabu naqeneye, Samelia Polovinisi kanamatatabu naqeneye wete vikai matatabuna pwayapwaya waineye.”

⁹ Dede mesaida ivesipupuyedi, matautauda matadie Yaubada Ieisu imaseagai ilagaveni abame, we waumana ivaigavuyeni ge kanasala inakiseni.

¹⁰ No tutuyanina waineye giladi ilagalaga apositolovo ieteteyeni abame, we vesalawapaeqa tomoqovo kadikailuqa kadikaleko tatatalidi ilausimatala viladie itovoi.

¹¹ We tomoqovonidiavo kadikailuqa ivonedi ivo, “Me Galili, uvale dede waineye kwatovotovoi kwakikisalaga abame? No tomoqonina Ieisu, gunabeida ilaga abame, kawaie inamai-vaituqana pwayepwayeye kaia mesaida ilaga abame.”

Tamo apositolo ivesinueni Iudasa inaketopesali

¹² Matautauda Ieisu na'apositolovo Koya Olibe ikiaweni ivila Ielusalema waineye, we Ielusalema Koya Olibe vivineye, kanakaniakwana mesaida kilomita tamoqana.

¹³ We tutuyanina ilekwa, inaqo tamo tomoqo navanuqa waineye, we ilaga somala kanaveluqa tabwaneye tutudabanina waineye iekalamia. We deqoidi kadiwavaqavo: Pita, Ioni, Iemesa, Anidulu, Pilipi, Tomasi, Batolomiu, Madiu, Iemesa Alipio natuna, Saimoni gumanina Seloti we Iudasa Iemesa natuna.

¹⁴ Tutuya puena apositolovo matatabudi, Ieisu kanatovemulivo vevine, Meli Ieisu inana wete Ieisu tainavo taiauda imiakauqa we ielaukui dinuanuana tamoqanaeqa.

¹⁵ No kaiatanidiavo waidie imimiakauqa tamo tutuya Ieisu kanatovemulivo kadiyoko 120 imiamia no waineye, Pita itovoi gamwadie ivo,

^16-17 “Egwavo, dede kanalaubwaina Yaubada ivona Iudasa paipaina kanamwaqitana gunabeida isauyeni. Basenaqaida Vaitabu Maqemaqetana ivesipupu Kini Deibida kawaneye Iudasa paipaina. Iudasa gumanina tamo kadayoko wete kida taiauda talitulituqa dalituqa apositolo waineye, we mulineye gumanina ikedagumetedi tomoqovo Ieisu ikavekavini.”

¹⁸ (Iudasa nakapoina paipaina mane ikewai, beqa pwayapwaya igimwanei. Matautauda ibeku iobu gamona itutulabukeni, we gamogamona isauyedi iwapa.

¹⁹ We tomo'otoqa matatabudi Ielusalema taoni waineye valeana inoqai, beqa taunidi bonadieqa iqoleni pwayapwayanina Akelidama, kananuakawananaqai dayaqa pwayapwaya.)

²⁰ Matautauda Pita ivo, “Deibida igililia Iudasa paipaina buki Same waineye, ivo, “ ‘Navanuqa naqekavana, ge tamo aitoi inamiamia naqeneye.’ We igililia ivo, ‘Tamo tomoqo nakabalituqanina inaketopesali.’

^21-22 “Beqa deqoina taivesinueni tamo tomoqo taiauda tailituqa tomo'otoqa taivonedi Ieisu natovoi vaituqana wapaeqa paipaina. Dede kanalaubwaina tamo tomoqo taivesinueni gumanina kida taiauda tutuya matatabuna taelauvivila Tomwaya Ieisu taiauda, ivelamu tutuyanina Ioni tomo'otoqa ibabitaisodi inaqo kanaketoava kaiatanina Yaubada Ieisu imaseagai waideye'eqa ilagaveni abame.”

²³ Beqa tovetumaqanavo tomoqovo kadikailuqa ivesinuedi: Iosepa Balisabasi (tamo kanawavaqa Diasitusi) wete Mataiasi.

^24-25 Matautauda dede mesaida ivelaukui ivo, “O Tomwaya, komu tomo'otoqa matatabudi dinuanuana kuyagovidi. Kuvevema tomoqo tamoqana kuvesinueni kadikailuqa naqedie'eqa, gumanina inalituqa apositolo waineye Iudasa kanaketopesala, paina Iudasa ikiawema gunabeida inaqo taunina navikaie.”

²⁶ We kadiwavaqa gileu siaidi waidie igililidi we kawaqaina naqeneye ivedodoqidi iligweni, we Mataiasi kanawavaqa kanagileu ibeku iobu. Beqa dede mesaida Mataiasi ivesinueni, gumanina apositolovo kadikuma 11 taiauda inalituqa.