Yela 95 - mzwDBL

Korowii kpɛɛra yel

¹ Hé ba ya kpɛɛ Korowii! Hé ɡel ya ɡo silɛɛ yela kpɛɛro, onee do kɛ Bwetal ya chwa kaa marɔ.

² Hé ɡel ya ba o sie ba jaamo, dɛ́ ɡo silɛɛ yela kpɛɛro.

³ Dɛkalkɛ Korowii dɔ kpeɡri kohona, onee dɛɛ di kora voɡare bwa nɛ.

⁴ O dɛ di kora harɛ nɔ ta nɛra bwa nɛ, hale bwebɔɔne aa luŋa ta ne bwejena dor.

⁵ Onee ta mpo ne harɛ, dɛɛ di a kpeɡri.

⁶ Hé ba ya ɡuŋu dɛ́ tomɔ, yá ɡuŋi Korowii waa ta yaa la sie!

⁷ Onee Korowii yaa dɛ tomɛ, o nɛraa yan wɛɛ nyiŋi ya nɛɛ kɛŋɔ peteɡre yon dɛɛ nyiŋi peera nɛɛ la ken. Waa Korowii aa dɛ bol he be fini laanee nɔ,

⁸ “He bɛ deŋnekpeɡ ɛ kɛŋɔ he naawa fa aa ɛ deŋnekpeɡ Mɛreba, dɛ vɛh o waa noe, dɛ jo o nɛɛ la, ɡɛ baa ɛa pua hɛŋle ɡbo harɛ ta Maasa la.

⁹ He naawa na waa maa ɛa tɛɛ ba bela, kɛ ba daah mɛ na.

¹⁰ Bene fifraanaarɛ bwaa n baah di ba nɛ, asɛ n ŋɔ, ‘Ba deŋne kpeɡri! Ba vɛh waa maa do ba a ta.’

¹¹ N baah aa dia la, n ŋwɛɛrɔ ŋɔ, ‘Baa ona maa tɛɛ ba ŋɔ bá ba onɛ ɡɛ maa dɛ onɛ la dɔe ba bwa.’ ”