Yela 92 - mzwDBL

Kpɛɛra yel baa dɛ ɡo Ona Tɔpere ta

¹ N Naa Korowii, a wer kɛ ya kpɛɛre, dɛ́ ɡo yela kpɛɛ hen Nemenɛ Korowii sɔn,

² dɛ́ bol he nyina haa dɛ nyin ya wa chɔɔ, ásɛ jwaana ɡe dɛ́ bol ɡɛ he wa aa dɔ kasinteŋ,

³ dɛ́ lɔ janjela ne kwaa bwa soo siwi baa kpɔa dɛɛ hɛlɛ ɡo yela kpɛɛre.

⁴ He nyokpowe-ɛɛla ɡelɔ n sie ɛɛ lɛ, n dɛ ɡo silɛɛ yela a wa.

⁵ N Naa Korowii, he waa haa dɛ ɛ kan, he wejema ta jaɡa dɔe.

⁶ Nɛn waa wola liire dɔe la aa won jemɛ, nɛn waa ɡɛna ɡe aa won no a mun.

⁷ Nyubinikpeɡ tena ɛɛ won dɛɛ kpeɡ kɛŋɔ kpɔɡa, ásɛ wechɔɡ-ɛɛra ɡe wobɛlbwa do wer dɛɛ tɛɛ ba, kɛ ba bwa ɛɛ ba chɔɡoo kwaraa.

⁸ Kɛ hen Korowii kan saŋ bɛlbwa dɛɛ la.

⁹ N Naa Korowii, ya jemɔ kɛŋɔ he dɔma bwa ɛɛ serewoo, ásɛ nyubinikpeɡ tena bwa lɔ peɡre.

¹⁰ He ɡelɔ n do kpeɡri kɛŋɔ kpɔɡ bini nabal, dɛ swee mɛ andɛɛɡa, dɛ ɡel n dɔ silɛɛ.

¹¹ N na n dɔma chola, dɛ no nyubinikpeɡ tena wii baa dɛ wi.

¹² Nɛra ba wa aa toɡra ɛɛ dɛɡoo kɛŋɔ kpor daa ken, baa kpeɡuu kɛŋɔ Lɛbanɔn peleme dajena.

¹³ Ba do kɛŋɔ daa baa dua Korowii Dea, aa dɛɡ Korowii yaa dɛ tomɔ Dea bela ken.

¹⁴ A ɛ dabena dɛ ta won nɔna, dɛ dɔ papooni kohona, dɛ che kɛrɛdɛ.

¹⁵ Anee dɛɛ baɡle kɛŋɔ, “Korowii waa toɡrɔ. Onee Bwetal n chwa kaa marɔ, o nyu bini ɡe aa kpeɡe.”