Yela 91 - mzwDBL

Korowii waa kpɔ nɔn dɛɛ tɔ ya nɛ

¹ Nomɛlbwa waa chwa ka so Nemenɛ Korowii lɔɡa o kpɔ nɔn tɔ o nɛ, nomɛlbwa waa ka do On Waa Ɛ Kpeɡri Bwa Dɔɔ lɔɡa la,

² ɛɛ won ŋɔ o be ŋɔ, “N Naa Korowii, henee cheɡɛ n habɔɔ, dɛ ɛ n danjwɛkpeɡ n chwa baa marɛ. Henee Korowii maa dɛ tomɛ, dɛɛ hwɛɡɛ he nɛ.”

³ Wɛɛ kpɔ nɔnee tɔ he nɛɛ le wekpeɡa aa sɔah bwa ta, dɛ́ lɛɛ le weechɔɡa bwa nyoa.

⁴ Wɛɛ tɔ he nɛɛ kɛŋɔ jal yon lawɛ o bii do o kena lɔɡre la ken. Wɛɛ nyiŋi he nɛɛ he dɔ bosɔɔhna, dɛ́ che o kasinteŋ ta nyiŋi, dɛ́ tɔe ɡbemɡbe.

⁵ Haa komɛlbwaa ɔmɛ jwaana, kɛɛ dɔma hɛma baa piɡri taa webaŋa,

⁶ kɛɛ weechɔɡa aa dɛ ba jwaana, kɛɛ weela aa dɛ kpo webaŋa.

⁷ Nɛra kaɡboŋ ɛɛ serewoo chɔ he jwɛh, kaɡboŋa fi chɔ dɛ́ bare, kɛ wobɛlbwa aa hen ɛ.

⁸ Siwii hɛɛ ba kpɔe dɛ́ na wechɔɡ-ɛɛra deŋnetɛra.

⁹ He kpɔ Korowii kɛŋɔ onee hɛɛ ba chwae kaa marɛ. He ŋɔ Nemenɛ Korowiirii kpɔ nɔn dɛɛ tɔ he nɛ,

¹⁰ anomanta, wenaale bɛlbwa aa hen pu bwa, wekpeɡa bɛlbwa ɡe aa he dem kwaraa bɛne!

¹¹ Korowii ɛɛ ɡeloo o nyundua toroma ɛɛ nyiŋi he nɛɛ kɛrɛdɛ, dɛ́ kpɔ nɔn tɔ he nɛ bobɛlbwa haa kaa.

¹² Baa lawɛɛ haa wola nakpala kwaraa lɔ.

¹³ Hɛɛ tiɡri nyujentena ne harɛkwaare nɛɛ, nyujentena aa ɔma ne domkpuli nɛɛ.

¹⁴ Korowii ŋɔ, “Mɛɛ lɛ nɛra baa dɛ nyin mɛ laanee, dɛ́ kpɔ nɔn tɔ nɛra baa jem mɛ kɛ ba dɔɔree men la nɛ.

¹⁵ Ba wio yer mɛ naa, mɛɛ no ba bee, wenaale puu ba ɡe aa, mɛɛ che ba habɔɔ. Mɛɛ lɛɛ baa dɛ́ tɛɛ ba jirima.

¹⁶ Mɛɛ ɡeloo bá so dɛ́ biɡri, ásɛ n lɛɛ ba.”