1 Samuela 16 - Maiadomu

Iave Deibida ivesinueni inavekini

¹ Iave ivesipupu Samuela waineye ivo, “Uvale tutuya kanakaniakwana Saulo paipaina kutaitaiqa? Yau navekini me Isileli paipaidi gunabeida avedumwekaikaieni. Bunama olibe kaba'iwaqa kukewadi kinaqo Bedeliema waineye, tamo tomoqo kanawavaqa Dese waineye. Gumanina natunavo lamoqidiavo waidie'eqa Kini avesinueni Saulo kanaketopesala.”

² Samuela ivelautoli ivo, “Banikodiqa ainaqoyedi? Kago Saulo inanoqai anaqonaqo tamo tomoqo ai'iwaqi inavekini paipaina inaluvewapagu!” We Iave ivo, “Bulumakau natudi vavinena kukewai kunaweni taiauda kunavo, ‘Amai aivelomu Iave waineye!’

³ Valea kivetuneni Dese waineye inamai velomu paipaina, we aivevemu vakai kivalabubuni. Tutuyanina aivevemu natunanina avesinueni, olibe bunamina kikata'iwaqi kunukununeye inavekiakiaya gumanina avesinueni.”

⁴ Beqa Samuela Iave navona matatabuna ivalabubunidi. Tutuyanina Samuela ilekwa Bedeliema waineye, taoni kanatomoqovo bwaigidi medigololo ielaudididiqa Samuela ibabaneni ivelautolieni ivo, “Banikodiqa, veiaiana paipaina kumai o gebuka?”

⁵ Samuela ibaivila ivo, “E'e, amai veiaiana paipaina, aivelomu Iave waineye. Taunimi kwaigiavemaqetami Iave mataneye, inakakava tainaqo taivelomu.” Matautauda Samuela Dese menatunavo inagiavemaqetadi Iave mataneye ikakava, imaseagadi taiauda inaqo velomu paipaina.

⁶ Tutuyanina ilekwa, Samuela ikisanaqo Dese natuna natomwayai Eliabi ikiseni nanuanuana ivo, “Mwaqitana, dede tomoqonina Iave ivesinueni inavekini.”

⁷ We Iave Samuela ivoneni ivo, “Ge kinuanua kanakisa giamaina paipaina wete kanakaniakwana. Yau Eliabi abaileni. Tomo'otoqa ge kanasala inakiseni vakai Yau akiseni paina tomo'otoqa tomoqo vovona inakiseni, we Yau nuapouna aikiseni.”

¹⁰ We Dese natunavo lamoqidiavo kadikuma 7 tamoqana tamoqana imaiedi Samuela waineye we Samuela ivo, “Dede tomoqovonidiavo waidie'eqa Iave ge tamo idavesinueni.”

¹¹ Beqa Samuela Dese ivelautolieni ivo, “Natumwavo lamoqidiavo kaiadi deqoidi?” Dese ivo, “Natugu gibwaigina noko, paina sipi iekisabodaboda.” Samuela Dese ivoneni ivo, “Ge taimiabui kani paipaina kanaketoava gwamananina kwaimaseagai kwaimaieni.”

¹² Beqa Dese tupwaidiavo tomoqovo ivetunedi inamaieni. Tutuyanina Deibida ilekwa Samuela ikiseni kanakisa giamaiotoqina tomobwaina wete itubumatakaikai, matana kadikisa giamaiotoqidi. We Iave Samuela ivoneni ivo, “Kaia dede gumanina, bunamaeqa ki'iwaqi.”

¹³ Tatanavo matadie Samuela bunama olibe kaba'iwaqa ikewai ikata'iwaqi Deibida kunukununeye kanakiakiaya inavekini. No kaiatanina inaqonaqo Iave Vaitabuna menaveluluna Deibida iveadaqi. Tutuyanina velomu ikakava Samuela ivila inaqo Lama taoni waineye.

¹⁴ Iave Vaitabuna Saulo ikiaweni, we Iave tamo vaitabu kapoina ivetuneni Saulo iluguya mwau iveleveleni.