Yelsom 7 - mzwDBL

Sɛno baa la

¹ Koobie, toldɛɛɡe, na ɡɛ he nakpale ne naŋɡawa aa wera. He nakpale dɔ pɛla kɛŋɔ, bwedɛɛɡa a yoɡ aa kpeɡa. A do kɛŋɔ nɛra baa dɔ kwaa sɛɛh wejema aa ɛa.

² He ul do ɡuleɡule kɛŋɔ numol, sen ne konsɔɔhsoma suu dɛɛ ta saŋ bɛlbwa. He tea do ɡuleɡule kɛŋɔ mea baa vɔwa, asɛ kpɔɡa fee aa wera baro cheme.

³ He ela wer kohona, a do kɛ kweɡla bii anɛ.

⁴ He baŋa jaŋne dɛ siɡri kɛŋɔ dejaŋ baa kpɔ bala nyen ɛo ken. He sibie dɛ nyɛɡle kɛŋɔ bwɛjen Hɛsbɔn taama aa lɔ Bat Rabbim doonyoa. He mee toɡrɔ kɛŋɔ Lɛbanɔn dejaŋ o sie aa chaɡɛ bwɛjen Damaskɔs.

⁵ He sɔn ɡɔɔrɔ kɛŋɔ Kaamɛl Bwejen. He nyumpona jaŋne dɛ bir dɛɛ nyɛɡle, hale kooro kwaraa pɛla dɛ lawɛ.

⁶ Na ɡɛ haa wera tolo he waa ɛɛ lɛ sie, he nyina waa dɛ lawɛ n bambile kohona.

⁷ He jaŋne kɛŋɔ kpor da, he ela do kɛŋɔ daa nɔna sao.

⁸ Asɛ n ŋɔ, “Mɛɛ teeh daa laanee dɛ́ ka lawɛ o bie.” N dɛ nyin kɛ he ela do kɛŋɔ ɡrepo daa nɔna n be, he hweera sɔɔh som kɛŋɔ apolre a sɔɔh aa soma,

⁹ asɛ he nyoa som kɛŋɔ sensoma tenten. Gel sensoma la palɛ bɔeeh, ka kpɔ n sɛnodɛɛɡe nyotɔn ne o nyena ta bwa.

Hanfale la

¹⁰ N sɛnodɛɛɡee dɔɔ mɛ, n ɡbo nɛɛ o pɛla do.

¹¹ N sɛnodɛɛɡe, ba yá kaa bwɛɛ dahare, ya kaa ka chɔ bwɛjeɡre la ta jwaana.

¹² Gel ya fel ir kaa daa kooni ta, dɛ́ ka na kɛ a pa mun dɛɛ fe, kɛɛ a fee pili sie, kɛɛ a nɔna aa do ɡuleɡule dɛ be, ásɛ n baɡle n nyina maa dɔa tɛɛ bela.

¹³ Kwaa fee sɔɔh lɛ bɔr bwa, asɛ silɛɛ kwaa bwa soo siwi, ambena ne anfala bar yaa cheme, asɛ he waa do n bambile bini, mɛɛ nyin he ɡbo wa.