Yela 90 - mzwDBL

Yela tɔn naarɛte (Yela 90—106) Korowii bonɔɔ Mosis wesoŋa

¹ N Naa Korowii, he demii ya chwa baa marɛ, he kpɔ nɔn dɛɛ tɔ ya nɛ, le saŋ la ba le fini.

² Mɔɔ he ta bwejena kɛɛ harɛ nɔ la, dɛ he ɛ Korowii saŋ bɛlbwa dɛɛ la.

³ He won ɡela ya sewɛ, dɛ́ berɛ kaa teera haa kpɔa ma yaa la ta.

⁴ Bene kaɡboŋ do kɛ tɔpebeŋkpoŋ he be, a do kɛŋɔ dɛ tɔpere aa baa kaa ken, kɛɛ jwaana saŋ bɛl aa teŋa ba kaa ken.

⁵ He won ɡela nɛwɛnyina teŋe sewɛ kɛŋɔ dom yon piɡri lawɛ nɛn la ken. Ba do kɛ kpɔɡlwɛɛ haa naa chɔɔ,

⁶ a dɛ kpeɡ dɛ́ fe, jɔmɔra ne tela dɛ a holɔ dɛ́ sewɛ.

⁷ He bandia chɔɡ yaa, yaa ɔmɛ he bandia kohona haa kpɔa ba ta ya nɛɛ la wa.

⁸ Ya wechɔɡa chɔ he sie, hɛɛ na anɔ la yaa ɛa dɛɛ sɔh bwa.

⁹ He bandia ɡelɔ ya tɔpera do bori, a dɛ kaa warawara kɛŋɔ hweera ken.

¹⁰ Bene yaa di lɔ fifraanuanɛ ɡbo, kɛɛ dɛ bokpeɡa ta lole naa, bene fifraanuatoro. Kɛ a bwa ɡe ta la, hɔhɔrɔwa ne suna dii ɡboo, aa biɡri dɛ a baa kaa, ya serewe.

¹¹ Umee nyɔ he bandia danana nee kaɔ? Umee jemɛ ɔmee aa lɔ he bandia kohona ta nɔ?

¹² Gel yá jemɛ ya tɔpera nyoa, ásɛ ya won jemɛ wa.

¹³ N Naa Korowii, ɡel he baah sɔɔh! Saŋ besoo he bandia nyoa ɛɛ ba sɔɔhna ɔ? Dɔ tedoma tɛ he bonɔɔna.

¹⁴ Gel he nyina aa wola jaɡa dɔe la do ya nɛɛ chɔɔ bɛlbwa, ásɛ ya ɡo silɛɛ yela dɛɛ hɛɡre ya soɡa bini bwa.

¹⁵ Gel yá dɔ silɛɛ kohona taraken, ɡɛ tenten he fa aa ɡela ya di suna, saŋ bɛl waa baa kaa la.

¹⁶ Gel yan yaa ɛ he bonɔɔna nɔ na he nyokpowaa haa dɛ ɛ, ɡel ya naanar na he jirima aa kana la.

¹⁷ N Naa Korowii yaa dɛ tomɛ, swee yaa andɛɛɡa. Gel ya wobɛlbwa do wer tɛ yaa kɛrɛdɛ!