Yelsom 8 - mzwDBL

Hanfale la

¹ N dɛ nyin kɛ he fe aa ɛ n nimambie, n ne he bwa aa ɔr n nya el. Anee dɛ́ ɡel n ne he chemo aa, n fe ɡbaare pɛl n te nɛra baah, nomɛlbwa aa wola won pwaah mɛ.

² N fe ɛɛ tɔ he sie dɛ́ ba he ne n nya dem, onee baɡ mɛ wa. N fe ɛɛ tɛɛ sen a sɔɔh aa somaa he nyɔ, n daa fee nee ba harama ɛ sen.

³ N kpɔ n nyu dawɛ o nɔŋɡal ta, o nɔndiɡ ɡbaa mɛ pɛl o te.

⁴ Jerusalam haahna, n dɛ ŋɔ he be ŋɔ, hé ŋwɛɛ baɡ mɛ kɛŋɔ, haa n ne n sɛnodɛɛɡe baahnee chɔɡ.

Yel numɛlte Daamanar la

⁵ Umee le pua hɛŋle ɡbo harɛ ta dɛɛ ba dɛ kpɔ o te dawɛ o sɛno nɛɛ nɔɔ? N iro che daa waa dɛ nɔnɛ lɔɡa, dɛ lawɛ ir bela baa lolɛ la.

Hanfale la

⁶ Gel n ɡbo waa do he bambile ta saŋ bɛlbwa kɛŋɔ haa kpɔ baŋe do he nɔn ta, dɛkalkɛ ɡɛ seo aa wola jaɡa dɔe la, ɡɛɛ n ne he dɔŋa nyina do. Baa ne haah meera kpeɡri kɛŋɔ seo, a won nii lawa kɛŋɔ nijena ken.

⁷ Mpo neerare aa won dime nyina nii, mojena bwa ɡe aa won su dɛ́ pala kaa. Hale dɛ nomɛl ŋɔ wɛɛ kpɔ o dea suuɡa bwaa yawɛ nyina aa, mamaa baa ba o mama.

Daamanar la

⁸ Ya dɔ nimambie waa ɛ bitolo, waa wola ela leɛ mɔɔ. Dɛ baa balɔ ŋɔ o dɛ nyinu waa, bɔkwa waa yaa ba wona ɛ tɛo wɔ?

⁹ O fe do kɛ danjwɛɛ aa, ya fe ɛɛ kpɔ suuɡapoŋee ma dejaŋ chɔŋɛ o nɛ. Dɛ o do kɛŋɔ doonyoa ɡbera daa ɡe aa, ya fe ɛɛ sɛh peleme daa dɛ́ tɔ o nɛ.

Hanfale la

¹⁰ Dɛ n fa do kɛŋɔ danjwɛɛ ken, kɛ n ela kpeɡo kɛŋɔ dejaŋa. Anomanta, n sɛnodɛɛɡe jemɔ kɛŋɔ n dɔ bansɔɔhna ne deŋnesɔɔhna dɛɛ le o be.

¹¹ Dɛ Kooro Solomɔn dɔ daa koo Baal Hamɔn, dɛ kpɔ tɛ paara ba lɛ dɛɛ parɛ o ta. Dɛ bɛlbwa chɛ kɛ o kpɔ suuɡapoŋa kaɡboŋ baa tɛo.

¹² N daa koo ɛ n ɡbo kon n won kpɔ tɛ. Kooro Solomɔn, he ken dɔ suuɡapoŋa kaɡboŋ, asɛ paara baa dɛ nyiŋi koo la ta ɡe dɔ suuɡapoŋa lafraanɛ.

Sɛno baa La

¹³ N sɛnodɛɛɡe, n bala bwa chemo dɛɛ kpa, ɡel ń no he taa le bodɛɛɡe haa du daa la.

Hanfale La

¹⁴ N sɛnodɛɛɡe, ɛ warane ba n be, chwa ba warane kɛŋɔ kweɡla kɛɛ kweɡlibale waa le bwejena konsɔɔhsoma aa lɔ o ta doa.