Yelsom 3 - mzwDBL

¹ Maa chɔ n kalaŋ ta jwaana bwa la, n lii n sɛnodɛɛɡe wa. N nyin o bɔr, kɛ n ta on nae.

² Mɛɛ iruu dɛ́ ɡaaɡe bwɛjen la bini, o fɔɡbaahna ne bela nɛra aa dɛ so. Mɛɛ ka ɡaaɡoo nyin nɛn n bambile aa lawa. N ɡaaɡɔ n ta on nae.

³ Nɛra baa dɛ daah bwɛɛ la ɡaaɡɔ dɛ ba puu mɛ, asɛ n bɔɔ ba ŋɔ, “He na nɛn n bambile aa lawɔ mɛɛ nyinu kohona la aa?”

⁴ Maa dena ɡar ba n den na n sɛnodɛɛɡe la. N bamu ŋɔ maa ɡel ó kaa, ka tel kɛŋɔ maa ba o ne n nya dem, bela baa lol mɛ.

⁵ Jerusalam haahna, n dɛ ŋɔ he be ŋɔ, hé ŋwɛɛ komɛlbwa sɔn ta baɡ mɛ kɛŋɔ, haa n ne n sɛnodɛɛɡe baahnee chɔɡ.

Yel toorote Hanfale la

⁶ Bɔkwaa le pua hɛŋle ɡbo harɛ ta, dɛ le chuu dɛɛ kaa nyundua a sɔɔh do som, kɛŋɔ daawiile ne korobo bonadiire aa dɛ yoɡa nɔɔ?

⁷ Hé na, Kooro Solomɔn kon baa kpɔa dɛɛ cheo laanee. Banyoola fifraanumɛl teŋɛ o nɛ, ba ɛ Israel harɛ nomonjena ɡbaɡba.

⁸ Ba bwa kpoŋe tokobie, dɛ bwa dɔ yoi wejema kɛrɛdɛ. Bɛlbwa tokobii sɛɡle o baŋ bɛl, dɛɛ kpa wobɛlbwa aa ba jwaana.

⁹ Kooro Solomɔnee ɡela ba kwaa ɡɛ kon la ba kpɔ dɛɛ cheo. Dadɛɛɡa aa le Lɛbanɔn nee o kwaaro.

¹⁰ O daa aa paaɡa la, suuɡapoŋee ba kpɔ ɛ a bwara, dɛ kpɔ suuɡaswɛm ɛ o mun la ɡe. Ba kpɔ yakɔl bɔle o kara ta, Jerusalam haahna kpɔ kondɛɛɡa ɛ o bini ne o habɔɔ bwa.

¹¹ Jerusalam haahna, hé le ba, dɛ́ ba na Kooro Solomɔn kooɡbɛrɛ o nya aa kpɔa piu, awola o sie aa lɛa kohona wɛɛ ɛ o hanfalwaa la.