1 Samuela 1 - Maiadomu

Samuela natubuqa

¹ Tamo tomoqo kanawavaqa Alekana imiamia Lamataimu-Dipimu taoni waineye, manuqa Ipileimu dikoya siaidi waidie. Gumanina Ielomu natuna, Eliu tubuna, Tou yaitena wete Dapusi tubutubuna manuqa Ipileimu waineye'eqa.

² We Alekana mwanenavo kadikailuqa, Ana wete Penina. Penina gumanidi menatudiavo we Ana gagalidi.

³ We diqaba tamoqana tamoqana Alekana menasusuvo inaqonaqo Sailo taoni bwaigina waineye isobwasobwanu wete ielomu Iave Tovelulunaotoqa waineye. Tutuyanina waineye Iave natovelomuvo kadikailuqa, Ilai natunavo Opini wete Peniasi.

⁴ No kaiatanidiavo waidie Alekana velomu inakalaqei, we kaisaya pilumina mwanena Penina wete natudiavo iveleveledi.

⁵ Oge Iave Ana ikavegagalidi ge idavenatuna we Alekana ivenapwayewedi bwaigina, beqa kaisaya pilumidi kailuqa iveleveledi.

⁶ Iave Ana ikavegagalidi beqa tutuya matatabuna Penina isasaidibiedi wete vovodi iemayaqi paina ge menatudi.

⁷ Diqaba tamoqana tamoqana Alekana menasusuvo inaqonaqo Iave navanuqe, Penina Ana ilalauvulewedi beqa medinuakapo itaitaiqa ge idakanikani.

⁸ Alekana mwanena ivelautoliedi ivo, “Ana, uvale isaki kwataitaiqa kanikani ge kwadakanikani? We uvale nuami ikapo-otoqa? Kago natumiavo lamoqidiavo teni kwadamwasana, we paina yau komi taiauda wete aivenapwayewa-otoqemi beqa ilaubwainemi kwadamwasana-otoqa!”

Ana we Ilai

⁹ Tamo tutuya Sailo taoni waineye velomu kanakani ikakava, Ana itovoi inaqo ivelaukui Iave waineye. We tovelomu Ilai imiabui imiamia Iave navanuqa kawana vivineye.

¹⁰ We Ana nuadi ikapo-otoqa, itaitaiqa we ielaukui Iave waineye.

¹¹ Ana ivonadabadaba Iave waineye ivo, “O Iave Tovelulunaotoqa, yau mutolituqa. Kago kamamwau kudakiseni wete mavelaukui kudanoqai kudavenua'ina'inaqeyema natugu lamoqina kudavelema kawaie wete kaivele-vaituqanemu. Gwamananina kaia komu paipaimu yawaina kanamatatabu waineye, kanakiakiaya navakauna ge inagusuya.”

¹² No mesaida Ana ielaukuiedi Iave waineye, we Ilai kawadi ietonovi.

¹³ Paina nuapoudieqa ielaukui beqa ge kanasala bonadi inanoqai, we kaia gabuladiqa ipetopeto. Beqa ienuana ivo, “Oge bwasi veluvelulunina iyemu nuadi iqau.”

¹⁴ We iyaqaidi ivo, “Uvale kwayemu bwasi veluvelulunina kwamai Iave navanuqe? Bwasi veluvelulunina kwabaileni.”

¹⁵ We Ana ibaivila ivo, “Tomwaya Ilai, gebuka! Yau ge bwasi veluvelulunina kadayemu, we mwaqitana manuanuana wete manuakapo'otoqa kaesipupuyeni Iave waineye.

¹⁶ Ge nuamu kunavo oge vavina kapoidi, we mwaqitana yau mataiqa'otoqa wete manuakapo'otoqa paipaidi kaelaukui Iave waineye.”

¹⁷ We Ilai ivo, “Niwalovaeqa kwanaqo! We me Isileli da Yaubada idavelemi vakai kwaelaukuieni paipaina.”

¹⁸ We Ana ivo, “Tomwaya, kaiwa bwaigina munuavekavina paipaina waimeye.” Mulineye dinuakapo ikakava ivila inaqo ikani.

¹⁹ Ikawananaqai kawakawaiotoqe, Alekana nasusuvo taiauda itovoi inaqo Iave waineye isobwanu mulineye ivila iobu divanuqe Lama waineye. Alekana memwanena Ana ikenoluqa, we Iave divelaukui inuani beqa ibaivilai.

²⁰ We Ana mwau ibabaneni natudi lamoqina ivetubuqi iqoleni Samuela ivo, “Dede gwamananina paipaina kavelaukui Iave waineye.”

Ana Samuela ikalaqeieni Iave waineye

²¹ Tamo diqaba ikakava mulineye Alekana menasusuvo inaqo vaituqana Sailo, inavelomu wete navonadabadaba inavalabubuni Iave waineye.

²² We Ana ge idanaqo kaia mwanediqa ivoneni ivo, “Kanaketoava gwamana kaidabai, matautauda kaikewai kainaweni kaikalaqeieni Iave waineye. Yawaina kanamatatabu waineye Iave navanuqe inamiamia.”

²³ Alekana ivo, “O giamaina, vakai kwanuani giamaikavana, we kwailalaugamasa kanaketoava gwamana kwaidabai. Iave idakaivaisemi mivonadabadaba kwaivalabubuni mesaida kwavesipupuyedi.” Beqa vanuqe imiamia gwamana iekisabodebodeni kanaketoava idabai.

²⁴ Tutuyanina gwamana idabai giladi gibwaigina inana wete tamana ikewai inaweni Sailo, Iave navanuqa waineye. We dinaqonina waineye dede sakunidiavo ikewadi inawedi velomu paipaina, bulumakau kanadiqaba kaitonu, pwalawa kanaketoava bwaigina kaitamoqana wete oine kaba'iwaqa tamoqana.

²⁵ Tutuyanina bulumakau inigei divelomu igabunidi Iave waineye ikakava, matautauda gwamana ikewai imaieni Ilai waineye.

²⁶ We Ana ivo, “Tomwaya Ilai, kunuani base diqaba tupwaidiavo ikakava waidie, yau vavinenima gunabeida kukisema vilamue katovotovoi kaelaukui Iave waineye.

²⁷ We kavelaukui Iave waineye gwamana paipaina, beqa mavelaukui ibaivilai dede gwamananina ivelema.

²⁸ Beqa deqoina gwamananina kamaieni kakakalaqeieni Iave waineye. Gumanina yawaina kanamatatabu waineye kaia Iave paipaina.” Ivesipupu ikakava matatabudi isobwanu Iave waineye.