Yelsom 5 - mzwDBL

Sɛno baa la

¹ N sɛnodɛɛɡe ne n hanfale, n ba bodɛɛɡe maa du daa. N boa n konsɔɔhsoma ne korobo bwa nyoa. N di n tohvaahna ne n tohno, dɛ nyɔ n sen ne na-elne. N daamanar, hé di kondikwa dɛ nyɔ sen. Hé nyɔ ɡɛ bɛlbwa ɡɛ haa won.

Daamanar la Yel naarɛte Hanfale la

² Maa chɔa kwaraa la, dɛ n ta dɛ kpɔ liire. N noɔ kɛŋɔ n sɛno aa lɔ ɡbera dɛ ŋɔ, “N hanfale ne n sɛnodɛɛɡe, he wer kɛŋɔ borɔnoma, he ta kirihiah bɛlbwa dii, yaa mɛ ɡbera. Mɛn pwe n nyu bwa, kɔɔla ta jwaana, n nyumpona pwe.”

³ N laa n batakaare foo, a chɛ kɛ ń berɛ kpɔ do ja aa? N sarame n nakpale, ń berɛ kpɔ valɛ harɛpɛɛ aa?

⁴ N sɛno ha nɔn lawɛ ɡbera, asɛ n bambile ɛɛ lɔ o wa.

⁵ N iro ŋɔ n yao ɡbera, n nonie ne n nɔɔra bwa maa korobo, ɡɛ saŋ maa lawɛ ɡbera la koŋkare kon la.

⁶ N ya ɡbera ŋɔ n sɛno fee ba jo kɛ o kaalɔ, n ta on nae. N bambile chɔɡ kaala waa kaala wa, asɛ n nyin o bɔr n ta on nae, n yerɔ ɡe o ta chaŋɛ.

⁷ Nɛra baa dɛ daah bwɛjen la ɡaaɡɔ dɛ ba chem mɛ o bini. Ba lɔɔ mɛ, dɛ do mɛ bol, dɛ lɛ n yal kaa.

⁸ Jerusalam haahna, hé baɡ mɛ nyoa, dɛ he na n sɛnodɛɛɡe la aa, hé ŋɔ o be ŋɔ o nyina kohona ɡelɔ n bambile chɔɡ, mɛɛ nyin o bɔr.

Daamanar la

⁹ Haah waa wera haahna bwa bini, he sɛnodɛɛɡe la korɛ sɛnanar bwa bini kɛɛ? Bɔkwaa ɡela o te ɡbosoroo waa korɛ, asɛ he ŋɔ ya baɡɛ nyoa ɔ?

Hanfale la

¹⁰ N sɛnodɛɛɡe la wer bonɔɔ kɛrɛdɛ, o bwara ɡe do kpeɡri, o dɔŋ toole baala kaɡboŋa fi bini.

¹¹ O siebɔr wer dɛɛ nyɛɡle kɛŋɔ suuɡaswɛm tenten, o nyumpona ɡuɡro dɛ do wer, dɛ bir kɛŋɔ ɡaahɡaah ken.

¹² O sibie wer kɛŋɔ borɔnomare aa toa kohona kɛŋɔ na-elne, dɛ do nenabɔɔne nyoo.

¹³ O faɡra wer kɛŋɔ bodɛɛɡe baa du daa konsɔɔhsoma su o bwa. O nyotɔn do kɛŋɔ kpɔɡa fee aa wera, korobo noo pweoh.

¹⁴ O nɔɔra wer kɛŋɔ suuɡaswɛm bune, baa kpɔ bwedɛɛɡa a yoɡ aa kpeɡa cheɡ a ta. O bwadabii wer kɛŋɔ bala nyen baa loɡao la, dɛ kpɔ bwedɛɛɡa ane a yoɡ aa kpeɡa cheɡ a ta.

¹⁵ O nakpale wer dɛ do kpeɡri kɛŋɔ pilare baa kpɔ bwedɛɛɡa aa toa ɛa, asɛ a chɔŋɛ suuɡaswɛm loɡa ta. O mar wer dɛ dɔ jirima kɛŋɔ Lɛbanɔn peleme dajaŋa.

¹⁶ O nyoa som ne moe, o wobɛlbwa wer tɛ mɛ. Jerusalam haahna, ɡɛ n sɛnodɛɛɡe aa doa mɛɛ nyinu kohona laanee la.