2 Samuela 12 - Maiadomu

Palopita Naitani navalea

¹ Beqa Iave napalopita Naitani ivetuneni inaqo Deibida waineye. Tutuyanina Naitani ilekwa Deibida ivoneni ivo, “Tomoqovo kadikailuqa imiamia taoni tamoqana waineye. Tamo tomoqo guyoguyona we tamo yomuyomuna.

² We tomoqo guyoguyona nasipivo wete nabulumakauvo boudi,

³ we tomoqo yomuyomuna nakaisaya kaia tamoqana sipi natudi vavinena itakonai imaieni ikisavekavini natunavo taiauda ivebwaiga. Kana siaidi beqa sipinina iekania, kanavedi'eqa ieyemuya wete taiauda dimaneye ikenokeno kaia mesaida natuna vavinena.

⁴ “Tamo kaiata waineye tomoqo guyoguyona kana'ulatau imai navanuqe, we tomoqo guyoguyona ge wayaqina taunina nakaisayaeqa inanigei inakalaqeieni kana'ulatau inakania, beqa inaqo tomoqo yomuyomuna nasipi natudi inigei ivetavoqi kana'ulatau iveleni.”

⁵ Tutuyanina Deibida vesipupunina inoqai kanakapoka ioqala-otoqa tomoqonina paipaina beqa Naitani ivoneni ivo, “Iave miamiavaqaina Kanawavaqaeqa aivesipupu mwaqitana no tomoqonina guyoguyona dede mesaida ivalabubunedi ilaubwaineni idawapa!

⁶ Dede valabubunanina ivalabubuni tomoqo yomuyomuna waineye ge idavenua'ina'inaqeyeni, beqa ailoina kanabaivila nasipivo 4 inaveleni.”

⁷ We Naitani Deibida ivoneni ivo, “Tomoqonimu! Iave me Isileli da Yaubada dede mesaida ivesipupu paipaimu ivo, ‘Asilagaimu kunukunumu ai'iwaqi bunamaeqa komu kuvekini me Isileli paipaidi. Aketoyavumu Saulo naveluluna waineye'eqa.

⁸ We kamutogumeta Saulo navanuqa, mwanenavo wete nakabaloina Isileli wete Iuda akalaqeiedi waimue kiloinedi. Kago kinuani dede sakunidiavo siaiotoqidi waimue, Yau kanasala wete tabwaneye adayatodi.

⁹ Uvale guloina ge kudavekimataneni? Uvale kapoina dede kuvalabubuni? Komu Ulaia tomoqo Ititi kuluvewapai me Amomoni dikepataeqa we mwanena kuvainaqodi.

¹⁰ Komu ge kudavekimatanegu we Ulaia mwanena kukewadi mwanemu, beqa deqoina inaqonaqo mususuvo kepataeqa kaia inaetalaqamo.’

¹¹ “Iave dede mesaida ivesipupu ivo, ‘Muvalabubuna kapoina paipaina, taunimu mususu wete muvanuqa kanatomianavo aivekapokaoqaoqalidi inavedumwekaikaiemu. Kawaie matamue Yau mwanemwavo aikewadi tamo tomoqo aiveleni taiauda inakenoluqa maleweye tomo'otoqa matatabudi inakisedi.

¹² Komu dede kapoinanina vaigavueqa kuvalabubuni, we Yau kamukaimatavuloqa ailausimataleni kaiate me Isileli matatabudi matadie.”

¹³ We Deibida Naitani ivoneni ivo, “Yau akapoina Iave mataneye.” We Naitani ibaivila ivo, “Iave mukapoina gunabeida inuataqonidi beqa ge kiwapa.

¹⁴ Paina komu Iave ge kudavekimataneni we kuvedumwekaikaieni beqa kawaie natumu Bedisiba inavetubuqi inawapa.”

¹⁵ Tutuyanina Naitani ivesipupu ikakava inaqo navanuqe. We gwamananina Ulaia mwanena Bedisiba Deibida taiauda ivetubuqi, Iave viqa bwaigina iveleni.

¹⁶ Deibida ivelaukui Iave waineye gwamananina paipaina beqa ivekudiqana, we inaqo natutudaba waineye lovana matatabuna ikenokeno pwayepwayeye.

¹⁷ We Deibida navanuqa kanatomoqovo bwaigidi imai Deibida ilaunuagemai inatovoi inakani, we ibailedi ge wayaqina taiauda inakani.

¹⁸ Kaiata 7 waineye gwamana iwapa. We Deibida natolituqavo igololo Deibida ge wayaqidi inavoneni gwamana nawapa paipaina. We kaisedi ivesipupu ivo, “Tutuyanina gwamana imiamia taesipupu Deibida waineye, we bonada ge idanoqai. Banikodiqa, taivoneni gwamana gunabeida iwapa? Kago mesaida taunina inakavekapoi!”

¹⁹ We Deibida ikisedi natolituqavo kaisedi iekawa'aya'aya we iyagovi gwamana gunabeida iwapa. Beqa Deibida natolituqavo ivelautoliedi ivo, “Gwamana gunabeida iwapa?” Ibaivila ivo, “Mesaida.”

²⁰ Matautauda Deibida itovoi pwayepwayeye'eqa, itoa, ibunama wete kanakaleko kaivaudi isilagaidi mulineye inaqo Iave na Ukweta Maqemaqetana waineye inasobwanu. Ikakava ivila inaqo navanuqe, natolituqavo ivelaukuiedi kanikani imaieni ikani.

²¹ We Deibida natolituqavo ivesipupu waineye ivo, “Uvale dede mesaida kuvalabubunedi? Tutuyanina gwamana meyawaina kuekudiqana wete kutaitaiqa paipaina. We tutuyanina gwamana iwapa kutovoi kukani!”

²² Deibida ibaivila ivo, “Tutuyanina gwamana imiamia avekudiqana wete ataiqa paina anuanua avo, ‘Oge Iave inavenua'ina'inaqeyegu we gwamana idakavegiagiamaia meyawaina idamiamia.

²³ We deqoina gwamana iwapa. Vakai paipaina aivekudiqana? Ge kanasala gwamana wapaeqa aivileni aimaieni. Tamo kaiata yau ainaqo gwamana waineye, we gwamana ge kanasala inavila inamai waigue.”

²⁴ Beqa Deibida inaqo mwanena Bedisiba iluaqavudi taiauda ikenoluqa mulineye ivetubuqa natudi lamoqina, we Deibida iqoleni Solomoni. We Iave Solomoni ivenapwayeweni.

²⁵ Beqa Iave palopita Naitani ivetuneni inaqo Deibida waineye ivoneni gwamananina inaqoleni Iedidia, kananuakawananaqai Iave ivenapwayeweni.