1 Samuela 3 - Maiadomu

Iave Samuela iqoleni

¹ Samuela gunabeida ivetubuau ilitulituqa Iave paipaina wete Ilai ikakaivaiseni. Tutuyanina waineye Iave ge tutuya puena idaesipupu tomo'otoqa waidie wete ge idasasauyeni tomo'otoqa waidie kenokisakisaeqa.

² We Ilai matana ikapo-otoqa saiqanaqa inapwalu. Tamo lovana ikenokeno nakabakeno waineye.

³ We Samuela ikenokeno Iave navanuqe we Vonadabadaba Kanadedewaga ikenokeno Tutudaba Maqemaqetana'otoqina waineye. We Iave nalamupa giladi ikalakalata ge idakweuya.

⁴ Iave iveqoleluguaqeta ivo, “Samuela!” Samuela ibaivila ivo, “Yau sidede.”

⁵ Itovoi ilaukwavina inaqo Ilai waineye ivo, “Yau sidede. Komu kuqolegu beqa amai.” We Ilai ivo, “Yau ge adaqolemu kunaqo kukeno.” Beqa Samuela ivila inaqo iketobala.

⁶ We Iave iveqole-vaituqana ivo, “Samuela!” Samuela itovoi ivila inaqo Ilai waineye ivo, “Yau sidede. Komu kuqolegu beqa yau amai.” We Ilai ivo, “Natugu, yau ge adaqolemu, kuvila kunaqo kukeno.”

⁷ Base Iave ge tamo tutuya Samuela waineye idavesipupu, beqa bonana ge idanoqayakinanai.

⁸ Dede kanavetonu Iave naveqole waineye, beqa Samuela itovoi ivila inaqo Ilai waineye ivo, “Yau sidede. Komu kuqolegu beqa amai.” Matautauda Ilai inuakawananaqaia Iave Samuela iqoleqoleni.

⁹ Beqa Ilai Samuela ivoneni ivo, “Kunaqo kuketobala. Kago aitoi inaveqole vaituqana, demesaida kivesipupuyeni kunavo, ‘Iave, kuvesipupu waigue yau mutolituqa aevaneneqa.” Beqa Samuela ivila inaqo iketobala.

¹⁰ We Iave imai itovoi Samuela vivineye iveqole base mesaida iveqoleyeni ivo, “Samuela, Samuela!” We Samuela ivo, “Kuvona, mutolituqa ievaneneqa.”

¹¹ We Iave ivoneni ivo, “Yau tamo mwau aivalabubuni me Isileli aivesalawapadi. Tutuyanina tomo'otoqa inanoqai paipaina inagololo.

¹² Yau kaimatavuloqa aivalabubuni Ilai menasusuvo waidie, we kaia sakunidiavo avesipupuyeni matatabudi mwaqitana inasauyeni waidie, kabavelamu inanaqo kabavekakava waineye.

¹³ Gunabeida avoneni kaimatavuloqa aimaieni nasusuvo waidie inakeno-vaqata paina natunavo ikawakapoyegu, iyagovi we ge wayaqina inasivetonovidi.

¹⁴ Beqa avonadabadaba, oge Ilai menatunavo inakalaqei-maimaiqa o inavelomu waigue dikapoina paipaina we dikapoina ge ainuataqonidi.”

¹⁵ Samuela kanakivie iketobala vaituqana kanaketoava ikawananaqai itovoi Iave navanuqa kana'awa isibaledi. We igololo ge wayaqina Iave navona inavesipupuyeni Ilai waineye.

¹⁶ We Ilai iveqole ivo, “Samuela, natugu.” Samuela ibaivila ivo, “Yau sidede.”

¹⁷ We Ilai ivelautolieni ivo, “Iave vakai ivesipupuyeni waimue? Vonanidiavo matatabudi kuvonegu, ge tamo vona kivaigavuyeni. Kago tamo vona kivaigavuyeni Iave kaimatavuloqa bwaigina inavelemu!”

¹⁸ Beqa Samuela vonanidiavo Ilai ivoneni, we ge tamo idavaigavuyeni. Ilai ivesipupu ivo, “Iave vakai inuani tonotonovina kaia inavalabubuni.”

¹⁹ We Iave Samuela taiauda tutuyanina nataulai waineye, wete tutuyanina Samuela ivonavaqata kaia kadimwaqitana isasauyedi.

²⁰ Beqa me Isileli matatabudi Dani taoni waineye'eqa inaqo Bedisiba taoni waineye iyagova-otoqi Samuela Iave napalopita.

²¹ Tutuya puena Iave ilalausimatala Sailo taoni waineye, navalea ikakalaqeieni Samuela waineye.