Yela 97 - mzwDBL

Korowii Ɛ Koranar Bwa Kooro

¹ Harɛ nɔ ta nɛra, hé ɡel he sie lɛ, dɛkalkɛŋɔ Korowii dɛ di kora. Gel nɛra baa soɡe ekwie harɛre ta la ɡe hɛɡre.

² Baama ne biro baro cheme, waa aa toɡra ne kasinteŋ nee wɛɛ di kora.

³ Nii tɔ o sie dɛɛ lawɛ, dɛɛ fuh o dɔma baa baro cheme.

⁴ Nii la dɛ lawɛ kohona kɛŋɔ bwaala nyɛɡla ken, asɛ harɛ nɔ ta nɛra na dɛɛ chel.

⁵ Bwejena dɛ mwɛɛ kɛŋɔ tohkel, Korowii waa dɛ di kora harɛ nɔ nɛra bwa nɛɛ la sie.

⁶ Kwaa aa lɔ nyundua dɛ baɡle kɛ o waa toɡrɔ, asɛ harɛ nɔ ta nɛra bwa ɛɛ na o jirima.

⁷ Sihiih kpo nɛra baa dɛ tomɛ voɡa bwa, nɛra baa kpɔ voɡare dɛɛ maŋkura ba te, ne voɡa bwa dɛ ɡuŋi Korowii sie.

⁸ Bwɛjen Saayɔn tena noɔ ba sie lɛ, Juda bwɛjena tena ɡee hɛɡre, hen Korowii waa bola dɛ́ pa bole wa.

⁹ Nemenɛ Korowii, henee dɛɛ di kora harɛ nɔ nɛra bwa nɛ, henee kana ɡwaa voɡare bwa.

¹⁰ Nɛra baa hah wechɔɡa la, Korowii dɛ nyin ba wa. O kpɔ nɔn dɛɛ tɔ o nɛra ba wa aa dɔ kasinteŋ tɛo nɛ, dɛ lɛɛ ba dɛɛ le nyubinikpeɡ tena nɔn ta.

¹¹ Nii dɛ chaah nɛra ba wa aa toɡra sie, nɛra ba wa aa wera ɡe ɛɛ dɔ silɛɛ.

¹² Nɛra he wa aa toɡra bwa, hé ɡel he sie lɛ, waa Korowii aa ɛa wa. Hé lii waa Korowii waa do ɡoroŋ aa ɛa, dɛ́ kpɔ jam tɛo.