Yelsom 1 - mzwDBL

¹ Kooro Solomɔn yela bini yelsomee nɔ.

Yel loɡle Hanfale waa dɛ pɛlɛ o jaa nɛɛ ne o daamanar wa

² Baɡle nyina kohona haa dɔa tɛ mɛ, he nyina dɔ pɛla kohona dɛ ɡwaa sen.

³ He nosɔɔhsoma sɔɔh som, he sɔn do kɛŋɔ baa fuɡe nosɔɔhsoma ta. A waa ɡela bitoli bwa ɛɛ nyin he wa.

⁴ Laɡ mɛ kaa warane, n dɛ nyin kɛ n kooro laɡ mɛ kaa o dem warane! Yá hɛɡre, dɛ́ ɡel ya sie lɛ kohona, yaa kpɛɛ he nyina haa dɔa laanee ɡwaa kɛ ya nyɔ sen. A waa ɡela bitoli bwa ɛɛ nyin he waa kɛrɛdɛ la!

Daamanar la Hanfale la

⁵ Jerusalam bitoli, n biro dɛ do wer, n biro kɛŋɔ tɛnte deene aa lɔ Keda pua hɛŋle ɡbo harɛ ta, kɛ dɛ berɛ do wer kɛŋɔ, Kooro Solomɔn koodem pateesanre.

⁶ Bɛ men ɡɛɛh, n bira maa bira wa, weeree ɡela n bir. N nimanar baah di n nɛ dɛ ɡel n kaa ɛ daa koo bini toma, n ta bɔr dɔe dɛ nyiŋi n daa koo ta.

⁷ N sɛno maa dɛ nyini kohona, baɡ mɛ bela he peera aa dɛ di, ne bela aa ba dɛ onɛ webaŋa. Ɛrɛɛ chɛ kɛ ń kpɔ sie sɔh yal bini, kɛŋɔ haah waa dɛ teŋɛ peteɡra bane ne ba peera nɛɔ?

Daamanar la

⁸ Haah haa wera haahna bwa bini, haa jemɛ kɛ he teŋɛ peera luɡri ta, dɛ kpɔ he bombiire a kaa di peteɡra la kukujeɡre jwɛh.

Sɛno baa la

⁹ N sɛnodɛɛɡe, n kpɔe dɛɛ maɡɛ Ijipt kooro jaaɡɔnee baa vɔwɔ pɛl torɔɡo ta ken.

¹⁰ Na ɡɛ he siebɔr ne deŋna kwa aa wera, he baŋa ne suuɡaswɛm baŋa kwaa ɡe do wer.

¹¹ Yaa ɛ suuɡaswɛm deŋna kwaa tɛɛ, dɛ́ kpɔ suuɡapoŋ kwaa o bwara.

Hanfale la

¹² N kooro taa chɔ o kara ta la, n nosɔɔhsoma sɔɔh lɛ bɔr bwa.

¹³ N sɛno maa dɛ nyinu sɔɔh som kɛŋɔ korobo, dɛ do n ela baah.

¹⁴ N sɛno do kɛŋɔ kpɔɡa aa fea, dɛ do daa kooni aa lɔ Ɛn Gedi harɛ ta ken.

Sɛno baa la

¹⁵ N sɛnodɛɛɡe, na ɡɛ haa do wer, he wer tolo ɡa! He sibie wer kɛŋɔ borɔnoma sibie.

Hanfale la

¹⁶ Na ɡɛ haa do pwɛre, n sɛnodɛɛɡe, he waa dɛ lɛ n sie kohona. Kpɔɡlwɛɛ ɛ ya chɔɔbɔr.

Sɛno baa la

¹⁷ Peleme dolii ba kpɔ chiɡri ya dea, asɛ dadɛɛɡa bwa soo siwi ɡee ba kpɔ ɡoo.