2 Samuela 11 - Maiadomu

Deibida wete Bedisiba

¹ Tamo tova kanatutuya waineye, no tutuyanina kinivo mesaida divalabubuna isasauyedi vetalaqa waidie, Deibida natotovoigumeta Ioabi ivetuneni natovetalaqavo kaditogumeta taiauda wete Isileli tovetalaqavo matatabudi inaqo inavetalaqa me Amomoni taiauda. Ditovetalaqavo matatabudi ileo-kakavadi we ditaoni Laba ivelauvivili inakavekapoi, we Deibida imiamia Ielusalema taoni waineye.

^2-4 Tamo kaiata waineye lavilaviotoqe, Deibida itovoi nakabakeno waineye, isasasala ielauvivila navanuqa tabwana kanakubu beabeana waineye wete Ielusalema ietonovi. Ikisanaqo vavina ikisedi itoatoa, we vavina kadikisa giamaiotoqina. No tutuyanina waineye gunabeida diwetaki ikakava, itoatoa taunidi igigiavemaqetadi vevine kadiloina mesaida. Deibida tamo tomoqo ivetuneni inavelautoliedi aitoi vavina. Tomoqonina ivila imai ivesipupu ivo, “Vavinenidi kadiwavaqa Bedisiba, Eliamu natuna, Ititi tomoqina Ulaia mwanena.” We Deibida natolituqavo ivetunedi inakewadi inamaiedi waineye. Bedisiba imai waineye taiauda ikenoluqa matautauda ivila inaqo divanuqe.

⁵ We tutuya kalakusana Bedisiba mwau ibabaneni, beqa valea ivetuneni Deibida waineye ivo, “Yau mwau kababaneni.”

⁶ Deibida valea ivetuneni Ioabi waineye ivo, “Ulaia Ititi tomoqina kuvoneni inamai waigue.” Beqa Ioabi Ulaia ivetuneni inaqo Deibida waineye.

⁷ Tutuyanina ilekwa, Deibida Ulaia ivelautolieni Ioabi paipaina wete tovetalaqavo matatabudi dimiana wete divetalaqa qavianina naqeneye paipaina.

⁸ Matautauda Deibida Ulaia waineye ivesipupu ivo, “Kinaqo muvanuqe kaqemu kilegwai kiveyawai.” Ulaia itauya kini navanuqa ikiaweni, we mulineye Kini Deibida venapwayewa kanikani ivetuneni Ulaia navanuqe.

⁹ We Ulaia ge idanaqo navanuqe, we kaia ikenomo kini navanuqa kana'awa waineye Deibida natolituqavo taiauda.

¹⁰ Tutuyanina Deibida iyagovi Ulaia ge idanaqo navanuqe, navalea ivetuneni inamai. Ivelautolieni ivo, “Komu kanikie'eqa kumai, uvale ge kudanaqo muvanuqe?”

¹¹ We Ulaia Deibida ivoneni ivo, “Vonadabadaba Kanadedewaga, Isileli wete Iuda ikenokeno ukweta waineye. Kagutotovoigumeta Ioabi menatolauqaviavo kawasasamaiqe ivebaekwa. Dede lamunanina, yau ge kagusala ainaqo guvanuqe aikani, aiyemu wete mwanegu taiauda kaikeno. Avonadabadaba Iave kanawavaqaeqa wete komu Deibida kamuwavaqaeqa, dede ge mesaida aivalabubunedi!”

¹² Beqa Deibida Ulaia ivoneni ivo, “Kasiotoqa dede waineye kimiamia, kawaie aivetunemu kivila kinaqo vetalaqa waineye.” Beqa Ulaia nuanuanidiavo ivalabubunidi mesaida Deibida ivesipupuyedi.

¹³ Lavilavinina Deibida Ulaia imaseagai taiauda ikani wete iyemu wete Deibida Ulaia iveyemu palapalalai. We lovananina Ulaia giladi ge idanaqo navanuqe, we inaqo ikeno nakabakeno waineye Deibida natolituqavo taiauda.

¹⁴ Kawakawaie Deibida valea igililia Ulaia iveleni Ioabi paipaina.

¹⁵ We valeanina dede mesaida Deibida ivesipupuyedi Ioabi waineye ivo, “Ulaia kivegumetai vetalaqa veluvelulunina waineye. Tutuyanina inaetalaqa mutovetalaqavo matatabudi kiviledi kimaiedi, we Ulaia kaisena inatovoi kavagi kamiqaviavo inaluvewapai.”

¹⁶ We Ioabi natovetalaqavo taiauda Laba taoni ivelauvivili wayaqidi inaluvelakovi. Tutuyanina Ioabi valea ikewai iwawai ikakava, iloina Ulaia inaqo tamo vikai kadiqaviavo tovetalaqa veluvelulunaotoqidi waineye ietalaqa.

¹⁷ Tutuyanina kadiqaviavo isauyedi Laba taoni waineye'eqa ietalaqa me Isileli taiauda, Deibida natolauqaviavo tupwaidiavo wete Ititi tomoqina Ulaia taiauda iluvewapadi.

²⁶ Tutuyanina Bedisiba valea inoqai mwanedi Ulaia iwapa ivemoqai paipaina.

²⁷ We tutuyanina Bedisiba divemoqai kanakaiata ikakava, Deibida tamo tomoqo ivetuneni inakewadi inamaiedi navanuqe inaqidi we ivenatuna gwamana lamoqina. We Iave ge idamwasana Deibida navalabubuna paipaina.