Yelsom 6 - mzwDBL

Daamanar la

¹ Haah waa wera kohona haahna bwa bini, leperaa he sɛnodɛɛɡe kaalɔ? Baɡle yaa bela waa kaala, ásɛ ya chae hé nyin o bɔr.

Hanfale la

² N sɛnodɛɛɡe kaa bodɛɛɡe waa du daa konsɔɔhsoma aa su o bwa. O sie dɛ lɛ a ta dɛ kaa nyin ane, dɛ kaa nyin kpɔɡa fee aa wera.

³ Menee dɔ n sɛnodɛɛɡe, asɛ o ɡee dɔɔ mɛ, o ɡbo peeraa dɛɛ di kpɔɡa fee aa wera baah ta.

Yel nuete Sɛno baa la

⁴ N sɛnodɛɛɡe, he wer tolo, kɛŋɔ koobwɛjena Tirsa ne Jerusalam. He waa dɔ jirima kɛŋɔ laa tena baa kpoŋe fraŋkaare.

⁵ Laa sie kpɔ n nɛ, ásɛ ba bɛ men lawɛ. He nyumpona biro kɛŋɔ bombiŋere aa teŋɛ dɔŋa nɛɛ tu le Gelead deŋɡarere ta dɛɛ ba.

⁶ He nyena too kɛŋɔ peera baa sɔa ne a le dɛɛ ba. Bɛlbwa ne o dɔŋ pɛo valɛ dɛɛ ba, beŋkpoŋ ɡba ta o te pere.

⁷ He faɡra dɛ nyɛɡle yal bini. A do ɡuleɡule kɛŋɔ daa bɛl baa dɛ yerɔ pɔmeɡranet nɔna.

⁸ Dɛ haŋkoranar fifraanumɛl, ne sɛnanar fifraanuatoro, dɛ toli baa wola baala jemɛ mɔɔ, baa wola nyoa dɔe kwara baa che naa,

⁹ n sɛnodɛɛɡee wera tolo kohona kɛŋɔ borɔnoma. O ɡboo mɛɛ nyin, onee o nya bihambeŋkpoŋ ɡbo waa dɛ nyinu kohona. Bitoli nao waa, ba dɛ yerɔ nɛn waa na som, haŋkoranar ne sɛnanar dɛ kpɛɛro.

Daamanar la

¹⁰ Umee wera tolo kɛŋɔ bɔr aa dɛ chaah nɔɔ? O wer kɛŋɔ korobie, dɛɛ chaah kɛŋɔ wee.

Sɛno baa la

¹¹ N la almɔn daa koo ta, dɛ́ ka na kɛŋɔ mɛɛ na a fee, kɛɛ dɛ́ na ɡrepo ne pɔmeɡranet daa fee.

¹² N bwara yɔrɔ mɛɛ chel kɛŋɔ nɛn waa kpɔ kooro torɔɡo dɛɛ la ka yo laa ken.

Daamanar la

¹³ Sulam tolo, berɛ ba, berɛ ba. Berɛ ba, ásɛ ya nyiŋi! Ɛrɛɛ hɛɛ nyin he nyiŋi Sulam tolo, waa dɛ sa Mahanaim sae nɛra baah ta nɔɔ?