Yela 98 - mzwDBL

Korowii dɛ di kora harɛ nɔ bwa ta

¹ Hé ɡo yelfale tɛ Korowii, dɛkalkɛ o ɛ waa aa dɛ kpo nyoa! O cheɡɛ kpeɡri ne ɡoroŋ waa doa ta, dɛ pɔ o dɔma nɛ.

² Korowii bol pɔe waa pɔ o dɔma nɛɛ wa, dɛ ɡel harɛre nɛra bwa jemɛ lɛɛ waa lɛ o nɛra wa.

³ O teŋɛ nyoa waa baɡɛ Israel tena kasinteŋ ne nyina aa wola jaɡa dɔe bwa ne. Nɛra baa lɔ harɛ jaɡa bwa na ɡɛ Korowii yaa dɛ tomɔ aa lɛ o nɛra.

⁴ Harɛ nɔ ta nɛra bwa, hé ɡo silɛɛ yela kpɛɛ Korowii, hé ɡo yela kpɛɛro dɛ́ moo silɛɛ ne.

⁵ Hé ɡo yela kpɛɛ Korowii, hé kpɔ janjela lɔ yela kpɛɛro.

⁶ Hé hoh bɛle ne pebala nyeɡlare kohona, dɛ́ moo silɛɛ ne kpɛɛ Korowii waa ɛ ya kooro la.

⁷ Mpo ne kwaa aa lɔ o ta bwa ɡe moo, harɛ nɔ ta nɛra ne koŋkwaa bwa ɡo yela kpɛɛro.

⁸ Neerare ne deŋɡarere pɛ lɔ kpaŋa, dɛ́ ɡo yela silɛɛ ne kɛŋɔ nɛra ken kpɛɛ Korowii,

⁹ dɛkalkɛ o dɛ ba harɛ nɔ ta ba di kora. Wɛɛ ba bol harɛ nɔ ta nɛra waa dɛ́ pa bole aŋwɛnɛ ta, ne kasinteŋ ne.