Yela 99 - mzwDBL

Korowii Ɛ Koranar Bwa Kooro

¹ Korowii dɛ di kora, asɛ harɛre nɛra bwara ɛɛ chel. O soɡe kookara ta nyundua Kerobim baah ta, asɛ harɛ ɛɛ jiɡri.

² Korowii kan dɛ do bwɛjen Saayɔn dɛɛ di kora harɛre nɛra bwa nɛ.

³ Nomɛlbwa ɛɛ kpɛɛ o sɔn waa kana dɛ dɔ jirima laanee, onee do ɡoroŋ kohona.

⁴ Korowii ɛ kooro, dɛ dɔ kpeɡri kohona, dɛɛ nyin waa aa toɡra, o ɡelɔ kasinteŋ do Israel harɛ ta. O ba wa aa toɡra dɛ do wer ne.

⁵ Hé kpɛɛ Korowii yaa dɛ tomɔ la, hé ɡuŋi o kookara sie dɛ́ tomɔ, onee do ɡoroŋ kohona!

⁶ Dɛ Mosis ne Arɔn fa ɛ o sɔfore, asɛ Samoɛl che o sɔn ta dɛɛ soŋo. Ba soŋe Korowii, asɛ o no ba be.

⁷ O cheɡɛ bam waa do jaŋne kaa nyundua ta, dɛ bol waa ba be, asɛ ba teŋɛ mmarare ne waa waa do ba a ta.

⁸ N Naa Korowii yaa dɛ tomɛ, he no he nɛra wesoŋa. A lole kɛ he tɛr ba deŋne te, kɛ he ɡelɔ ba jemɛ kɛ he kpɔ wechɔɡa dɛɛ kɛ.

⁹ Hé kpɛɛ Korowii yaa dɛ tomɔ, dɛɛ tomɔ o bwejen waa do ɡoroŋ ta. Korowii yaa dɛ tomɔ la do ɡoroŋ.