Yela 96 - mzwDBL

Korowii ɛ Koojen tenten

¹ Hé ɡo yelfale kpɛɛ Korowii! Harɛ nɔ ta nɛra bwa, hé ɡo yela kpɛɛro!

² Hé ɡo yela kpɛɛ Korowii sɔn! Hé bol o lɛɛ waa dɛ lɛ nɛra tɔpere bɛlbwa wa.

³ Hé bol o jirima waa baɡle harɛre nɛra, dɛ́ bol o nyokpowe-ɛɛla waa baɡle nɛra bwa.

⁴ Korowii kan, a chɛ kɛ ya kpɛɛro kohona. Onee chɛ kɛ ya kpɔ duure tɛ dɛ́ ɡwaa voɡa.

⁵ Harɛre bwa voɡare ɛ konsale baa kpɔ nɔɔra ɛa, kɛ Korowiirii ta nyundua.

⁶ O kan dɛ dɔ jirima kohona, kpeɡri ne jirima su o Dea.

⁷ Nɛra haa lɔ harɛ ta bwa, hé kpɛɛ Korowii. Hé kpɛɛro, o jirima ne kpeɡri waa dɔa wa.

⁸ Hé kpɛɛ Korowii, dɛ́ kpɔ jirima aa chɛ o sɔn la tɛo. Hé kpɔ saraha kwaa ba tɛo o Dea.

⁹ Hé kpɔ jirima tɛ Korowii Waa Do Goroŋ la. Harɛ nɔ ta nɛra bwa, hé ɔmɔ!

¹⁰ Hé ɡel harɛre nɛra bwa no kɛŋɔ, “Korowii dɛ di kora! O ta harɛ o che kiŋkiŋ waa wola yiiɡi, dɛ bol nɛra bwa waa dɛɛ pa ba bole ɡɛ aa chɛa.”

¹¹ Kwaa aa lɔ nyundua ne harɛ bwa, hé ɡel he sie lɛ kɛŋɔ nɛra aa dɛ lɛ ba sie. Mpo ne kwaa aa lɔ o bini bwa ɡe, hé do lɔŋɔre.

¹² Kooni ne kwaa aa lɔ a bini bwa, hé ɡel he sie lɛ kɛŋɔ nɛra aa dɛ lɛ ba sie! Ásɛ kɔr bini daa ɡe ɛɛ hɛɡre,

¹³ saŋ Korowii aa ba di kora harɛ nɔ ta la. Wɛɛ ba bol harɛ nɔ ta nɛra waa dɛ́ pa bole aŋwɛnɛ ta ne kasinteŋ ne.