1 Samuela 10 - Maiadomu

¹ Matautauda Samuela bunama olibe kaba'iwaqa ikewai Saulo kunukununa i'iwaqi, we iyaoqi ivoneni ivo, “Aiwaqimu beqa kiyagovi Iave ivesinuemu me Isileli kiloinedi, gumanidiavo natomo'otoqa nuapouna.

² Deqoina kago kikiawegu, tomo'otoqa kadikailuqa kibabanedi Litieli kaditaumata Delidai taoni waineye, Beniamina namanuqa navikai kanaketoava waineye. Inavonemi donikinidiavo kulalaualediqa gunabeida ibabanedi beqa tamamu ge paipaidi idanuanuana we kaia komu paipaimu inuanuana wete ielautolitoli ivo, ‘Banikodiqa natugu aibabaneni?”

⁵ Wete Samuela Saulo ivoneni ivo, “Kawaie kinaqo Gibia-eloimu waineye, no waineye me Pilisitia ditovetalaqavo ivebaekwa. Tutuyanina kinaqonaqo no taoninina waineye, Iave napalopita mekadiyoko kibabanedi inaobuobuma kabasobwanu navikaie'eqa inagogova gwaqegwaqe mekadibulava, inava siaidi wete lololi beqa, we Iave navona inaesipupuyeni.

⁶ No tutuyanina waineye Iave Vaitabuna menaveluluna inaveadaqimu, beqa kiesipupuyeni Iave navona taiauda. Iave munuanuana inaketokaivauya komu kivetomo'otoqa sulimu.

⁷ Tutuyanina dede kiakiayanidiavo inasauyedi, Iave komu taiauda beqa vakai dimamue inayatodi kivalabubunidi.

⁸ “Beqa naqaida kiobu Giligali taoni waineye, no waineye taivekedabababana, kaisaya ainigedi aigabunidi velomu paipaina Iave waineye wete kaisaya tupwaidiavo veiaiana kanavelomu paipaina aivelomuyedi waineye. No waineye kilalaugamasa kaiata 7 mulineye ailekwa waimue matautauda aivonemu vakai kivalabubuni.”

Samuela ivesipupu-luguaqeta Saulo me Isileli dikini

⁹ We Saulo isivilai saiqanaqa Samuela idakiaweni, no waineye Iave nanuanuana iketokaivauya mesaida tomoqo sulina. Sakunidiavo base Samuela ivonavaqatedi, matatabudi kadimwaqitana isauyedi kaiatanina waineye.

¹⁰ Dede mesaida isauyeni. Tutuyanina Saulo wete natolituqa taiauda ilekwa Gibia waineye, ikisedi Iave napalopitavo meyokodi iobuobuma waidie. We Iave Vaitabuna menaveluluna Saulo iveadaqi wete ivelamu Iave navona iesipupuyeni.

¹¹ We no tomo'otoqanidiavo base gunabeida Saulo iyagovi ikiseni wete inoqai Iave navona iesipupuyeni, beqa kaisediqa ielautoliedi ivo, “Mwaqitana? Vakai dede isauyeni Kisi natuna waineye? Oge Saulo tamo palopita?”

¹² Tamo tomoqo taoninina kanatomiana itovotovoi ibaivila ivo, “Kanasala tamo tomo'otoqamaimaiqa inavepalopita kago tamana ge palopita kadiyoko waineye?” Dede kabanuavilele isauyeni Saulo waineye, beqa vonawakedubala ivelamu ivo, “Oge, Saulo Iave napalopita?”

¹³ Tutuyanina Saulo Iave navona ivesipupuyeni ikakava, ivila ilaga vikai kabasobwanu waineye.

¹⁴ Tutuya kalakusana ikakava Saulo tamana taina inaqonaqo kedeye Saulo wete natolituqa ibabanedi ivelautoliedi ivo, “Vakaiebeida kwamai?” Saulo ibaivila ivo, “Kima kanaqo doniki kalalaualedi, we ge kanasala kaibabanedi. Beqa kanaqo Samuela waineye kavelautolieni vakaiebeida kaisayanidiavo inaqo.”

¹⁵ Saulo tamana taina ivelautolieni ivo, “Vakai Samuela ivesipupuyeni waimue?”

¹⁶ Saulo ibaivila ivo, “Samuela ivonema tomo'otoqa tupwaidiavo gunabeida doniki ibabanedi.” We Saulo tamana taina ge idavoneni vakai Samuela ivalabubuni waineye navekini paipaina.

¹⁷ Mulineye Samuela me Isileli matatabudi iqolekauqidi inanaqo Misipa taoni inatovoi Iave mataneye.

¹⁸ Tutuyanina ilekwa Samuela ivesipupu waidie ivo, “Iave, me Isileli da Yaubada, ivesipupu waimie ivo, ‘Base tubumiavo aketoyavudi me Itipita diveluluna waineye'eqa. Amaiedi dede pwayapwayanina waineye, we aketoyavudi kabaloina sulina sulina diloina-kapo waidie'eqa.

¹⁹ We dede tutuyanina Yau kwavedumwekaikaiegu, gumanigu kamimwau wete miveviqa puedi waidie'eqa aketoyavumi. We deqoina katumapu kwavelaukui wayaqimi mikini aivelemi. Beqa kwamai kwavelautaubama misusuvo wete mimanuqavo kamiyoko waidie kwaivekaivevenemi Yau Iave matague.”

²⁰ Beqa Samuela manuqa tamoqana tamoqana ivonedi inamai manawaneye Iave mataneye, we Iave manuqa Beniamina ivesinueni.

²¹ Matautauda Samuela Beniamina namanuqa ivonedi inamai manawaneye Iave mataneye, we Iave Mati nasusu ivesinueni. No susunina waineye Iave ivesinueni Kisi natuna Saulo. We no waineye tomo'otoqa Saulo ilaualeni ge idababaneni.

²² Beqa tomo'otoqa Iave ivelautolieni ivo, “Saulo vakaiebeida?” We Iave ibaivila ivo, “Ivavaigavu saku naqedie.”

²³ Beqa ilaukwavina inaqo Saulo inalaualeni. Tutuyanina ibabaneni ikewai imaieni tomo'otoqa matadie, we gumanina kaniakwana'otoqina we tomo'otoqa kunukunudi kavalaneye ibala.

²⁴ Matautauda Samuela tomo'otoqa waidie ivesipupu ivo, “Dede tomoqonina Iave ivesinueni mikini. Ge tamo kida me Isileli mesaida gumanina.” We tomo'otoqa ibwau ivo, “Wayaqima Kini inalolonema tutuya kaniakwanina.”