1 Samuela 2 - Maiadomu

Ana Divelaukui

¹ We Ana ielaukui iesipupu ivo, “Yau Iave kamwasamwsaneni, maveluluna ivelema. Beqa memagagasa kamaqaviavo kasasaidibiedi, wete kamwasana-otoqa paina iketoyavuma.

² O Iave, ge tamo aitoi maqemaqetana komu mesaida. No ge tamo yaubada mesaida komu, paina komu tovelulunaotoqa kuvekisabodebodema.

³ Komi tonualaga ge kwaigagasa matameye, wete ge meminualaga kwaiqeguqegu. Paina Iave valabubuna matatabuna iyagovidi, wete mibubunavo inavesinuedi oge giamaidi o kapoidi.

⁴ Iave, komu tovetalaqa dikekelavo kubaidi, we gumanidiavo ge mediveluluna kugiaveluvelulunidi.

⁵ Gumanidiavo kadi puedi inalase, we kawaie inalituqa veluveluluna tamo tomoqo waineye kanikani siaina inakewai inakani. We tolase katumapu kanikani bouna inakani. Vavine gagalidi ivenatuna 7 gwagwama, we vavina natudiavo puedi kawaie inayavulakiawedi.

⁶ Iave, komu wapa wete yawaina kukalaqei. Tomo'otoqa gulie kuyatodi wete kusivetovoi vaituqanidi.

⁷ Iave, komu tomo'otoqa tupwaidiavo kukaveyomuyomudi we tupwaidiavo kukaveguyoguyodi, Tupwaidiavo kusiobuyedi we tupwaidiavo kusilagaidi.

⁸ Komu toveyomuyomu kusivetovoidi kaupapa waineye'eqa, we lauqaina kanatokaigwagwa kusisilagaidi, beqa inamiabui kini natudiavo taiauda, we kabamiabui vekimakimatanina waineye kiyatodi. Iave pwayapwaya matatabuna kanatoloina komu, wete vakai matatabuna kuyatodi dikabamia waidie.

⁹ Gumanidiavo tovetumaqana ikakalamaqiqita kivekisabodebodedi, we tomo'otoqa tokapoina inavuyo-vaqata vaitoma waineye. Tomo'otoqa ge kanasala taunina navelulunaeqa inaveluluna.

¹⁰ Meqavoi inavetalavuala Iave waineye inakavekapoidi, kamukapoka butuna mesaida kanitala abame'eqa. Tomiapwayapwaya matatabudi inavonayavu Iave matamue, wete mukini kigiaveluveluluni, we kamuvesivesinua naveluluna kikavesulaia.”

¹¹ Alekana menasusuvo gwamana ikiaweni ivila inaqo Lama waineye. Samuela Sailo waineye imiana, Iave paipaina ilitulituqa we Ilai tovelomu iekisabodebodeni. Tutuyanina Samuela ivebwaiga, Iave nalituqa Na'ukweta Maqemaqetana waineye ivalabubuni. Iave wete tomo'otoqa inuauana Samuela tomoqo giamaina. We Ilai natunavo kadikailuqa tovelomu kapoidi. Beqa Iave tamo palopita ivetuneni inaqo Ilai waineye inavoneni paina natunavo ge idavekisabodebodedi we divalabubuna kapoina ge idasivetonovidi, beqa Iave kadikailuqa inanigedi kaiata kaitamoqana waineye. Mulineye Ilai tubuleleleqinavo puedi yawaidi kaditutuya inavekalakusa.