1 Samuela 15 - Maiadomu

Iave Kini Saulo ivedumwekaikaieni

¹ Mulineye Samuela ivesipupu Saulo waineye ivo, “Yau gumanigu Iave ivetunegu bunamaeqa aiwaqimu beqa kuvekini natomo'otoqavo Isileli kuloloinedi. Beqa deqoina Iave navalea ivelegu kuevaneneqa aivonemu.

² Iave Tovelulunaotoqa navalea demesaida ivo, ‘Tutuyanina me Isileli Itipitaeqa isasauyedi, me Ameleki tubudiavo ilugukwailidi ivetalaqa me Isileli taiauda beqa deqoina Yau aikaimatavuloqidi.

³ Beqa kwainaqo kwailugukwailidi kwaivetalaqa me Ameleki taiauda kwaileodi we disakuvo matatabudi kwailuvelakovidi. Wete ge tamo aitoi kwailuvetupwai matatabudi kwailuvewapadi, tomoqovo, vevine, natudiavo, gwagwama mwedamwedalidi, wete dikaisayanidiavo mesaida bulumakau, sipi, kameli, wete doniki.”

⁴ We Saulo valea ivetuneni natolauqaviavo waidie inamai, we matatabudi iyoko Telemi taoni waineye. Tovetalaqanidiavo kadiyoko 200,000 Isileli waineye'eqa wete 10,000 Iuda namanuqa waineye'eqa.

⁷ Saulo natovetalaqavo ikedagumetedi, me Ameleki ilugukwailidi iluvewapadi, we vetalaqa ivelamuya Avila taoni waineye inaqo kanaketoava Sulu, taoninina Itipita nakabavekakava waineye.

⁸ We Egagi me Ameleki dikini ikavekavini, we natomo'otoqavo matatabudi iluvewapa-kakavadi.

⁹ Saulo menatovetalaqavo Kini Egagi wete kaisaya giamaiotoqidi ge inanigedi. Sipi menatudiavo wete bulumakau menatudiavo tubutubuqidi taiauda wete tupwaidiavo saku giamaidi ge idakavekapoidi ikewadi, we sakumaimaiqa wete kaisaya lumalumadi matatabuna ikavekapoidi.

¹⁰ We Iave ivesipupu Samuela waineye ivo,

¹¹ “Saulo ivedumwekaikaiegu, guloinanidiavo ge idavekimatanedi beqa Yau avenuakuvana uvale Saulo asilagai ivekini me Isileli paipaidi.” Tutuyanina Samuela Iave navesipupu inoqai, nuana ikapo-otoqa beqa no lovananina kanamatatabu itaitaiqa we ielaukui Iave waineye.

¹² Kawakawaiotoqe Samuela itovoi itauya inaqo Saulo ilalaualeni, we kedeye tamo tomoqo ivoneni ivo, “Saulo gunabeida inaqo Kalimeli taoni no waineye tamo gileu nuavekavina taunina kanadidiga paipaina ivetovoia, ikakava mulineye inaqo iobu Giligali waineye.”

¹³ Tutuyanina Samuela ibabaneni, Saulo menamwasana ivoneni ivo, “Samuela, Iave idavonavenapwayewemu! Yau Iave naloina avekimatanedi!”

¹⁴ Samuela ibaivila ivo, “Kago Iave naloina kudavekimataneni saku matatabuna kudakavekapoidi, beqa uvale sipi dikwekwela wete bulumakau butudi anoqanoqaidi?”

¹⁵ Saulo ibaivila ivo, “Kaisayanidiavo gutolauqaviavo ikewadi me Ameleki waidie'eqa. Sipi wete bulumakau giamaiotoqidi ikewadi imaiedi inagabunidi velomu paipaina Iave mu Yaubada waineye. We saku matatabudi kakavekapoidi.”

¹⁶ Samuela Saulo ivoneni ivo, “Kuvekwada! Sakunidiavo lovane Iave ivonegu aivesipupuyedi waimue.” Saulo ivo, “Kuvonegu.”

¹⁷ We Samuela ivo, “Base komu taunimu kusiobuyemu nigo gibwaigimu, we deqoina komu gunabeida tokedagumeta bwaigimu me Isileli dimanuqa paipaidi. Iave gunabeida isilagaimu i'iwaqimu komu me Isileli dikini.

¹⁸ Ivetunemu tamo lituqa kivalabubuni iloinemu ivo, ‘Kisauyemu kinaqo Ameleki tomo'otoqa kapoidi kileodi. Kivetalaqa kanaketoava kivekakavadi.’

¹⁹ Uvale, Iave ge kudavekimataneni? Uvale, kuvedimadimana saku wete kaisaya kusieloelodi? Beqa valabubunanina waineye kukapoina Iave mataneye.”

²⁰ Saulo ibaivila ivo, “Yau Iave naloina avekimataneni. Lituqanina ivelegu avalabubuni, me Ameleki matatabudi aleodi, we Kini Egagi akavekavini meyawaina amaieni.

²¹ We gutolauqaviavo sipi wete bulumakau giamaiotoqidi ikewadi kamaiedi Giligali taoni waineye velomu inakanigabu Iave mu Yaubada waineye.”

²² We Samuela ivo, “Kudanuani, vakai saku Iave nakabamwasana wete wayaqiotoqina? Banikodiqa, velomu gabugabunina wete kalaqeimaimaiqa o Iave naloina kanavekimatana? Mwaqitana, Iave kanavekimatana bwaigiotoqina matautauda velomu kanakalaqei. We mwaqitana Iave kanavemuli bwaigiotoqina, matautauda velomu sipi lamoqina yapana giamaiotoqina taikalaqei waineye.

²³ Kago aitoi Iave inavaqataqoni, gumanina kapoina mesaida bwaqavu, Kago aitoi Iave mataneye inagagasa, gumanina kapoina mesaida idasobwasobwanu valavalabubuna waidie. Paina Iave naloina kuvedumwekaikaieni, Beqa ivedumwekaikaiemu, ge natomo'otoqavo dikini.”

²⁷ Tutuyanina Samuela itunuvilai inatauya, Saulo Samuela kanatalauma igiakumia isilabuki.

²⁸ We Samuela ivesipupu waineye ivo, “Kagutalauma kugiakumia beqa ikawalabuki, we deqoina Iave muloina inaelomu me Isileli waidie, we tamo tomoqo iveleni, no gumanina tomoqo giamaina matautauda komu.

²⁹ Isileli da Yaubada Miamiavaqaina ge inakatupoe wete nanuanuana ge inasivilai. Gumanina ge tomo'otoqaotoqa, beqa nanuanuana ge inasisivilaviladi.”

³⁴ Matautauda Samuela itauya inaqo Lama, we Saulo ivila inaqo navanuqe Gibia taoni waineye.

³⁵ Tutuyanina Samuela meyawaina imiamia ge idanaqo Saulo idakiseni we itaitaiqamo paipaina. Iave inuavila inuani Saulo isilagai me Isileli dikini.