1 Samuela 8 - Maiadomu

Me Isileli wayaqidi Kini inagumetedi

^1-2 Samuela natunavo kadikailuqa, natomwayai kanawavaqa Ioeli, we kanaveluqa kanawavaqa Abaidia. Tutuyanina Samuela gunabeida itomwatomwaya natunavo ivesinuedi me Isileli inaloinedi wete inavovonayavu paipaidi, we no lituqanina ivalabubuni Bedisiba taoni waineye.

³ We valabubuna tonotonovidi ge idavalabubunidi mesaida tamadi. We wayaqidi valabubuna kapoidi beqa mane inakewadi, wete tomo'otoqa ivonedi, “Mane kwaivelema matautauda kaivona kanavo mivalabubuna giamaidi.” We no mesaida valabubuna tonotonovidi iqaudi.

⁴ Beqa me Isileli tomoqovo bwaigidi matatabudi imai Lama waineye Samuela taiauda imiakauqa.

⁵ We ivesipupu waineye ivo, “Kuvevaneneqa, komu deqoina gunabeida kutomwaya we natumwavo muvalabubuna tonotonovidi ge idaemuliedi. Beqa Kini kukalaqeieni inagumetema mesaida tupwaidiavo kabaloina.”

⁶ We Samuela ge idamwasana dinuanua Kini paipaina, beqa ivelaukui Iave waineye.

⁷ We Iave Samuela ivoneni ivo, “Vakai matatabuna ielaukuieni waimue kivalabubuni. Komu ge idavedumwekaikaiemu, we mwaqitana Yau dikini ivedumwekaikaiegu.

⁸ Base akewaluguaqetedi amaiedi Itipitaeqa we tutuya puena iedumwekaikaiegu, yaubada tupwaidiavo waidie isobwasobwanu. Beqa deqoina kaia mesaida ivavalabubunedi waimue.

⁹ Kaia mesaida ielaukuiemu kivalabubuni, we naqaida kivemataluanidi kawaie banikodiqa Kini inavalabubunedi waidie.”

¹⁰ Beqa Samuela Iave navona matatabuna ivonedi tomo'otoqanidiavo, gumanidiavo Kini paipaina ielaukui.

¹¹ Ivonedi ivo, “Kago Kini inaloinemi demesaida inavalabubunedi: natumiavo lamoqidiavo inakewadi inawewesedi natolauqaviavo. We inaloinedi inalituqa wagabiubiu wete osi waidie, we tupwaidiavo inaloinedi inagumeta inalalaukwavina nawagabiubiu matadie.

¹² We tupwaidiavo inakewadi inavetogumeta tolauqaviavo kadiyoko 1,000 wete tupwaidiavo inavetogumeta tolauqaviavo kadiyoko 50 waidie. Inaloinedi tupwaidiavo inalituqa natanoqe wete kana inatavitavi. Tupwaidiavo nakabalauqaviavo wete nawagabiubiu kadisakuvo inavalabubunidi.

¹³ No Kininina natumiavo vevinediavo inakewadi natovetavoqa wete natokanigabu, wete tupwaidiavo vane maqaidi giamaidi inavalabubunidi paipaina.

¹⁴ Kami kaditanoqa giamaidi, oine kaditanoqa wete miwelavi olibe kaditanoqa inakewadi natogumetavo wete natolituqavo bwaigidi inaveledi.

¹⁵ We tutuyanina miwiti wete oine vuadi kwaitavidi sikwagigi 10 kwaivalabubunidi, tamoqana sikwagigi inakewai natogumetavo bwaigidi wete natolituqa taiauda inasenai.

¹⁶ We mitolituqavo tomoqovo wete vevine inakewadi we mibulumakau wete midoniki giamaidi inakewadi taunina nalituqa inavalabubuni.

¹⁷ We tutuyanina misipi wete migouti kadiyoko 10 kwaiyatodi, yoko tamoqana tamoqana waidie'eqa tamoqana inakewai taunina paipaina, we komi kwaivetolituqa-maimaiqa waineye.

¹⁸ Tutuyanina mwaunidiavo waidie kwaikabiawa Kininina kwavesinueni naloina waineye'eqa, kwaivelaukui Iave waineye kaivaisa paipaina, we ge inakaivaisemi.”

¹⁹ We tomo'otoqa Samuela navona veluvelulunidi ge idanoqaidi. We ivo, “Gebuka, kima wayaqima Kini inaloinema.

²⁰ Matautauda kima kabaloina tupwaidiavo mesaida. Makini inakedagumetema wete inatovoi matameye tutuyanina tupwaidiavo yoko taiauda kaivetalaqa.”

²¹ Beqa Samuela Iave ivoneni vakai tomo'otoqa ivesipupuyedi.

²² We Iave ivo, “Kini kuveledi mesaida wayaqidi ielaukuiemu.” Samuela itagwana we tomo'otoqa iveyavulidi inaqo divanuqe.